WUKUMBUSO 3 - Biblia Ilagho Jiboie Kwa Wandu Wose

Waisraeli kumsima mzuri Ogu

¹ “Niko dikaghaluka na kughenda Bashani, na Ogu mzuri wa Bashani chiaimweri na wandu wake wose ukafuma kulwa nesi aja Edrei.

² Ela BWANA ukanizera, ‘Kusakeobua, angu nakuneka uo, na wandu wake wose andwamweri na isanga jake; kum'bonye sa iji koni korem'bonyereghe Sihoni mzuri wa Waamori uo orekoghe Heshboni.’

³ “Kwa huwo, BWANA Mlungu odu ukadineka Ogu mzuri wa Bashani wori andwamweri na wandu wake wose; nesi dikawibwagha hata ndederesighieghe mndungi.

⁴ Ngelo ija cheni, dikawada mizi yake yose mibaa; hata ndekuwadie muzi ghungi m'baa diserewisokieghe anduangi. Erekoghe mizi mirongo irandadu andenyi ya isanga jose ja Argobu; jerekoghe jikibonyerwa nguma ni mzuri Ogu wa Bashani.

⁵ Mizi ihi yose ereaghiloghe na mawurigha ghimange ghiko ighu, na mbenge ra vuma, kula na mizi mitini mitini erekoghe iserighilo.

⁶ Nesi dikawinona putu sa iji koni derem'bonyereghe Sihoni mzuri wa Heshboni; dikanona kula muzi, womi, waka, na wanake.

⁷ Ela dikawisoka na kudwa mfugho na vilambo vose va mizi.

⁸ “Kwa huwo ngelo ija, dikawada isanga kufuma kwa waja wazuri wawi wa Waamori werekoghe Jordani nakimonu ii chia cha mashariki; kufuma vololo ya Arnoni hata Mghondi ghwa Hermoni.

⁹ (Wasidoni wadawanga Mghondi ghwa Hermoni, Sirioni; ela Waamori wadaghuwanga Seniri).

¹⁰ Dikawada mizi yose ya isanga ja wurindinyi, Gileadi yose, Bashani yose, hata kuvikia Saleka na Edrei; mizi ya wuzuri ghwa Ogu iko andenyi ya Bashani.

¹¹ (Ogu mzuri wa Bashani nuo oresigharikieghe uekeri wa agho masighariko gha Warefai. Wuli ghwake ghorekoghe ghwa chuma, nagho ghwaduagha ghukiwoneka aho Raba kwa Waamoni; ghorekoghe na wulacha ghwa meta inya na wushapa ghwa kaavui meta iwi kunughana na vipimo va matuku ghose).

Vichuku verekaieghe mashariki ya Jordani

¹² “Ngelo iyo, diendawada ijo isanga, nerewinekieghe kichuku cha Reubeni na cha Gadi isanga noko cha kaskazinyi; kufuma Aroeri na vololo ya Arnoni, na nusu ya Gileadi; ijo isanga ja mghondinyi chiaimweri na mizi yaro.

¹³ Isanga ja Gileadi jisigharikie, chiaimweri na Bashani yose, ijo jerebonyerwagha nguma ni Ogu, najo nijo isanga ja Argobu, nerewinekieghe nusu ya kichuku cha Manase. (Isanga jose ja Bashani jeremanyikieghe kukaia ja Warefai.

¹⁴ Jairi, wa kichuku cha Manase, orewadieghe isanga jose ja Argobu najo nijo Bashani, hata kuvikia mwano na Wageshuri na Wamaaka; na mizi yaro mitini ukaiwanga Havoth-jairi kunughana na irina jake moni; nayo yawangwagha huwo hata linu.)

¹⁵ Makiri neremnekieghe Gileadi,

¹⁶ na kichuku cha Reubeni, chiaimweri na cha Gadi, ngawineka isanga kufuma Gileadi hata kuvikia vololo ya Arnoni, na mwano ghwaro ghukakaia ghadi na ghadi ya vololo; ghukaida hata Moda ghwa Jaboki ghuko mwano na Waamoni.

¹⁷ Ii chia cha magharibi, isanga jawo jereshabukieghe hata Moda ghwa Jordani, kufuma Ndiwa ya Galilaya ii chia cha kaskazinyi, hata kuvikia Bahari ya Chumbi iko nandonyi ya Mghondi ghwa Pisga iichia cha mashariki.

¹⁸ “Ngelo iyo, neremnekieghe momu ngighamba, ‘BWANA Mlungu onyu wamnekie isanga iji mujiwuse; mang'oni ghenyu ghichaida ghirwae maswagha, na kukiria imbiri ya waruna wandu wa Israeli.

¹⁹ Ela waka wenyu na wana wenyu na mfugho renyu, (naichi moko na mfugho nyingi) richasighwa mzinyi iyo nimnekie;

²⁰ hata BWANA wawineka wanyinyu kuhora sa inyo mmbeni, nawo weni wikaie ijo isanga winekwagha ni BWANA Mlungu onyu, jiko Jordani nakimonu ii chia cha magharibi; niko mmbuye kula mundu andu kwake aho nimnekie.’

²¹ Ngelo iyo, neremnekieghe Joshua momu ngighamba, ‘Oho kwawonie na meso ghako maza rose BWANA Mlungu wako ubonyere kwa awa wazuri wawi, nao uchabonya woruwo koni kwa mawuzuri ghose mchaalwa nagho.

²² Msakeobua angu BWANA Mlungu onyu nuo umluyagha.’

Musa kughirilwa kungia Kanaani

²³ “Ngelo iyo, neremvoyeghe BWANA loli loli ngighamba,

²⁴ ‘Ee BWANA Mlungu, kwaazoya kummbonyera mdumiki wako woruwu ugho wubaa ghwako na kudima kwako; ni mlungu uao uko mlungunyi angu ndoenyi udimagha kubonya kazi ring'ane huwu sa rako?

²⁵ Nakulomba kunisighe niruwuke, nipate kuwona ijo isanga jiboie jiko chija kimonu cha Jordani ijo isanga jighokie ja Mighondi ya Lebanoni!’

²⁶ “Ela BWANA orekoghe wanibonyera machu kwa wundu ghonyu, ukalegha kunisikira; nao ukanizera, ‘Katwa woruwo hata kusewueghora nani aighu ya ilagho iji.

²⁷ Ela joka koighu mghondinyi ghwa Pisga, kuwusire meso ghako kuzighane cha magharibi, cha kaskazinyi, cha kusinyi, na cha mashariki, kuwone ijo isanga na meso ghako; angu oho ndekuchaaruwuka ughu Moda ghwa Jordani.

²⁸ Ela kumlaghire Joshua; kumkumbe ngolo na kumfungisha ndighi; angu uo ucharuwuka na kukiria imbiri ya awa wandu, nao uchawibonya wiwuse ijo isanga kuchaajiwona.’

²⁹ Kwa wundu ugho, dikakaia vololonyi kulangaya Beth-peori.”