WUFUNUO 22 - Biblia Ilagho Jiboie Kwa Wandu Wose

¹ Niko uja malaika ukaniwonyera moda ghwa machi gha irangi, ghuko sa igho jing'alaa-ng'ala ghufumagha kwa icho kifumbi cha nguma cha Mlungu, na cha uo Mwana wa Ng'ondi na kuidia

² ghadi na ghadi ya chia mbaa ya ugho muzi. Wokoni mbai na mbai ya ugho moda iichia na iichia korekoghe na mudi ghwa irangi, ghuko na matunda gha mbari ikumi na iwi; nagho ghwadava kula mori, na malemba gharo ghadaboisa wandu wa mbari rose.

³ Ndekuwadie kindo chingi chiwasiro njowe chichaakaia aho sena, ela kifumbi cha nguma cha Mlungu na cha Mwana wa Ng'ondi, nivo vichaakaia andenyi yaro, na wadumiki wake wichamtasa.

⁴ Wichammbona wushu ghwake, na irina jake jichakaia jiandikilo chamunyi kwawo.

⁵ Kio ndechichaakaia sena anduangi, hata ndewichaakunda mwengere ghungi ghwa taa, angu ghwa iruwa, angu Bwana Mlungu uchakaia taa yawo; nawo wichabonya nguma kwa kala na kala.

Kucha kwa Jesu

⁶ Nao malaika ukanizera, “Agha malagho ni gha loli, na niko koni ghiko; na uo Mlungu uwinekagha walodi Roho wake, wamduma malaika wake uwiwonyere wadumiki wake iro maza riko na suti ekaia kafwani.

⁷ Nani ola niacha kafwani. Warasimilwa u mundu ughiwadiagha malagho gha wulodi ghwa chuo ichi.”

⁸ Ni ini moni Johane neresikireghe na kuriwona maza iri. Nani iji neresikireghe na kuriwona, nereghueghe kijimijimi maghunyi kwa uo malaika oreniwonyereghe maza iri, nani ngakunda nimtase.

⁹ Ela uo ukanizera, “Kusakebonya huwo! Ini ne mdumiki sa kumoni, na sa wanyinyu awo walodi na awo wighiwadiagha malagho gha wulodi ghwa chuo ichi; kumtase Mlungu.”

¹⁰ Nao ukanizera, “Kusakevisa malagho gha wulodi ghwa chuo ichi, angu ngelo yaro yalighisa.

¹¹ Mundu mmbiwi, ndebonyeghe wuwiwi; na mundu mchafu, ubonyeghe wuchafu; na mhachi, ndebonyeghe hachi; na mweli, ukaie uelie wokoni.”

¹² “Olenyi niacha kafwani, niko na mafungu ghapo, nimlipe kula mundu karakara na seji ubonyere.

¹³ Ini ne Alfa na Omega, wa imbiri na wa kutua; uko kuzoya na uko kutua.

¹⁴ Warasimilwa awo wioghoshagha nguwo rawo, eri wipate kukaia na hachi eghughendia ugho mudi ghwa irangi, na kungia mzinyi wikimaria mbengenyi.

¹⁵ Cha shighadi reko iro koshi, na wasawi, na walaki, na wabwaghi wandu, na awo witasagha milimu, na kula mundu uikundagha tee na kuibonya.

¹⁶ “Ini Jesu namduma malaika wapo ughighorie makanisa maza iri. Ini ne wa kivalwa cha Daudi; iyo nyerinyeri ing'alaa-ng'ala ya luma lwa nakesho.”

¹⁷ Uo Roho, na uo mwai ulowolwagha waghamba, “Choo.” Na uo mundu usikiragha ndeghambe, “Choo.” U mundu uomagha ndeche; uo ukundagha, ndeghiwuse machi gha irangi duu.

Kutua

¹⁸ Namuonya kula mundu usikiragha malagho gha wulodi ghwa chuo ichi: Ngera mndungi waghichuria, Mlungu uchamchuria agho makabo ghighorelo andenyi ya chuo ichi.

¹⁹ Na mndungi ukainja ilagho jingi ja wulodi ghwa chuo ichi, Mlungu uchainja iwaghio jake ja ugho mudi ghwa irangi, na jekaia andenyi ya ugho muzi ghuelie; seji ghighorelo andenyi ya chuo ichi.

²⁰ Uo ushuhudiagha maza iri waghamba, “Loli niacha kafwani.” Amen. Choo Bwana Jesu.

²¹ Mvono ghwa Bwana Jesu, ndeghukaie na waeli wose. Amen.