WUKUMBUSO 11 - Biblia Ilagho Jiboie Kwa Wandu Wose

Kumkunda na kumsikira

¹ “Mumkunde BWANA Mlungu onyu, na kuwadia sharia rake rose.

² Kumbukenyi agho mukufundishire idime aighu ya BWANA kunughana na agho mughiwonie gha ndighi na kudima kwake,

³ na awo weke mwakilimbiti. Mwawonie mabonyo ghake kwa mzuri wa Misri, na seji ubonyere isangenyi jake jose.

⁴ Morewonieghe maza oreribonyereghe kwa majeshi gha Misri; farasi rawo na magare ghawo seji gheremilikieghe andenyi ya machi gha Bahari ya Shamu ingelo weremnughagha.

⁵ Maza um'bonyere kireti hata mkacha andu aha.

⁶ Mwawuyakumbuka seji BWANA orewibonyereghe Dathani na Abiramu wadawana wa Eliabu mwana wa Reubeni, seji ndoe erebarikieghe na kuwimila, chiaimweri na wandu wawo na hema rawo, na kula kindo chiko moyo cherenughaneghe nawo aghadi ya Waisraeli wose.

⁷ Inyo mwamerie kuwona na meso ghenyu kazi mbaa ya BWANA oreibonyereghe.

Marasimio gha Isanga ja Ilaghiro

⁸ “Kwa huwo, mughiwadie malaghiro ghose nimlaghiragha idime, mpate kukaia na ndighi reruwuka Jordani na kujiwada ijo isanga mwendaajiwusa.

⁹ Nenyo mpate kukaia moyo matuku mengi isangenyi ijo BWANA orewilaghirieghe weke ndeyo kukaia uchawineka chiaimweri na kivalwa chawo, isanga jinorie nandighi.

¹⁰ Angu ijo isanga mngiagha kujiwada ndejifwanane na isanga ja Misri aho mfumie; andu morekoghe mkiwa mbeu na kurinyoshera machi sa mbuwa ya mbogha;

¹¹ ela ni isanga ja mighondi na vololo jinywagha machi kwa vua ifumagha mlungunyi;

¹² ni isanga jilindilwaghwa ni BWANA Mlungu onyu, nao wadajizighana kufuma kuzoya kwa mwaka hata kutua kwaro.

¹³ “Na inyo mkasikira malaghiro na kumkunda BWANA Mlungu onyu na kumdumikia kwa ngolo renyu rose, na kwa roho renyu rose, seji nimlaghiragha idime,

¹⁴ uchanyesha vua kunughana na vimu varo; vua ya sumesu na vua ya kwari; mpate kukuwida viro venyu, divei na mavuda ghenyu.

¹⁵ Nao uchazoghora nyasi kwa wundu ghwa mifugho renyu, nenyo mchaja na kughuda.

¹⁶ Mkulindie, ngolo renyu risechekalikia na kughaluka na mbai kuidumikia milungu mizima na kuitasa,

¹⁷ machu gha BWANA ghicheaka aighu konyu, na kufunga vua isenye, hata ndoe isowe mavalo; nenyo mtote shwa-shwa na kusoweka andenyi ya isanga icha ijo BWANA umnekagha.

¹⁸ “Kwa huwo mughiwike malagho ghapo ngolonyi konyu na akilinyi konyu, nenyo mughifunge vikotonyi konyu, na chamunyi konyu eri mughikumbukeghe.

¹⁹ Mughifundishe wana wenyu, muje malagho aighu yaro iji muko kidombo nyumbenyi konyu, na mkighenda chienyi, na ngelo mwaka akandonyi, na ngelo mwawuka.

²⁰ Mughiandike vizingitinyi va minyango ya nyumba renyu, na mbengenyi konyu;

²¹ eri matuku ghenyu na gha wana wenyu ghipate kuchurikia isangenyi ijo BWANA orewilaghirieghe weke ndeyo kukaia uchawineka; wikaie aho matuku ghose mlungunyi kukikaia naighu ya ndoenyi.

²² “Mkalindia kumkunda BWANA Mlungu onyu, kughenda kwa chia rake rose, na kukusaghika nao, seji nimlaghiragha m'bonye,

²³ niko BWANA uchaariwinga mbari iri rose imbiri konyu, nenyo mcharisoka isanga; mbari riko mbaa, riwadie ndighi kumchumba.

²⁴ Kula andu mchaawadia na chwau renyu kuchawuya konyu; isanga jenyu jichakaia kufuma icho kireti cha kusinyi, hata Lebanoni, na kufuma ugho moda ghwa Eufrate, hata bahari ya Mediterania.

²⁵ Ndekuwadie mndungi uchaadima kumtangala; BWANA Mlungu onyu uchangira wandu wowa na kiture chemuobua inyo kula isanga mchaajiwadia; sa iji koni oremlaghirieghe.

²⁶ “Olenyi, nawika imbiri konyu idime irasimio na njowe.

²⁷ Iji mwasikira malaghiro gha BWANA Mlungu onyu nimlaghiragha idime mcharasimilwa.

²⁸ Ela mkalegha kughisikira malaghiro gha BWANA Mlungu onyu, na kuleghanugha iyo chia nimlaghiragha idime, nao mnughe milungu mizima mseiichi, mchawadwa ni njowe.

²⁹ Iji BWANA Mlungu onyu wamreda ijo isanga mwawuyangia kujiwusa, mchafunya irasimio kukikaia aighu ya Mghondi ghwa Gerizimu, na njowe kukikaia aighu ya Mghondi ghwa Ebali.

³⁰ (Iyo mighondi iwi eko Moda ghwa Jordani nakimonu cha magharibi, isanga ja Wakanaani wikaiagha Vololo ya Jordani kaavui na ghuja mwaloni ghueleshero ghwa More, kaavui na muzi ghwa Gilgali.)

³¹ Mcharuwuka Jordani mngie kujiwada ijo isanga BWANA Mlungu onyu umnekagha. Mkameria kujingia na kukaia aho,

³² mlindie kukatisha sharia rose na malaghiro, agho nimghoriagha idime.