WUKUMBUSO 15 - Biblia Ilagho Jiboie Kwa Wandu Wose

Mwaka ghwa mfungade

¹ “Kutua kwa kula mwaka ghwa mfungade, mleke kulawia sile.

² Mcharileka huwu: Kula mundu umkopeshere mmbao Muisraeli uchaleka kumlawia; usewuemlawia mruna Muisraeli sena, kwa kukaia BWANA wamerie kutangaza sile rilekelo.

³ Mghenyi wadima kukuwunjira; ela icho chose chiko na mwanyinyu Muisraeli koochilekia.

⁴ “BWANA Mlungu onyu uchamrasimia andenyi ya ijo isanga wawuyamneka. Ndekuchaakaia na mkiwa ungi konyu

⁵ iji mwasikira agho BWANA Mlungu onyu umghoriagha, na kulindia kukatisha agho malaghiro ghose nimlaghiragha idime.

⁶ BWANA Mlungu onyu uchamrasimia seji umlaghirie, nenyo mchakopesha mbari nyingi, ela inyo ndemchaakopa. Mcharibonyera nguma mbari nyingi, ela iro nderichaam'bonyera nguma.

⁷ “Kukakaia na mwanyinyu ungi Muisraeli andenyi ya muzi ghungi ghwa isanga mwawuyanekwa ni BWANA wakaia mkiwa kumtesie; kusemkurishire ngolo yako.

⁸ Kumneke, sena kumkopeshe vikate seji ukunde.

⁹ Kulindie kusekaie na maghesho gheleghamtesia angu mwaka ghwa mfungade gholekia sile ghuko kaavui, ukamlilia BWANA kwa wundu ghwako, ichakaia ni kaung'a kwako.

¹⁰ Kumneke duu kwa ngolo yose; angu kwa ilagho iji, BWANA Mlungu wako uchakurasimia kwa kazi rako rose kuribonyagha.

¹¹ Jingi ndemsowagha wamu Waisraeli isangenyi; kwa huwo namlaghira mkaie na ngolo ndicha eneka wandu wasowekelwa.

Chia ewilekeria wazumba

¹² “Mwanyinyu Muisraeli, ukaiagha wa womi angu wa waka ukauzwa kwako, uchakudumikia kwa miaka irandadu, ela mwaka ghwa mfungade, kumlekerie ughende.

¹³ Kukakamlekeria, kusemlekerie ughende mikonu miduu;

¹⁴ kumneke kwa ngolo icho chose BWANA Mlungu wako ukurasimie nacho ngera ni ng'ondi, viro, angu divei.

¹⁵ Kumbukenyi angu nenyo wori morekoghe wazumba isanga ja Misri, na BWANA Mlungu onyu ukamkombua; niko nawuyakulaghira huwo idime.

¹⁶ Ela mzumba wako ukaghamba ndekunde kukusigha angu ukukunde oho na nyumba yako, ukiwona seji mkanye nicha,

¹⁷ kuwade kilambo cheturua, nao kumdo mnyangonyi na kumturua kudu; nao uchakaia mzumba wako matuku ghose. Kubonye wokoni kwa mzumba wako wa waka.

¹⁸ Kusakekurilwa ni kumlekeria angu ukudumikie miaka irandadu, kwa kukaia wudumiki ghwake ghorekoghe mando awi ya gharama ra mafungu. Kwa wundu ugho, BWANA Mlungu wako uchakurasimia kwa maza rose kubonyagha.

Wavalwa wa imbiri wa ng'ombe na ng'ondi

¹⁹ “Wavalwa wa imbiri wose wa ng'ombe na ng'ondi rako, kuwiwikie mbai kwa wundu ghwa BWANA Mlungu wako; wavalwa wa imbiri wa ng'ombe rako, kusewibonyeshe kazi; hata wavalwa wa imbiri wa ng'ondi rako, kusewidumbuo mafuri.

²⁰ Kuwijeghee kula mwaka imbiri ya BWANA Mlungu wako oho na nyumba yako andu BWANA uchaakusaghua kukaie.

²¹ Ela awo wavalwa wa imbiri, ungi ukakaia na itiko jingi, ngera ookelemia angu kufwa meso, angu itiko jingi ijo jose jizamie, kusemfunye kizongona kwa BWANA Mlungu wako.

²² Kumje mzinyi kwako; mundu uelie na useelie wadima kumja seji koni udimagha kuja shaa angu sarigha.

²³ Bora tu kuseje bagha yake; iyo, kuidie andonyi sa machi.