WUFUNUO 21 - Biblia Ilagho Jiboie Kwa Wandu Wose

Mlungunyi kuwishi na ndoenyi kuwishi

¹ Niko ngawona mlungunyi kuwishi na ndoenyi kuwishi; angu uko mlungunyi kwa imbiri na ndoenyi kwa imbiri korekoghe kwameria kuida, na bahari ndeerekoghe sena anduangi.

² Nani nerewonieghe ugho muzi ghuelie, Jerusalemu mbishi, ghukisea kufuma mlungunyi kwa Mlungu; ghuboisiro sa mwai ulowolwagha upambilo kwa wundu ghwa mumi wake.

³ Ngasikira lwaka lubaa kufuma kwa icho kifumbi cha nguma lukighamba, “Ola wulalo ghwa Mlungu ni andwamweri na wadamu. Nao uchakaia andwamweri nawo, nawo wichakaia wandu wake; Mlungu moni uchakaianya nawo.

⁴ Uchawiaghia mbori rose mesonyi kwawo, na kifwa chingi ndechichaakaia sena anduangi, hata wasi, hata kukema, hata kuwawa kungi; angu maza ra imbiri rameria kuida.”

⁵ Na uo oreserieghe kidombo aighu ya kifumbi cha nguma ukaghamba, “Ola niaribonya maza rose rikaie mbishi.” Wokoni ukaghora, “Kughiandike agha, angu ni malagho ghiko na wuloli, ghidimagha kurumirilwa.”

⁶ Nao ukanizera, “Ghabonyeka! Ini ne Alfa na Omega, uko kuzoya na uko kutua. U mundu uomagha, nichamneka machi gha ndoria ya machi gha irangi duu.

⁷ U mundu usimagha, uchapata ifwa iji, nani nichakaia Mlungu wake, nao uchakaia mwana wapo.

⁸ Ela weke mawowa, na awo wiserumiriagha, na wawiwi, na wabwaghi wandu, na walaki, na wasawi, na watasi milimu, na watee wose, ifungu jawo jichakaia andenyi ya iyo ndiwa iakagha modo na kibiriti; nacho ni kifwa cha kawi.”

Ugho muzi mmbishi ghwa Jerusalemu

⁹ Nao umu wa awo weke malaika mfungade, werekoghe na iro bakuli mfungade richue agho makabo mfungade gha kutua, ukacha ukanizera, “Choo nikuwonyere uo mwai ulowolwagha, uo muka wa Mwana wa Ng'ondi.”

¹⁰ Ukanidwa noko cha mghondinyi m'baa niko andenyi ya Roho, ukaniwonyera ugho muzi ghuelie ghwa Jerusalemu, ghukisea kufuma mlungunyi kwa Mlungu,

¹¹ ghuking'ala-ng'ala kwa wubaa ghwa Mlungu; mwengere ghwaro ghorekoghe sa igho ja zoghori mbaa, sa igho jiwangwagha jaspi, jielie sa kilole.

¹² Ghorekoghe na wurigha m'baa ghuko ighu, na mbenge raro ikumi na iwi; mbengenyi korekoghe na weke malaika ikumi na wawi, na mbengenyi naighu, koreandikiloghe marina ikumi na awi gha mbari ikumi na iwi ra wandu wa Israeli.

¹³ Ii chia cha mashariki, korekoghe na mbenge idadu; cha kaskazinyi, mbenge idadu; cha kusinyi, mbenge idadu; na cha magharibi, mbenge idadu.

¹⁴ Wurigha ghwa muzi ghorekoghe na magho gha misingi ikumi na awi, na aighu yaro, korekoghe na marina ikumi na awi gha wadumi wa Mwana wa Ng'ondi.

¹⁵ Na uo malaika oreghorieghe nani, orekoghe na mzata ghwa dhahabu ghopima ugho muzi; chiaimweri na mbenge raro na wurigha ghwaro.

¹⁶ Muzi ugho ghooka ghwa mbembe inya; wulacha ghwaro ghookatana na wushapa ghwaro. Nao ukaghupima muzi na mzata ghwake, ghukawoneka kilometa elfu iwi na maghana ana wulacha, nagho ghookatana na wushapa ghwaro.

¹⁷ Na wurigha ghwaro ukaghupima wokoni, ghukawoneka kukaia na meta mirongo irandadu, kunughana na icho kipimo cha malaika.

¹⁸ Ugho wurigha ghoreaghiloghe kwa magho gha jaspi; muzi ghoni ghorekoghe ghwa dhahabu ielie, ghuelie sa kilole.

¹⁹ Misingi ya wurigha ghwa ugho muzi, erepambiloghe na kula igho jiko ja zoghori mbaa. Ja imbiri, ni igho ja jaspi; ja kawi, ni safire; ja kadadu, agate; ja kana, zumaridi;

²⁰ ja kasanu, oniksi; ja karandadu, karneliani; ja mfungade, kristolitho; ja wunyanya, beruli; ja ikenda, topazi; ja ikumi, krusoprase; ja ikumi na imweri, jasintho; na ja ikumi na iwi, amethisto.

²¹ Iro mbenge ikumi na iwi rerekoghe lulu ikumi na iwi; kula mbenge erebonyeroghe na lulu imweri, na chia mbaa ya muzi erebonyeroghe kwa dhahabu ielie, iwonekagha sa kilole.

²² Nani serewonieghe hekalu ingi andenyi ya ugho muzi, angu hekalu yaro ni Bwana Mlungu Uo Uwadie Ndighi Rose na uo Mwana wa Ng'ondi.

²³ Na ugho muzi ndeghukunde mwengere ghwa iruwa hata ghwa mori, angu ugho wubaa ghwa Mlungu nigho mwengere ghwaro; na taa yaro ni uo Mwana wa Ng'ondi.

²⁴ Wandu wa mbari rose wichaghenda kwa mwengere ghwaro, na wazuri wa ndoenyi wichareda mali rawo andenyi ya ugho muzi.

²⁵ Mbenge raro jingi nderichaarughwa nadime, angu kio chingi ndechiko aho anduangi.

²⁶ Wandu wa mbari rose wichaghuredia ugho muzi mali rawo, na ishima.

²⁷ Ela kindo chingi chiseelie ndechichaangia andenyi yaro, hata mundu ubonyagha maza rizamie angu ughoragha tee; ela awo wandu weni wiandikilo andenyi ya chuo cha Mwana wa Ng'ondi.