WUFUNUO 16 - Biblia Ilagho Jiboie Kwa Wandu Wose

Bakuli ra machu gha Mlungu

¹ Niko ngasikira lwaka lubaa kufuma hekalunyi lukiwizera waja weke malaika mfungade, “Ghendenyi mdie agho machu gha kubia kwa Mlungu ndoenyi, agho ghiko andenyi ya iro bakuli mfungade.”

² Nao malaika wa imbiri ukaghenda, ukawada bakuli yake na kudia ndoenyi, na waja wandu werekoghe na alama ya ija nyamandu awo werekoghe wikiitasa fwana yake, wikabukwa ni vonda vizamie na ndighi.

³ Nao malaika wa kawi ukawada bakuli yake na kudia baharinyi, na bahari ikawuya sa bagha ya mundu ufue, na kula kindo cherekoghe moyo baharinyi chikafwa.

⁴ Nao malaika wa kadadu ukawada bakuli yake, na kudia andenyi ya meda na ndoria ra machi, naro rikawuya bagha.

⁵ Ngamsikira uo malaika wa machi ukighamba, “Oho ko mhachi; seji koni kwatanya niko koni, oho kuko, sena korekoghe, ee Mweli.

⁶ Kwa kukaia wandu weredirieghe bagha ya waeli na walodi, na oho kwawineka bagha winyo. Ni malipo ghawo!”

⁷ Nao ngasikira madhabahu ikikema, “Niko koni, ee Bwana Mlungu Uwadie Ndighi Rose, kutanya kwako ni kwa loli na hachi.”

⁸ Nao malaika wa kana ukawada bakuli yake, na kudia aighu ya iruwa, najo jikarumirilwa kuwikora wandu na modo;

⁹ wandu wikakorwa ni modo ghubirie, nawo wikajiewia irina ja Mlungu uo orekoghe ukighibonyera nguma agho makabo; hata ndewereherieghe na kumneka Mlungu wubaa anduangi.

¹⁰ Nao malaika wa kasanu ukawada bakuli yake, na kudia aighu ya kifumbi cha nguma cha iyo nyamandu, na wuzuri ghwake ghukangilwa ni kira. Wandu wikaluma chumi rawo kwa kuwawa kubaa,

¹¹ na kumuewia uo Mlungu wa mlungunyi kwa wundu ghwa luwawo na vonda vawo, hata ndewereherieghe na kughisigha mabonyo ghawo anduangi.

¹² Nao malaika wa karandadu ukawada bakuli yake, na kudia aighu ya ugho moda m'baa ghuwangwagha Eufrate, na machi gharo ghikaoma; chia ipate kuboiswa kwa wundu ghwa wazuri wifumagha cha mashariki.

¹³ Nani ngawona roho idadu ra makakala riko sa vichula rikifuma momunyi kwa iyo choka, na momunyi kwa iyo nyamandu, na momunyi kwa uo mlodi wa tee.

¹⁴ Iro ni roho ra pepo ribonyagha weke mwakilimbiti, righendagha kwa wazuri wiko wurumwengunyi kose, na kuwikwanya kwa wundu ghwa wuda ghuchaakaia ijo Ituku ibaa ja Mlungu, Uo Uwadie Ndighi Rose.

¹⁵ (“Ola niacha sa kitoi! Warasimilwa uo uchereshagha na kurilindia nguwo rake, usecheghenda duu na kuwoneka wuduu ghwake.”)

¹⁶ Na iro roho rikawikwanya awo wazuri andu kuwangwagha kwa kiteto cha Kiebrania Harmagedon.

¹⁷ Nao malaika wa mfungade ukawada bakuli yake, na kudia mbeonyi, na lwaka lubaa lukafuma hekalunyi, kwa icho kifumbi cha nguma lukighamba, “Yabonyeka!”

¹⁸ Kukakaia kukaba chuhehia, na chwaka, na mirurumo ya chukuwa, na msughusiko m'baa ghwa ndoe na jingi ghuserekoghe huwo kufuma wandu wizoe kukaia ndoenyi; msughusiko ugho ghorekoghe m'baa na ndighi.

¹⁹ Ugho muzi m'baa ghukawaghanyika mafungu adadu, na mizi ya iro mbari ikanonwa; Mlungu ukaghukumbuka ugho muzi m'baa Babuloni, upate kughubonya ghuangamire icho kikombe cha divei ya machu gha kubia kwake.

²⁰ Kula kisiwa chikakimbia, na mghondi ghungi ndeghorewonekieghe anduangi.

²¹ Na vua mbaa ya magho ikanya aighu ya wandu; kula igho jiko na wulemeri sa ghwa kilo mirongo misanu kufuma mlungunyi; hata wikamuewia Mlungu kwa wundu ghwa ijo ikabo ja vua ya magho. Ikabo ijo, jerekoghe jeobosha na ndighi.