WUKUMBUSO 23 - Biblia Ilagho Jiboie Kwa Wandu Wose

Kutanywa na wandu wa Mlungu

¹ “Mndungi ukabikie sitima, angu kukaia na mumbi ghwa womi ghudumbukie, usengie ikwanyikonyi ja wandu wa BWANA.

² “Mundu uvailo shighadi angu mndungi wa kivalwa chake, usengie ikwanyikonyi ja wandu wa BWANA; hata kuvikia kivalwa cha ikumi usengie.

³ “Muamoni ungi angu M'moabu, usengie ikwanyikonyi ja wandu wa BWANA hata kivalwa cha ikumi, mndungi wawo jingi usengie;

⁴ angu wiseremmareghe na vindo na machi iji morechieghe kufuma Misri, na kwa kukaia weremmbangieghe Baalamu mwana wa Beori kufuma Pethori ya Mesopotamia, uchembwasira njowe, eri wimlipe.

⁵ Elaima BWANA Mlungu nderemsikireghe Balaamu; ela ukaghalusa njowe ikawuya marasimio konyu angu BWANA Mlungu onyu oremkundieghe.

⁶ Jingi kuselole sere nawo hata kuwilolia mecha ghangi irangi jenyu jose.

⁷ “Kusakezamilwa ni Muedomu angu ni mwanyinyu. Kusakezamilwa ni Mmisri, angu korekoghe mghenyi omara-mara isangenyi kwake.

⁸ Wana wa kivalwa chawo cha kadadu wadima kungia ikwanyikonyi ja BWANA.

Kuwika kambi ya ijeshi ielie

⁹ “Iji kuko kambinyi ngelo ra wuda, kukutanye na kula ilagho jidimagha kukulusha.

¹⁰ “Iji mndungi walala na kukulusha kwa kufumwa ni mbeu rake uko ndodonyi nakio, usekaie kambinyi.

¹¹ Luma lwa kenyi, ukuoghoshe; hata iji iruwa janeng'ena, wadima kuwuya kambinyi.

¹² “Kukuboisire wulalo ghokutesia shighadi ya kambi.

¹³ Kukudwaieghe kibolo chiaimweri na maswagha ghako; eri iji kwakakutesia shighadi, kukote kina kukutesie aho; konyuma kusirie wuchafu ghwako.

¹⁴ Kwa kukaia BWANA Mlungu wako wadasela aghadi ya kambi yako, kukukira na kukubonya kuwisime wamaiza wako, suti kambi yako ikaie ielie; usechewona kindo chingi chiseboie aghadi yako, na kukusigha.

Sharia zima-zima

¹⁵ “Mzumba ukakimbia kufuma kwa bwana wake na kukuchea, kusakemmbunja.

¹⁶ Kumsighe ukaie aghadi kwako, andu uko kose uchaakusaghua andenyi ya ghumu ghwa mizi yako ughuwonagha kukaia ghwamfwane kuchumba; sena kusemkoronge.

¹⁷ “Muisraeli ungi wa waka angu wa womi, usekubonye ilaya ja hekalunyi retasa milimu.

¹⁸ Kuserede pesa ringi Hekalunyi kwa BWANA Mlungu wako rafunywa ni ilaya ja waka angu ja womi wei richelipwa kwa wundu ghwa ighemi ijo jose; angu malaya agha ghose ghadamzamia BWANA Mlungu wako.

¹⁹ “Kusekopeshe mwanyinyu Muisraeli kwa wundu ghovara fwaida; ikaiagha ni pesa angu vindo, angu kilambo icho chose chevarwa fwaida.

²⁰ Kwadima kumkopesha mghenyi kwa kuvara fwaida; eri BWANA Mlungu wako upate kukurasimia kwa maza rose kubonyagha andenyi ya isanga ijo kwawuyangia kujiwusa.

²¹ “Mkabonya ighemi kwa BWANA Mlungu onyu, msemuke luma kujilipa; kwa kukaia loli BWANA Mlungu onyu uchajilawia, na mkakaia luma, yadima iwuye kaung'a konyu.

²² Ela mkakaia kusebonyagha ighemi jingi, ndemchaatalilwa kaung'a ingi anduangi.

²³ Mlindie kukatisha malagho mwaghideda, kwa kukaia mooghema mmbeni kwa BWANA Mlungu onyu.

²⁴ “Kukaida aghadi ya mbuwa ya mmbenyu ya mizabibu, kwadima kuja zabibu seji kudimagha, ela kusekumbirie ringi kikapunyi.

²⁵ Kukaida aghadi ya mbuwa ya mmbenyu iko na viro visedemelo, kwadima kudema vanga na mkonu ela kusedeme viro va mmbenyu na mundu.