WUFUNUO 6 - Biblia Ilagho Jiboie Kwa Wandu Wose

Iyo mihuri

¹ Nao iji uo Mwana wa Ng'ondi oreghufungueghe ghumu ghwa iyo mihuri mfungade, nerewonieghe; ngasikira imu ya iro nyamandu riko moyo inya ikighamba na lwaka sa lukuwa, “Choo”.

² Ngawona farasi ya chokwa; na uo oreijokieghe orekoghe na ndana. Nao ukanekwa kirumbu, ukafuma uko msimi upate kusima.

³ Hata iji uo Mwana wa Ng'ondi oreghufungueghe ugho muhuri ghwa kawi, neresikireghe iyo nyamandu iko moyo ya kawi ikighamba, “Choo”.

⁴ Na farasi zima ikafuma ya mkundu tini, na uo oreijokieghe, orenekeloghe rusa einja sere ndoenyi, wandu wipate kubwaghana weni na weni; nao orenekeloghe lufu lubaa.

⁵ Hata iji uo Mwana wa ng'ondi oreghufungueghe ugho muhuri ghwa kadadu, neresikireghe iyo nyamandu iko moyo ya kadadu ikighamba “Choo”. Ngawona farasi ya chilu, na uo oreijokieghe orekoghe na ratili mkonunyi kwake.

⁶ Ngasikira sa lwaka aghadi ya iro nyamandu riko moyo inya lukighamba, “Pishi imweri ya ngano kwa dinari na pishi idadu ra shairi kwa dinari; ela mavuda na divei kusakevibonya ilagho jingi.”

⁷ Hata iji uo Mwana wa Ng'ondi oreghufungueghe ugho muhuri ghwa kana, neresikireghe lwaka lwa iyo nyamandu iko moyo ya kana lukighamba, “Choo.”

⁸ Ngawona farasi ya fusifusi, na uo oreijokieghe, irina jake orewangiloghe Kifwa, na Andu Kwa Wafu korenughaneghe nao; nawo werenekeloghe nguma aighu ya ifungu ja kana ja ndoenyi; wibwaghe kwa lufu, na kwa njala, na kwa saka izamie, na kwa nyamandu ra isakenyi ra ndoenyi.

⁹ Hata iji uo Mwana wa Ng'ondi oreghufungueghe ugho muhuri ghwa kasanu, nerewonieghe aisi ya madhabahu roho ra wandu werebwaghiloghe kwa wundu ghwa ijo ilagho ja Mlungu, na kwa wundu ghwa wushuhuda werekoghe nagho;

¹⁰ nawo wikakema kwa lwaka lubaa wikighamba, “Ee Bwana kuwadie nguma, mweli na mloli, ni lii kuchaatanya na kudiluya lugho bagha yedu kwa wandu wiko ndoenyi?”

¹¹ Niko kula umu orenekeloghe nguwo ndacha ya chokwa, wikazerwa wichurie kuhoresha katini, hata mtalo ghukate ghwa wadumiki wambao, na waruna awo werekoghe wibwagho sa awo weni.

¹² Hata iji uo Mwana wa Ng'ondi oreghufungueghe ugho muhuri ghwa karandadu, nerezighanireghe, nao ola korekoghe na msughusiko m'baa ghwa ndoe; iruwa jikawuya ja chilu sa nguwo ya igunia, na mori ghukawuya ghwa ngundu sa bagha,

¹³ na nyerinyeri ra mlungunyi rikapotoka andoenyi seji mtini ghughughuduagha matunda gharo gha kwari ngelo ghwasughuswa ni mbeo mbaa.

¹⁴ Mawingunyi koreinjikieghe seji karatasi rikuchwagha, na kula mghondi na kisiwa vereinjikieghe andu kwaro.

¹⁵ Niko aho wazuri wa ndoenyi, na wandu wabaa, na wabaa wa majeshi, na awo wiwadie mali, na wandu wiwadie ndighi, na kula mundu, ukaigha mzumba angu mkitina, wikakuvisa mbangenyi, na aghadi ya maghamba ghiko mighondinyi;

¹⁶ wikiwanga mighondi mibaa na magho kwa kughamba, “Dighuenyi mdifinikire disewono ni uo useagha kidombo aighu ya kifumbi cha nguma, na uo Mwana wa Ng'ondi uko na machu mabaa;

¹⁷ angu ituku ibaa ja machu ghawo jameria kucha, nao nani udimagha kujirumaghia?”