WUFUNUO 7 - Biblia Ilagho Jiboie Kwa Wandu Wose

Wandu 144,000 wa Israeli

¹ Nyuma ya maza iri, nerewonieghe weke malaika bana wiko kimusi a mbembenyi inya ra ndoenyi wikiritangala mbeo inya, ingi isepate kuweta ndoenyi, angu baharinyi, angu aighu ya mudi ghungi.

² Ngawona malaika umu sena, ukisea kufuma aja iruwa jibukiagha, uko na muhuri ghwa Mlungu uko moyo; nao ukawiwanga kwa lwaka lubaa awo weke malaika bana werenekeloghe ndighi rebonya ndoe na bahari ilagho;

³ ukighamba, “Msebonye ndoe ilagho jingi, angu bahari, angu midi, hata dameria kuwikaba awo wadumiki wa Mlungu odu muhuri chamunyi kwawo.”

⁴ Nani neresikireghe ugho mtalo ghwa awo werekabiloghe muhuri; wandu ighana na mirongo ina na inya elfu, kufuma kwa kula mbari ya wandu wa Israeli.

⁵ Wandu wa mbari ya Juda, elfu ikumi na iwi; wandu wa mbari ya Reubeni, elfu ikumi na iwi;

⁶ wandu wa mbari ya Gadi, elfu ikumi na iwi; wandu wa mbari ya Asheri, elfu ikumi na iwi; wandu wa mbari ya Naftali, elfu ikumi na iwi; wandu wa mbari ya Manase, elfu ikumi na iwi;

⁷ wandu wa mbari ya Simeoni, elfu ikumi na iwi; wandu wa mbari ya Lawi, elfu ikumi na iwi; wandu wa mbari ya Isakari, elfu ikumi na iwi;

⁸ wandu wa mbari ya Zebluni, elfu ikumi na iwi; wandu wa mbari ya Josefu, elfu ikumi na iwi; na wandu wa mbari ya Benjamini, elfu ikumi na iwi.

Izungu ibaa ja wandu

⁹ Nyuma ya agho, nerezighanireghe ngawona izungu ibaa nandighi ja wandu, mndungi usedimagha kujitala; jerefumieghe kula mbari, na kula kichuku, na wandu, na viteto, jikikaia kimusi imbiri ya icho kifumbi cha nguma na imbiri ya uo Mwana wa Ng'ondi, jirwae nguwo ra chokwa, wiko na maghangachi mikonunyi kwawo,

¹⁰ wikighora kwa lwaka lubaa, “Kukia ni kwa Mlungu odu uo uko kidombo aighu ya kifumbi cha nguma na kwa Mwana wa Ng'ondi.”

¹¹ Na weke malaika wose wikakaia mbai mbai ya icho kifumbi cha nguma, na mbai mbai ya awo waghosi, na iro nyamandu riko moyo inya; nawo wikaghwa kijimijimi imbiri ya icho kifumbi cha nguma, na kumtasa Mlungu

¹² wikighamba, “Amen. Makaso, na wubaa, na hikima, na chawucha, na ishima, na ndighi, na kudima ndevikaie kwa Mlungu odu, kwa kala na kala Amen.”

¹³ Niko umu wa waja waghosi ukaghora nani ukighamba, “Welee, awa wirwae nguwo ndacha ra chokwa ni weke ani, nawo wafuma hao?”

¹⁴ Nani ngamzera, “Bwana oho kwamanya.” Nao ukanizera, “Awa niwo waja wandu wifumie matirironyi mabaa, nawo warioghoshere nguwo rawo, na kuribonya kukaia ra chokwa kwa bagha ya Mwana wa Ng'ondi.

¹⁵ Kwa huwo, weko imbiri ya kifumbi cha nguma cha Mlungu, nawo wadamtasa kio na dime andenyi ya hekalu yake; na uo useagha kidombo aighu ya kifumbi cha nguma uchawilindia kwa kukanya nawo.

¹⁶ Ndewichaazughwa hata kusikira kau ingi sena. Iruwa ndejichaawikaba, hata kusikira kukabwa ni mruke ghungi anduangi.

¹⁷ Angu uo Mwana wa Ng'ondi uko aghadi ya icho kifumbi cha nguma, uchakaia mlisha wawo, nao uchawighenja kwa ndoria ra machi gha irangi na Mlungu uchawiaghia mbori rose mesonyi kwawo.”