WUKUMBUSO 33 - Biblia Ilagho Jiboie Kwa Wandu Wose

Musa kurasimia mbari ra Israeli

¹ Agha ni marasimio uo mundu wa Mlungu Musa oreghifunyireghe kwa wandu wa Israeli imbiri usefue.

² BWANA orechieghe kufuma Mghondi ghwa Sinai; ukajoka sa iruwa aighu ya Edomu, ukang'ala-ng'ala kwa wandu wake kufuma Mghondi ghwa Parani ukacha andwamweri na weke malaika elfu ikumi uko na lumu lwa modo mkonunyi kwake ghwa kiwomi.

³ BWANA wawikunde wandu wake na kuwilindia awo wiko wake. Kwa huwo dadaghoghoma maghunyi kwake na kusikira malaghiro ghake.

⁴ Dadarisikira Sharia iro derenekeloghe ni Musa, mali mbaa inekelo mbari yedu.

⁵ BWANA ukawuya mzuri wa wandu wake Israeli, iji mbari na vilongozi vawo werekwaneghe chiaimweri.

⁶ Musa ukaghamba aighu ya mbari ya Reubeni: “Reubeni usefo jingi, hata ngera wandu wake ni watini.”

⁷ Nao ukaghora huwu kwa mbari ya Juda: “Ee BWANA, sikira kililo chawo kuwitesie; kuwikwanye sena na mbari rimu. Kuwilue BWANA, kuwitesie wiwisimie wamaiza wawo.”

⁸ Kwa mbari ya Lawi ukaghora, “Oho, BWANA, kufunukuo lukundo lwako kwa Urimu kwa kutumia Walawi, wadumiki wako wa loli. Korewitimieghe aja Masa, kukawiwona kukaia waloli machinyi gha Meriba.

⁹ Werewonyereghe wuloli m'baa kwako, kuchumba wavi, waruna, angu wana. Wererisikireghe sharia rako wikamaziria kwa wuloli malaghano ghako.

¹⁰ Wichawifundisha wandu wako kuisikiria Sharia yako; wichafunya vizongona aighu ya madhabahu yako.

¹¹ BWANA, kuirasimie mbari yawo ikaie na ndighi; kuboilo ni agho wibonyagha; kuwifashe wamaiza wake wose, hata wisewuke sena.”

¹² Kwa wundu ghwa mbari ya Benjamini ukaghora, “Ihi niyo mbari BWANA uikundagha na kuilindia; wadawilindia dime dii, nao wadakaia aghadi kwawo.”

¹³ Na kwa wundu ghwa mbari ya Josefu ukaghora, “BWANA ndeirasimie ndoe yawo kwa kuinyeshera vua na machi ghifumagha andoenyi nakosi,

¹⁴ ndoe yawo ndeirasimilo kwa matunda ghiboie kuchumba gha ngelo ya iruwa, na matunda ghiboie gha kula kimu.

¹⁵ Mighondi yawo ya kala ndeichulo ni matunda ghiboie.

¹⁶ Isanga jawo ndejichulo ni agho ghose ghiboie, irasimilo ni wucha ghwa BWANA, uo orededieghe andenyi ya kisachi chiakagha modo. Marasimio agha ghose ndeghikaie aighu ya mbari ya Josefu, kwa kukaia orekoghe kilongozi aghadi ya waruna.

¹⁷ Josefu oko na ndighi ra njau, na mbembe ra mbogho. Mbembe rake ni maelfu gha Manase na maelfu ikumi gha Efraimu. Wadasindika iro mbari naro, na kuwisindika hata kutua kwa ndoenyi.”

¹⁸ Na kwa wundu ghwa mbari ya Zebluni na Isakari ukaghamba, “Zebluni ndewone nicha andenyi ya biashara yake ya baharinyi, na mali ra Isakari richurikie mzinyi.

¹⁹ Wadakaribisha waghenyi mighondinyi kwawo, na kufunya vizongona va hachi aho. Wadapata mali rawo baharinyi, na kufuma msangaghenyi mbai-mbai ya bahari.”

²⁰ Na kwa wundu ghwa mbari ya Gadi ukaghamba, “Mlungu ndekaso uo ubonyere isanga jawo ibaa, Gadi ualaliria sa shimba, upate kurashua mkonu na chongo.

²¹ Werewusireghe isanga jiboie kwa wundu ghwawo weni, iwaghio ja kilongozi jerewikiloghe kwawo. Wereobueghe malaghiro na sharia ra BWANA iji vilongozi va Israeli verekwanyikieghe chiaimweri.”

²² Na kwa wundu ghwa mbari ya Dani ukaghamba, “Dani ni mwana wa shimba, wadarama kufuma Bashani.”

²³ Na kwa wundu ghwa mbari ya Naftali ukaghamba, “Naftali warasimilo na ndighi kwa wundu ghwa wucha ghwa BWANA; isanga jawo jeeshabuka nandighi noko cha kusinyi kufuma ndiwa ya Galilaya.”

²⁴ Na kwa wundu ghwa mbari ya Asheri ukaghamba, “Asheri warasimilo kuchumba mbari rose. Ndedawirilo ni waruna, na isanga jake jichulo ni mizeituni.

²⁵ Mbenge ra mizi yake rederughwagha na vuma, matuku ghose odekaiagha banana.”

²⁶ Wandu wa Israeli, ndekuwadie mlungu ghungi ghuko sa Mlungu onyu, uidagha mlungunyi kwa wubaa ghwake, uidagha aghadi ya mawingu upate kumvuvua.

²⁷ Mlungu wakaie mlindiri wako ngelo rose; mikonu yake ya kala na kala niyo yawuyakumaziria Orewisimieghe wamaiza wenyu imbiri yenyu; ukamzera muwitoteshe wose.

²⁸ Kwa huwo inyo kivalwa cha Jakobo mduo moyo kwa sere mkaie banana andenyi ya isanga ja viro na divei, andu mami gha mawingunyi ghinyosheragha ndoe.

²⁹ Israeli kuboilwa saki! Ndekuwadie ungi ufwanane nenyo, mburi ikirilo ni BWANA. BWANA moni ni ngao yenyu na lufu lonyu upate kumlindia na kumneka wusimi. Wamaiza wako wichacha wikikulomba wughoma, na oho kuchawifasha-fasha.