WUKUMBUSO 27 - Biblia Ilagho Jiboie Kwa Wandu Wose

Sharia ra Mlungu riandikilo aighu ya magho

¹ Niko Musa na waghosi wa Israeli wikawilaghira wandu wikighamba, “Wadienyi malaghiro ghose nimlaghiragha idime.

² Ituku mruwukagha Moda ghwa Jordani mngie ijo isanga BWANA Mlungu onyu umnekagha, mdunge magho mabaa, mughikabe lipu,

³ na kughiandika aighu yaro sharia iri rose na malaghiro. Kukameria kungia ijo isanga jinorie nandighi, ijo BWANA Mlungu onyu umnekagha, ijo orewilaghirieghe weke ndeyo.

⁴ Mkameria kuruwuka Moda ghwa Jordani, mdunge agho magho gha malagho namlaghira idime aighu ya Mghondi ghwa Ebali na kughikaba lipu.

⁵ Na aho mumuaghie BWANA Mlungu onyu madhabahu gha magho ghisewachilo na kilambo chingi cha chuma.

⁶ Mumuaghie BWANA Mlungu onyu madhabahu ya magho ghisewachilo, nenyo mchamfunyira BWANA Mlungu onyu vizongona vekora aighu yaro.

⁷ Mfunye vizongona va mapatano muvijie aho, na kuboilwa imbiri ya BWANA Mlungu onyu.

⁸ Agho malagho gha ihi sharia, mughiandikie aighu ya agho magho mwaghikaba lipu worinyi.”

⁹ Nao Musa na wakohani Walawi wikawizera Waisraeli wose, “Sikirenyi ee wandu wa Israeli: Idime mwawuya wandu wa BWANA Mlungu onyu;

¹⁰ kwa huwo mumsikire na kuwadia sharia rake rose nimnekagha idime.”

Njowe kwa wundu gholegha kusikira

¹¹ Niko Musa ukawilaghira wandu ijo ituku jeni ukighamba,

¹² “Mkameria kuruwuka Jordani, kichuku cha Simeoni, na cha Lawi, na cha Juda, na cha Isakari, na cha Josefu, na cha Benjamini, wichakaia kimusi aighu ya Mghondi ghwa Gerizimu kurasimia wandu.

¹³ Na kichuku cha Reubeni, na cha Gadi, na cha Asheri, na cha Zebluni, na cha Dani, na cha Naftali, wichakaia kimusi aighu ya Mghondi ghwa Ebali kwa wundu ghwa njowe.

¹⁴ Na Walawi wichawizera wandu wa Israeli wose kwa lwaka lubaa:

¹⁵ “‘Mundu ukabonya fwana ewacha angu echana, nacho ni kilambo chibonyero ni mikonu kwa wuya ghwa mundu, na kuwikwa kivisonyi, uwado ni njowe; iro ni maza rimzamiagha BWANA.’ Na wandu wose widikie, ‘Amen.’

¹⁶ “‘Mundu ukalegha kumneka ishima ndee angu mae, uwado ni njowe.’ Na wandu wose widikie, ‘Amen.’

¹⁷ “‘Mundu ukasoghora mwano ghwa mmbao, uwado ni njowe.’ Na wandu wose widikie, ‘Amen.’

¹⁸ “‘Mundu ukamlaghasha kitungure chia, uwado ni njowe.’ Na wandu wose widikie, ‘Amen.’

¹⁹ “‘Mundu ukailaghasha hachi ya mghenyi omara-mara, angu ya mwana mkiwa, angu ya muka mkiwa, uwado ni njowe.’ Na wandu wose widikie, ‘Amen.’

²⁰ “‘Mundu ukalala na mka-ndee, uwado ni njowe; angu wamsowia ndee ishima kwa kulaka na mkake.’ Na wandu wose widikie, ‘Amen.’

²¹ “‘Mundu ukalala na nyamandu iyo yose, uwado ni njowe.’ Na wandu wose widikie, ‘Amen.’

²² “‘Mundu ukalala na mruna wa waka, ikaigha ni mwai wa ndee, angu wa mae, uwado ni njowe.’ Na wandu wose widikie, ‘Amen.’

²³ “‘Mundu ukalala na mkekwake, uwado ni njowe.’ Na wandu wose widikie ‘Amen.’

²⁴ “‘Mundu ukam'bwagha mmbao kwa kiviso, uwado ni njowe.’ Na wandu wose widikie ‘Amen.’

²⁵ “‘Mundu ukatuwa uendebwagha mundu usene ikosa jingi, uwado ni njowe.’ Na wandu wose widikie, ‘Amen.’

²⁶ “‘Mundu ukaleghakatisha malagho gha ihi sharia kwa mabonyo, uwado ni njowe.’ Na wandu wose widikie, ‘Amen.’