WUKUMBUSO 1 - Biblia Ilagho Jiboie Kwa Wandu Wose

Malagho Ghezoya

¹ Chuo ichi cheko na malagho gha Musa orewijieghe Waisraeli wose iji werekoghe kireti, mashariki ya Moda ghwa Jordani. Werekoghe Vololo ya Jordani kaavui na Sufu ghadi na ghadi ya muzi ghwa Parani luwaru lumu na mizi ya Tofeli, Labani, Hazerothi, na Dizahabu luwaru lumu.

² Ni charo cha matuku ikumi na jimweri, kufuma Mghondi ghwa Sinai hata Kadesh-barnea kuidia mghondi ghwa Edomu.

³ Ituku ja imbiri ja mori ghwa ikumi na imweri, mwaka ghwa mirongo ina nyuma ya kufuma Misri, Musa ukawighoria wandu wa Israeli malagho gha sharia, sa iji koni BWANA orekoghe wamneka.

⁴ Aho ni nyuma ya kumsima Sihoni mzuri wa Waamori, uo orekoghe ukikaia Heshboni; na Ogu mzuri wa Bashani, uo orekoghe ukikaia Ashtarothi na Edrei.

⁵ Musa orewighorieghe wandu sharia ingelo werekoghe mashariki ya Jordani andenyi ya isanga ja Moabu ukighamba,

⁶ “Iji derekoghe Mghondi ghwa Sinai, BWANA Mlungu odu oredizerieghe huwu, ‘Mwakaia luma na ndighi aha mghondinyi.

⁷ Funganyenyi mghende cha isanga ja mighondinyi ja Waamori, na wambao wose wiwimarie, hata vololo ya Jordani isanga ja mighondinyi, na ja wurindinyi, noko cha masanga gha kusinyi hata kireti cha Mediterania. Ghendenyi cha isanga ja Kanaani hata Mighondi ya Lebanoni hata kuvikia ghuja moda m'baa ghwa Eufrate.

⁸ Iji nijo isanga jose ini BWANA nerewilaghirieghe weke ndeyo Abrahamu, Isaaka, na Jakobo na kivalwa chawo kukaia nichawineka; ghendenyi mujiwade.’”

Musa kuwika Watanyi

⁹ Musa ukawizera wandu, “Ngelo derekoghe Mghondi ghwa Sinai neremzerieghe, ‘Ini sidimagha kuduka malagho ghenyu niekeri.

¹⁰ BWANA Mlungu onyu wam'bonyere mkachurikia, na idime mooka sa nyerinyeri ra mlungunyi kwa wungi.

¹¹ BWANA Mlungu wa weke ndeyo, ndem'bonye mkaie wengi mando elfu kuchumba seji muko, na kumrasimia seji ulaghirie.

¹² Nidima wada kuduka malagho gha mandu yenyu niekeri?

¹³ Saghuonyi wandu wiko na suku, witambukilwagha, wiichi malagho kunughana na vichuku venyu, nani nichawiwika wikaie wabaa wenyu.’

¹⁴ Nenyo mkanirumiria kukaia agho ni malagho mecha.

¹⁵ Kwa wundu ugho ngawada wabaa wa mbari renyu, wiko na suku, wiichi malagho, ngawiwika wikaie wabaa wenyu; vilongozi va maelfu, vilongozi va maghana, vilongozi va mirongo misanu, vilongozi va makumi na wabaa wa vichuku venyu kula andu.

¹⁶ Na ija ngelo ngawilaghira watanyi wenyu ngighamba, ‘Sikirienyi kesi ra wanyinyu, mtanye kwa hachi aghadi ya mundu na mruna angu mundu na mghenyi wikwanye.

¹⁷ Mkakatanya, msedawirie mndungi; muwisikire wabaa na watini karakara; msakemuobua mndungi, angu kutanya ni kwa Mlungu; na iyo kesi ichaamkuria, muirede kwapo, nani nichaisikiria.’

¹⁸ Ngelo iyo nerekoghe namlaghira maza rose imfwane muribonye.

Washeki kudumwa kufuma Kadesh-barnea

¹⁹ “Niko dikazoya charo kufuma Mghondi ghwa Sinai, dikaghenda imbiri sa iji koni BWANA Mlungu odu oredilaghirieghe; dikaida chija kireti chose cheobosha morechiwonieghe dikidamba cha isanga ja mighondinyi ja Waamori, dikacha Kadesh-barnea.

²⁰ Nani ngamzera, ‘Mwavika isanga ja mighondinyi ja Waamori, ijo BWANA Mlungu odu wawuyadineka.

²¹ Wonenyi BWANA Mlungu onyu wammbikia isanga imbiri konyu; jokenyi mujiwade sa iji koni BWANA Mlungu wa weke ndeyo umzerie; msakeobua hata msakefwa ngolo.’

²² “Ela inyo mmbose morenichieghe mkaghamba, ‘Ndedidume wandu imbiri kodu wiendezighana isanga na kudiwunjira malagho gha chia idifwanagha kunugha, na mizi dichaaivikia.’

²³ Ilagho ijo jikaniboia, nani ngasaghua wandu ikumi na wawi, kula kichuku mundu umweri.

²⁴ Wikajoka cha isanga ja mighondinyi, wikaghenda na kuvika Vololo ya Eshkoli, wikaizighana.

²⁵ Wikadwa matunda ghamu gha isanga, wikacha nagho; wikadiredia malagho wikighamba kukaia ijo isanga BWANA Mlungu odu udinekagha, jaboie.

²⁶ “Ela sena ndemchejoka; moreleghieghe malaghiro gha BWANA Mlungu onyu,

²⁷ mkazughunuka hemenyi konyu mkighamba, ‘Ni angu BWANA uzamilo ni isi, niko udifunyire isanga ja Misri na kudireda kwa Waamori wipate kuditotesha.

²⁸ Dijoka cha hao? Wanidu wadibwagha ngolo wikighamba, awo wandu ni wabaa, sena ni walacha kudichumba, mizi nayo ni mibaa iko na ngome riaghilo na kuvika mawingunyi; sena dawiwonie Waanaki aho.’

²⁹ “Niko ngamzera, ‘Msengilo ni kiture, hata msakewiobua.

³⁰ BWANA Mlungu onyu uo wawuyamkiria, uchamluya sa iji koni orebonyereghe Misri mkiwona,

³¹ na kireti wokoni. Morewonieghe BWANA ukimduka seji mundu udukagha mwana wake andu kose moreidirieghe hata mkavika aha.’

³² Ela mduasikira huwo, ndemcheemrumiria BWANA Mlungu onyu

³³ uo orekirieghe imbiri konyu andenyi ya iwingu nadime, na andenyi ya modo nakio, kummbonyera chia muidiriagha, na wulalo ghodunga hema renyu.

BWANA kuwikaba Israeli

³⁴ “Nao BWANA ukasikira malalamiko ghenyu, ukajokwa ni machu ukaghema,

³⁵ ‘Ndekuwadie mndungi wa kivalwa ichi cha wuwiwi uchaawona ijo isanga jighokie nerewilaghirieghe weke ndeyo kukaia nichawineka,

³⁶ ela Kalebu mwana wa Jefune. Uo uchajiwona; nani nichamneka ijo isanga orejiwadirieghe, na wana wake; kwa kukaia wamnughie BWANA kwa ngolo yake yose.’

³⁷ Hata nani wori mkadima mwanishekeria BWANA ukazamilwa ni ini ukaghamba, ‘Ola na oho wori ndekuchaangia aho,

³⁸ ela Joshua mwana wa Nuni, uo ukutesiagha, uchangia; mkumbe ngolo angu nuo uchaawibonya Waisraeli wipate ifwa ja ijo isanga.

³⁹ Chiaimweri na huwo, awana wenyu moreghambagha wei wichawadwa ni wamaiza, na aweni wiko idime wiseichi mecha na mawiwi, wichangia aho; nawo nichawineka ijo isanga jikaie jawo.

⁴⁰ Ela inyo ghalukenyi mdambe cha kireti chia ya Bahari ya Shamu.’

⁴¹ “Aho mkanitumbulia, ‘Dam'bonyere BWANA kaung'a; dichajoka dilo, sa iji koni BWANA Mlungu odu oredilaghirieghe.’ Niko kula umu onyu ukarwa maswagha ghake gha wuda ukighesha wei ni ilagho jiangue kujoka cha isanga ja mighondinyi.

⁴² Ela BWANA ukanizera, ‘Wizere wisejoke hata wisakelwa wichesimwa ni wamaiza wawo angu sikwanye nenyo anduangi.’

⁴³ Niendamghoria, ndemoresikireghe; ela modelegha malaghiro gha BWANA, mkaajoka cha isanga ja mighondinyi mkikukasa.

⁴⁴ Niko Waamori, awo werekoghe wikikaia ijo isanga ja mighondinyi wikamfumia wikammbinga sa choki, wikamkaba ajaisi Seiri hata mkavika Horma.

⁴⁵ Niko mcheewuya mkawoka kumlilia BWANA, ela BWANA ndemcheesikira hata kumzighana anduangi.

Miaka ekaia kireti

⁴⁶ “Nenyo morekaieghe Kadeshi luma; matuku mengi nandighi.