WUKUMBUSO 18 - Biblia Ilagho Jiboie Kwa Wandu Wose

Iwaghio ja wakohani

¹ “Wakohani wiko kichuku cha Walawi, ndewichaakaia na ifungu angu ifwa jingi ja isanga andenyi ya Israeli, ela wichakaia wikija vizongona vekora na mafunyo ghose ghifunywagha kwa BWANA.

² Awo ndewichaakaia na ifwa jingi ja isanga aghadi ya waruna; BWANA nuo ifwa jawo sa iji koni orewilaghirieghe.

³ “Wandu wikafunya vizongona va ng'ombe angu ng'ondi, wakohani wichanekwa mawoko, na nyama ya mizu, na vindo va ndenyi.

⁴ Wokoni wichapata mavalo gha imbiri gha viro venyu, na divei, na mavuda, na mafuri gha imbiri ghidumbulwagha gha chagha cha ng'ondi renyu.

⁵ Angu BWANA Mlungu onyu wasaghue kichuku cha Lawi chibonye wudumiki ghwa wukohani kwa kala na kala.

⁶ “Mlawi ukacha kufuma andu ukaiagha andenyi ya muzi ghungi ghwa mizi enyu ya Israeli, nao ukunde moni kutasa andu BWANA ukusaghue kukaie komtasira,

⁷ wadima kumdumikia BWANA Mlungu wake aho karakara na waruna Walawi awo widumikagha imbiri ya BWANA.

⁸ Wichawagha vindo karakara hata ngera wawuyapata pesa kufuma kwa vilambo vake viuziro.

Maonyo aighu ya mizango ya kisezi

⁹ “Iji mwangia isangenyi ijo BWANA Mlungu onyu umnekagha, msenughe mizango izamie ya iro mbari.

¹⁰ Mndungi onyu usewoneke ukimfunya mwana wake wa womi angu wa waka kizongona kwa kumuisa aghadi ya modo, angu mndungi ulaghuagha,

¹¹ angu mundu obonyera wandu mbingu, angu mundu odedanya na roho ra wandu wifue angu msawi, angu mundu olomba wafu.

¹² Kwa kukaia uo ubonyagha maza iri, wadamzamia BWANA; na kwa wundu gha mizango ihi izamie, niko BWANA Mlungu onyu wawuyawiwinga awo wandu imbiri enyu.

¹³ Msekaie na ikosa jingi imbiri ya BWANA Mlungu onyu.”

Ilaghiro jedumirilwa mlodi

¹⁴ Niko Musa ukaghamba, “Isanga mwalighisa kujiwusa wandu waro wadanugha njama ra wasawi na walaghui. Ela BWANA Mlungu onyu ndemrumirie kubonya huwo anduangi.

¹⁵ BWANA Mlungu onyu uchammbusiria mlodi ufumagha aghadi ya wanyinyu uko sa ini; mumsikire.

¹⁶ “Ituku morekwanyikieghe aja Mghondi ghwa Sinai, morelombieghe msewuesikira BWANA ukideda sena, hata kuwona ulo lumu lwa modo mchefwa.

¹⁷ BWANA ukanizera, ‘Waghora nicha.

¹⁸ Nichawiwusiria mlodi ufumagha aghadi ya waruna uko sa oho, nani nichamghoria malagho ghapo, agho uchaawighoria.

¹⁹ Mundu uchaalegha kusikira malagho gha uo mlodi namduma, nichamkaba.

²⁰ Ela uo mlodi ukubonyagha moni kughora ilagho japo nisemdumie, angu kughora kwa irina ja milungu mizima, suti ufo.’

²¹ “Mwadima kutambika ngera mchammanya wada uo mlodi usedumilo ni BWANA?

²² Iji mlodi waghora kwa irina ja BWANA, na ilagho ijo jaghorwa jileme kukatia, ijo ilagho ndejighorelo ni BWANA kungi; uo mlodi ookubonya moni kughora ijo ilagho; msemuobuo.