WUKUMBUSO 29 - Biblia Ilagho Jiboie Kwa Wandu Wose

Ilaghano ja BWANA na Waisraeli andenyi ya isanga ja Moabu

¹ Agha ni malagho gha Ilaghano ja BWANA ijo oremlaghirieghe Musa ubonye na wandu wa Israeli andenyi ya isanga ja Moabu, kula na jija ilaghano orebonyereghe nawo aja Mghondi ghwa Sinai.

² Nao Musa ukawiwanga wandu wose wa Israeli ukawizera: “Mwamerie kuwona mmbeni maza rose BWANA oreribonyereghe kwa mzuri wa Misri, na kwa wadumiki wake, na kwa isanga jake jose.

³ Morewonieghe makabo mabaa, alama na mashiniko.

⁴ Ela hata idime, BWANA waduagha usemnekie akili retambukilwa, angu meso ghewona, angu madu ghesikira.

⁵ Namlongozere miaka mirongo ina kireti; ndemchefuilwa ni nguwo, hata vadu venyu.

⁶ Ndemorekoghe na vindo veja, angu divei, hata chofi, ela BWANA oremnekieghe vindo eri mpate kumanya angu uo ni BWANA Mlungu onyu.

⁷ Nesi diendavika aha, Sihoni mzuri wa Heshboni na Ogu mzuri wa Bashani werefumieghe kulwa nesi, ela dikawisima;

⁸ dikawada isanga jawo na kujineka kichuku cha Reubeni, na cha Gadi, na nusu ya kichuku cha Manase jikaie ifwa jawo.

⁹ Kwa huwo mlindie kubonya malagho gha ilaghano iji, eri mpate kuwona nicha kwa maza rose m'bonyagha.

¹⁰ “Inyo mmbose moko aha kimusi imbiri ya BWANA Mlungu onyu idime. Vilongozi va vichuku venyu, waghosi wenyu, na wabaa wenyu; wandu wose wa Israeli.

¹¹ Wana wenyu, waka wenyu na waghenyi wemara-mara wiko aghadi konyu, awo wimshoiagha mbande, na kumdaia machi.

¹² Moko aha idime mpate kubonya ilaghano ja ighemi na BWANA Mlungu onyu, ijo ifwane mujinughe,

¹³ eri upate kum'bonya mkaie wandu wake idime, nao ukaie Mlungu onyu sa iji koni orelaghirieghe na kughema kwa weke ndeyo Abrahamu, na Isaaka, na Jakobo.

¹⁴ Hata si inyo mmbeni muekeri BWANA wawuyabonya ilaghano iji ja ighemi;

¹⁵ ela waawuyabonya chiaimweri nesi diwose dikwanye aha kimusi imbiri yake idime na awo wichaavalwa konyuma.

¹⁶ “Inyo mwaichi seji diduekaia isanga ja Misri, na seji dichee dikiidia aghadi ya iro mbari zima.

¹⁷ Mwawonie vilambo vawo va kisha werekoghe navo; milimu yawo ya midi na magho, na feza na dhahabu.

¹⁸ Mkulindie, isechekaia mndungi onyu aghadi konyu wa womi angu wa waka, angu kinyumba, angu kichuku kughaluka na kumsigha BWANA Mlungu odu, uendetasa milungu ya ija mbari; uchekaia sa mudi ghuvagha matunda gha sumu, ghibirie aghadi konyu.

¹⁹ Mndungi onyu uko aha idime usikiragha malagho gha ilaghano ijo ja ighemi, nao uhoreshe ngolo yake ukighamba, wei ukeduasikira agho malagho na kughilisha ngolo yake ndewonagha ilagho jingi. Ilagho ijo jichareda kutota kwa wose wiboie na wizamie wori.

²⁰ BWANA ndechaamfuya wughoma uo mundu. Wulalo ghwaro machu gha BWANA ghichaaka sa modo aighu ya mundu uo, na njowe riandikilo andenyi ya chuo ichi, richambwada; na BWANA uchajiinja irina jake ndoenyi.

²¹ BWANA uchammbika kula na mbari ya Israeli, upate makabo kunughana na njowe rose ra ilaghano riandikilo andenyi ya chuo ichi cha sharia.

²² “Wana wenyu wa kivalwa chichagha, na waghenyi wifumagha isanga ja kula, wichawona makabo ghose BWANA oreghitumieghe kujikaba ijo isanga, kwa matiriro ghose na makongo.

²³ Mbuwa rose richasighwa nduu, rilungurilo ni kibiriti na munyu na maivu gha modo; ndejichaawalwa hata kubukwa ni isaka jingi. Jichakaia sa mizi ya Sodoma na Gomora, Adma na Zeboiimu iyo BWANA oreitoteshereghe kwa machu ghake na kubia kwake.

²⁴ Niko mbari rose richakotia, ‘Kwaki BWANA ujibonyere iji isanga huwu? Niki chishekerie machu ghake kukaia mabaa huwu?’

²⁵ Na wandu wichatumbulia, ‘Ni angu wandu waro werejisighieghe ilaghano ja BWANA, Mlungu wa weke ndee, ijo orebonyereghe nawo iji orewiredieghe kufuma isanga ja Misri.

²⁶ Wereidumikieghe na kuitasa milungu mizima wisereitasireghe jingi, iyo BWANA orewighirieghe wiseitase.

²⁷ Kwa huwo BWANA ukajokwa ni machu aighu ya iji isanga, ukajiredia njowe rose riandikilo andenyi ya chuo ichi.

²⁸ Niko BWANA ukawifunya isangenyi kwawo kwa machu na kubia na makai mabaa, ukawikumba noko cha isanga izima seji iko idime.’

²⁹ “Iro maza rivisikie ni ra BWANA Mlungu odu; ela iro rifunukulo, ni redu na wana wedu kwa kala na kala; eri dipate kubonya maza rose ra sharia ihi.