WUKUMBUSO 12 - Biblia Ilagho Jiboie Kwa Wandu Wose

Andu kotasira kumweri

¹ “Iri niro sharia na malaghiro imfwane mlindie kughikatisha andenyi ya ijo isanga BWANA Mlungu wa weke ndeyo umnekie kujiwusa ngelo rose mchaakaia ndoenyi.

² Mnone andu kose kotasira milungu kwa awo wandu mchaawisoka isanga; aighu ya mighondi iko ighu, na mighondi mitini, na aisi ya kula mudi ghuko na malemba mawishi.

³ Mrivuchuo madhabahu rawo, na kurichikanya nguro rawo vipande-vipande; mkore mlungu ghwawo ghwa waka Ashera, na kurikua fwana ra milungu yawo, risewuetaswa aho sena.

⁴ Inyo msetase BWANA Mlungu onyu seji awo wibonyagha.

⁵ Ela mchalola wulalo andu BWANA Mlungu onyu uchaakusaghua kufumanya na vichuku venyu vose, upate kukubonya kukaia andu komtasira;

⁶ na aho mchareda vizongona venyu vekora, na vizongona venyu vizima, na ifungu jenyu ja ikumi, na malipo ghefungua ighemi, na mafunyo gha kukunda kwa ngolo; wavalwa wa imbiri wa mfugho renyu na wa wana wa ng'ondi.

⁷ Aho mchaja imbiri ya BWANA Mlungu onyu, nenyo mchaboilwa chiaimweri na nyumba renyu kwa wundu ghwa agho ghose m'bonyagha, kwa agho BWANA Mlungu onyu umrasimie.

⁸ Ndemchaabonya seji dawuyabonya aha idime, kula mundu ukibonya ijo jim'boiagha moni;

⁹ angu ndemvikie kuhora na kupata ifwa ijo BWANA Mlungu onyu umnekagha.

¹⁰ Ela iji mwaruwuka Jordani, na kukaia andenyi ya isanga ijo BWANA Mlungu onyu umnekagha kukaia ifwa jenyu, na iji wamneka kuhora msesumbulwagha ni wamaiza wenyu mbai mbai, nenyo mkaie na sere,

¹¹ niko mchaareda ivo vose namghoria, andu BWANA Mlungu onyu uchaasaghua kukaie andu komtasira: mafunyo ghenyu ghekora, na vizongona venyu vizima, na ifungu jenyu ja ikumi, na mafunyo ghenyu mredagha kwa ngolo, na malipo ghenyu gha ighemi mghemie kwa BWANA.

¹² Nenyo mchaboilwa imbiri ya BWANA Mlungu onyu; chiaimweri na wana wenyu wa womi na wa waka, na wadumiki wenyu wa womi na wa waka, na Mlawi uko mzinyi konyu uo usewadie ifungu angu ifwa jingi ja isanga chiaimweri nenyo.

¹³ Mlindie msefunye vizongona venyu vekora andu mkusaghuyagha mmbeni,

¹⁴ ela mfunye vizongona venyu andu BWANA uchaakusaghua kwa kichuku chimu cha mzenyu, na aho mchabonya ghose nimlaghiragha.

¹⁵ “Elaima mwadima kubwagha nyamandu renyu na kuja andu uko kose mizinyi konyu seji mdimagha, kunughana na seji mrasimilo ni BWANA; wandu wielie na awo wiseelie wadima kuja seji wijagha shaa na sarigha.

¹⁶ Bora tu mseje bagha; muidie andonyi seji koni mdiagha machi.

¹⁷ Mseje ifungu jenyu ja ikumi mizinyi konyu; jikaiagha ja viro angu ja divei, angu ja mavuda, angu ja wavalwa wa imbiri wa mfugho angu ng'ondi angu malipo ghangi gha ighemi, angu makuwio ghako, angu mafunyo agho mredagha kwa kukunda.

¹⁸ Ela mchaja imbiri ya BWANA Mlungu onyu, andu uchaakusaghua; mchaja oho, na mwana wako wa womi na wa waka, mdumiki wako wa womi na wa wa waka, na Mlawi mkwanye; nenyo mchaboilwa nandighi imbiri ya BWANA Mlungu onyu, kwa maza rose muribonyagha.

¹⁹ Manya kusemliwe Mlawi irangi jako jose kuko isangenyi kwako.

²⁰ “Iji BWANA Mlungu wako wajichuria isanga jako seji ukulaghirie, nao kuwado ni bea ya nyama, kwadima kuja seji kudimagha.

²¹ Ikakaia andu kusaghulo ni BWANA Mlungu wako kukaie komtasira kooka kula na oho, kwadima kubwagha imu ya mfugho rako angu ng'ondi rako iro BWANA Mlungu wako ukunekie, sa iji koni nikulaghirie; kwadima kuja seji kukunde mizinyi kwako.

²² Kuje sa iji koni shaa angu sarigha ijighwagha; mundu uelie na useelie wose wadima kuja.

²³ Bora tu kukaie na loli ndekujagha bagha; angu bagha ni irangi, na oho kuseje irangi chiaimweri na nyama.

²⁴ Kuseje bagha; kooidia andonyi sa machi.

²⁵ Iji kwabonya nicha imbiri ya BWANA kwa kulegha kuija, kuchawona nicha na kivalwa chako.

²⁶ Ela kukakafunya vilambo vose vieleshero, na malipo ghako gha ighemi, kughighenje andu kotasira kusaghulo ni BWANA;

²⁷ kufunye vizongona vako vekora va nyama na bagha aighu ya madhabahu ya BWANA Mlungu wako. Bagha ya kizongona chako, ichadilwa madhabahunyi ya BWANA Mlungu wako, ela nyama kwadima kuija.

²⁸ Lindia, kusikire malagho ghose agha nikulaghiragha; kukabonya nicha imbiri ya BWANA Mlungu wako, kuchakaia na kuboilwa oho, na kivalwa chako kwa kala na kala; angu kuchakaia kukibonya agho ghiko gha hachi, ghim'boiagha BWANA Mlungu wako.

Maonyo aighu ya kutasa milimu

²⁹ “BWANA Mlungu wako ukameria kuriinja imbiri enyu iro mbari mchaarisoka isanga, mkameria kurisoka na kukaia andenyi yaro,

³⁰ mkulindie msewado ni mdegho ghosunga wutasi ghwawo nyuma ya awo kutoteshwa imbiri konyu; hata msekotie malagho gha milungu yawo seji itaswagha, wei na inyo mtase woruwo.

³¹ Msebonye huwo kwa BWANA Mlungu onyu; kwa kukaia iro maza rose rimzamiagha BWANA Mlungu wako, niro reni wiribonyeragha milungu yawo; hata wadaifunyira wana wawo wa womi na wa waka kizongona kwa kuwikora modonyi.

³² “Lindia m'bonye maza rose nicha, seji namlaghira; msechurie hata kupunguza ilagho jingi.