WUFUNUO 15 - Biblia Ilagho Jiboie Kwa Wandu Wose

Weke malaika wiko na makabo gha kutua

¹ Niko nerewonieghe alama zima mlungunyi iko mbaa eobosha; weke malaika mfungade wiko na makabo mfungade gha kutua, na kwa agho, machu gha kubia kwa Mlungu ghichakatia.

² Nao ngawona kindo sa bahari ya kilole iranganyiro na modo, na awo wandu wereisimieghe ija nyamandu, na ija fwana yake etasa, na uo mundu wa irina ja ugho mtalo; wiko kimusi imbiri ya iyo bahari ya kilole wiwadie zeze ra Mlungu mikonunyi kwawo.

³ Nawo wabora lumbo lwa Musa mdumiki wa Mlungu, na lumbo lwa Mwana wa Ng'ondi wikighamba, “Kazi rako ni mbaa na ra mashiniko, ee Bwana Mlungu Uwadie Ndighi Rose! Chia rako ni ra hachi na loli, ee Mzuri wa mbari rose.

⁴ Nani useobuagha na kujikasa irina jako, ee Bwana? Angu oho kuekeri koko mweli. Wandu wa mbari rose wichacha na kukutasa oho, angu kutanya kwako kwamerie kufunukulwa.”

⁵ Nyuma ya agha nerezighanireghe, ngawona hekalu yarughulwa mlungunyi, na andenyi yaro korekoghe na Hema ya Wushuhuda;

⁶ weke malaika mfungade wikafuma hekalunyi wiko na makabo mfungade, wirwae nguwo ra kitani ndicha ing'alaa-ng'ala, na mikumbo ya dhahabu laghenyi kwawo.

⁷ Na imu ya iro nyamandu riko moyo inya, ikawineka awo weke malaika mfungade, bakuli mfungade ra dhahabu richue machu gha kubia kwa Mlungu, uo uduagha moyo kwa kala na kala;

⁸ na hekalu ikachua mosi ghufumie kwa ugho wubaa ghwa Mlungu, na uko kudima kwake; na mndungi nderedimieghe kungia hekalunyi, hata makabo gha weke malaika mfungade ghikatie.