WUKUMBUSO 2 - Biblia Ilagho Jiboie Kwa Wandu Wose

¹ “Niko dikaghaluka, na kudamba cha kireti chia ya Bahari ya Shamu, seji BWANA orenizerieghe; na kwa matuku mengi, derekoghe dikighumara mghondi ghwa Seiri.

² Nao BWANA ukanizera,

³ kukaia daghumara ughu mghondi luma koni, dighaluke cha kaskazinyi.

⁴ Ukanilaghira nimzere, ‘Moko kaavui kuida ghadi na ghadi ya isanga ja wanyinyu kivalwa cha Esau, awa wikaiagha Seiri, nawo wichamuobua. Kwa huwo mkulindie nandighi

⁵ msakelwa nawo; angu sichaamneka ndoe ingi yawo, hata edima kuwikiria lwau. Namerie kumneka Esau mghondi ghwa Seiri ghukaie ghwake.

⁶ Mchaghua vindo vose kwa pesa kufuma kwawo mpate kuja, na machi wori mchaghua kwa pesa kufuma kwawo mpate kunywa.’

⁷ “BWANA Mlungu onyu wamerie kumrasimia kwa kazi rose mwawuyabonya, waichi seji mghendagha aghadi ya ichi kireti kibaa; miaka ihi yose mirongo ina, BWANA Mlungu onyu orekoghe andwamweri nenyo; hata ndemsowie kindo chingi anduangi.

⁸ “Niko dikaghenda imbiri, dikiidia kula na wanidu icho kivalwa cha Esau, awo wikaiagha Seiri; dikasigha chia ya Araba ifumagha Elathi ikiidia Ezion-geberi. Dikaghaluka cha Moabu.

⁹ BWANA ukanizera ‘Msakewisumbua Wamoabu hata msakelwa nawo, angu sichaamneka ndoe ingi yawo muiwuse, kwa kukaia Ari namerie kuineka kivalwa cha Loti ikaie yawo.’”

¹⁰ (Waeni niwo werekoghe aho kala, wandu wabaa wiko wengi na walacha sa Waanaki;

¹¹ awo Waanaki wedemanyika sa Warefai, ela Wamoabu wadawiwanga Waemi.

¹² Na Wahori wori werekoghe wikikaia Seiri kala, ela kivalwa cha Esau wikawisoka; wikawitotesha na kukaia aho weni, sa iji koni Waisraeli werebonyereghe isangenyi kwawo ijo BWANA orewinekieghe).

¹³ “Niko dikaruwuka kamoda ka Zeredi sa iji koni BWANA oredizerieghe.

¹⁴ Kufuma difumie Kadesh-barnea hata kuruwuka kamoda ka Zeredi, erekoghe miaka mirongo idadu na wunyanya; hata kivalwa chose cha wandu weghenda wudenyi chikasia putu kambinyi sa iji koni BWANA orekoghe wawighemia.

¹⁵ Na loli BWANA orekoghe ukilwa nawo kambinyi, hata ukameria kuwitotesha putu.

¹⁶ “Nao iji wandu wa wuda wameria kufwa na kutota aghadi ya wandu,

¹⁷ BWANA ukanizera,

¹⁸ ‘Idime mchaida mwano ghwa Wamoabu aja Ari;

¹⁹ iji mwalighisa kuvika mwano ghwa kivalwa cha Amoni, msakewisumbua hata msakelwa nawo angu sichaamneka ndoe ingi yawo muiwuse, kwa kukaia namerie kuineka kivalwa cha Loti.’”

²⁰ (Ijo isanga najo wori, jedemanyika kukaia ja Warefai, nawo wedeeka wikikaia aho kala, ela Waamoni wadawiwanga Wazamzumi.

²¹ Awo wandu werekoghe wabaa sena wengi, nawo werekoghe walacha sa Waanaki; ela BWANA ukawitotesha, na Waamoni wikawisoka ijo isanga na kujikaia weni;

²² sa iji koni orebonyereghe kwa kivalwa cha Esau awo wikaiagha Seiri, ingelo oretoteshagha Wahori, na kivalwa cha Esau chikawisoka ijo isanga na kujikaia weni hata idime.

²³ Na Waavi werekoghe wikikaia mizi mitini-mitini hata kuvika Gaza; weretotesheroghe ni Wakirete wifumie Krete, na awo Wakirete wikakaia isangenyi weni.)

²⁴ “Diendaida Moabu, BWANA ukadizera, ‘Wukenyi mmbwade charo chenyu, mruwuke vololo ya Arnoni; olenyi namneka Sihoni Muamori, uo mzuri wa Heshboni chiaimweri na isanga jake; jiwadenyi mzoe kulwa nawo.

²⁵ Idime niko nizoyagha kungira kiture na wowa kwa wandu wose wimuobuo inyo; kula andu wichaasikira malagho ghenyu, wichasughusika na kukaia na wasi kwa wundu ghonyu.’

Waisraeli kumsima mzuri Sihoni

²⁶ “Niko neredumieghe wadumwa kufuma kireti cha Kedemothi kwa mzuri wa Heshboni na malagho gha sere ngighamba,

²⁷ ‘Nisighe niide aghadi ya isanga jako; nichaghenda na chia cheni hata sichaaghaluka nisighe chia anduangi.

²⁸ Vindo veja na machi ghenywa dighua kwako, ela kudisighe tu diidie isangenyi kwako,

²⁹ hata dameria kuruwuka moda ghwa Jordani, na kungia ijo isanga BWANA Mlungu udinekagha. Huwo niko wandu wa kivalwa cha Esau awo wikaiagha Seiri, na Wamoabu, awo wikaiagha Ari, weredibonyereghe.’

³⁰ “Ela Sihoni mzuri wa Heshboni, ukadileghia diseide kaavui na isanga jake, angu BWANA Mlungu onyu oreikurishireghe ngolo yake, ukang'eta; eri upate kudibonya dimsime seji iko idime.

³¹ BWANA ukanizera, ‘Olenyi namfunyira Sihoni na isanga jake mumsime, idana zoenyi kujiwusa mpate kujikaia.’

³² Niko Sihoni na wandu wake wose wikacha kulwa nesi aja Jahazi.

³³ Nao BWANA Mlungu odu ukamfunya Sihoni na wana wake, na wandu wake wose dikawisima.

³⁴ Nesi dikaiwada mizi yake yose mibaa ngelo ija na kunona-nona kula muzi; womi, waka, na wanake; hata ndederesighieghe kindo chingi anduangi.

³⁵ Ela mfugho riekeri, na vilambo ivo dereviwadieghe mizinyi, nivo dereviwusireghe.

³⁶ Ndekuwadie muzi ghoredilemieghe. Kufuma Aroeri, muzi ghuko mdonyi ghwa vololo ya Arnoni, na kufuma muzi m'baa ghuko vololonyi, hata Gileadi, BWANA Mlungu odu oredinekieghe yose.

³⁷ Andu koni diserekusoghodereghe kaavui ni isanga ja Waamoni jiko mbai-mbai ya moda ghwa Jaboki kose, na mizi ya isanga ja mghondinyi, na andu kuzima kose BWANA Mlungu odu oredikanieghe diseghende.