WUKUMBUSO 24 - Biblia Ilagho Jiboie Kwa Wandu Wose

Kutana na muka na kulowua mzima

¹ “Mundu ukalowua muka, nao wilemane kwa kuleghaboilwa ni tabia rake, hata umuandikie barua etana nao na kumneka, uo muka uchafuma nyumbenyi kwake ughende.

² Konyuma ukaghenda na kulowolwa ni mundu mzima,

³ na uo mundu ulemane nao na kumuandikia barua etana nao na kumneka, uchafuma nyumbenyi kwake ughende. Angu kewada uo mundu ucheemlowua nanyuma waafwa,

⁴ uja mndwawomi wa imbiri ndedimagha kuwuyammbusa sena ukaie mkake nyuma ya kulushwa; kwa kukaia maza iro radamzamia BWANA. Kuseredie isanga kaung'a ijo BWANA Mlungu wako ukunekagha jikaie ifwa jako.

Sharia zima-zima

⁵ “Mundu ukalowua wokoni, useghende wudenyi, hata useneko kazi ingi, ela uleko ukaie mzinyi mwaka mlazi ukiboilwanya na mkake.

⁶ “Mndungi usewuse igho jesha kukaia wufunga; hata igho jaro ja ighu kwa wundu ghwa sile; ni kumghiria msile wake usekaie moyo.

⁷ Mundu ukawadwa ukiiwa mruna Muisraeli na kum'bonya mzumba, angu kumuuza, icho kitoi chibwagho. Na kwa chia iyo, mchaaghuinja ugho wuwiwi aghadi konyu.

⁸ “Iji kwawadwa ni wukongo ghwa sima, kulindie na ndighi kubonye seji kughorelwaghwa ni wakohani Walawi; koobonya woruwo sa iji koni nerewilaghirieghe.

⁹ Ririkanyenyi seji BWANA orem'bonyereghe Miriamu chienyi mkicha kufuma Misri.

¹⁰ “Iji kwamkopesha mmbenyu kindo icho chose, kusakengia nyumbenyi kwake kwendawusa wufunga ghwa kilambo wafunya.

¹¹ Wesera shighadi, na uo mundu kwamkopesha ukuredie ugho wufunga moni.

¹² Na ikakaia uo mundu ooka mkiwa, kusakelala na wufunga ghwake;

¹³ iruwa jikaneng'ena, kummbunjire wufunga ghwa nguwo yake ekumba eri ulale nayo kukurasimia. Ilagho ijo jichakubonya kutalo kukaia na hachi imbiri ya BWANA Mlungu wako.

¹⁴ “Kusakemkita mdumiki uko mkiwa usewadie kindo chingi; ngera ni umu wa wanyinyu Waisraeli angu mghenyi omara-mara uko isangenyi andenyi ya mizi yako.

¹⁵ Kumneke ifungu jake ijo ituku jeni iruwa jiseneng'enere; (angu uo ni mkiwa, najo nijo jeni wawuyajisuwiria;) usechemlilia BWANA aighu yako, na ilagho ijo jitalo kukaia kaung'a andenyi kwako.

¹⁶ “Wavi wisebwagho kwa wundu ghwa kaung'a ra wana, na wana wisebwagho kwa wundu ghwa kaung'a ra wavi; kula mundu ubwagho kwa wundu ghwa kaung'a rake moni.

¹⁷ “Kuselaghashe hachi ya mghenyi omara-mara, hata mwana mkiwa, hata kusewadie nguwo ya mka-mkiwa ikaie wufunga;

¹⁸ ela kumanye korekoghe mzumba Misri, na BWANA Mlungu wako ukakukombua kufuma aho; niko nawuyakulaghira kubonye huwo.

¹⁹ “Kukakuwida viro vako, nao kuliwe irio jimu mbuwenyi, kusewuye kwendajionda; ijo jiawuya ja mghenyi omara-mara, angu mwana mkiwa, angu mka mkiwa; eri BWANA Mlungu wako upate kukurasimia kwa kazi rako rose kubonyagha.

²⁰ Kukameria kuwaya zeituni rako, kusewurie indo ja kawi; iro rasighwa ni ra mghenyi omara-mara, na mwana mkiwa, na mka mkiwa.

²¹ Kukameria kuwaya zabibu rako mbuwenyi kwako, kusakewuria indo ja kawi; iro rasigharika ni ra mghenyi omara-mara, na mwana mkiwa, na muka mkiwa.

²² Kumanye angu korekoghe mzumba isanga ja Misri, niko nawuyakulaghira kubonye huwo.