WUKUMBUSO 14 - Biblia Ilagho Jiboie Kwa Wandu Wose

Mizango elila ifwa kughirilwa

¹ “Inyo mo wandu wa BWANA Mlungu onyu; mkakalila ifwa, msekudeme angu kuara maridia ghenyu sa wandu wazima.

² Inyo mo wandu wa BWANA Mlungu onyu; wamsaghue aghadi ya wandu wose wa ndoenyi, mkaie wandu wake moni.

Nyamandu rielie na riseelie

³ “Kuseje kilambo chingi chighirilo ni BWANA.

⁴ Mwadima kuja iri nyamandu: ng'ombe, ng'ondi, mburi,

⁵ sarigha, shaa, domu, tamae, na ra kichuku cha sarigha, na ra kichuku cha ng'ondi.

⁶ Kula nyamandu iko na kochokocho ribarikie na kuwaghika nayo yakeragha, mwadima kuja.

⁷ Ela mseje iri nyamandu hata ngera rakeragha na kukaia na kochokocho: ngamila, kwaru, na njiwu; angu rikeduaka rikeragha, ela kochokocho raro nderibarikie na kuwaghika; kwa huwo nderielie konyu.

⁸ Na nguwe, angu iko na kochokocho ribarikie na kuwaghika, ela isekeragha, ndeielie konyu. Mseje nyama yaro hata mseadade gharia raro.

⁹ “Nyamandu rose riko baharinyi, muje iri riwadie mapezi na makoko;

¹⁰ iri risewadie mapezi na makoko mseje; nderielie konyu.

¹¹ “Nyonyi rose rielie, mwadima kuja.

¹² Ela iri mseje: indu, nderi, mbungu,

¹³ luwighi na vichuku vose va wangoju;

¹⁴ kula kichuku cha ngorusa,

¹⁵ nyagha, mbeghu-mbeghu na vichuku varo;

¹⁶ mavui mtini na mavui m'baa, na mnyange;

¹⁷ nyonyi zima rose rijagha gharia na vichuku varo,

¹⁸ machachula na vichuku varo; na maososi.

¹⁹ Wadudu wose wiko na mbawa ndewielie konyu; wisejigho.

²⁰ Vilambo vose viko na mbawa vielie mwadima kuja.

²¹ “Mseje kindo chingi chifue cheni; mwadima kuchineka wandu wa kighenyi wiko mizinyi konyu wije, angu muuzire wandu wa kighenyi; kwa kukaia inyo mo wasaghulwa wa BWANA Mlungu onyu. Kusedoghose ndaghina andenyi ya mariwa gha mae.

Sharia ya ifungu ja ikumi

²² “Kufunye ifungu ja ikumi ja vindo vako vose va mbuwenyi kupatagha kula mwaka.

²³ Ijo ifungu ja ikumi ja viro vako na divei na mavuda, na wavalwa wa imbiri wa mfugho rako na ng'ondi, kuchajijia andu uko kose BWANA Mlungu wako uchaasaghua kukaie andu komtasira; eri kupate kukufundisha kumuobua BWANA Mlungu wako kari kose.

²⁴ Na ikakaia andu kwaro kooka kula, kusedimagha kughenja ifungu jako ja ikumi, ja ivo vindo BWANA Mlungu wako ukurasimie navo,

²⁵ kuviwunje pesa, kurifunge na kurighenja andu BWANA Mlungu wako usaghue kukaie komtasira.

²⁶ Kukaghenda, kutumie iro pesa seji koni ngolo yako ikunde; kughuo ng'ombe, angu ng'ondi, angu divei, angu chofi ibirie seji koni ngolo yako ikunde, nao kuje ajaeni imbiri ya BWANA Mlungu wako kuboilo oho na wandu wa nyumbenyi kwako.

²⁷ “Ela kuseliwe Mlawi uko mzinyi kwako; kwa kukaia uo ndewadie ifungu hata ifwa jingi chiaimweri na oho.

²⁸ Kutua kwa kula miaka idadu, kurede mzinyi kwako ifungu jako ja ikumi ja ugho mwaka na kujiwika nganyenyi;

²⁹ Mlawi, angu uo usewadie ifungu hata ifwa jingi chiaimweri na oho, na waghenyi wemara-mara, na wana wisewadie weke ndee, na waka wakiwa awo wiko mizinyi konyu wichacha wije na kughuda; eri BWANA Mlungu wako upate kukurasimia kwa kazi rako rose kuribonyagha.