WUFUNUO 14 - Biblia Ilagho Jiboie Kwa Wandu Wose

Mwana wa Ng'ondi na wandu wake

¹ Niko ngazighana, nao hoja Mwana wa Ng'ondi uko kimusi aighu ya Mghondi ghwa Sioni, wikwanye nao waja wandu elfu ighana na mirongo ina na inya, awo wereandikiloghe irina jake na irina ja Ndee chamunyi kwawo.

² Nani neresikireghe madedo kufuma mlungunyi sa lwaka lwa machi mengi, na sa lwaka lwa lukuwa lubaa; agho madedo nereghisikireghe gherekoghe sa wakabi zeze wikirikaba zeze rawo;

³ nawo werekoghe wikibora lumbo luwishi imbiri ya icho kifumbi cha nguma, na imbiri ya iro nyamandu riko moyo inya, na imbiri ya awo waghosi. Ndekuwadie mndungi oredimieghe kukufundisha ulo lumbo, ela awo wandu elfu ighana na mirongo ina na inya awo werekombologhe kufuma ndoenyi;

⁴ awa niwo wiserekulushireghe weni kwa waka, ni wandu wielie. Awa niwo wimnughagha uo Mwana wa Ng'ondi andu kose ughendagha, nawo wamerie kukombolwa kufuma kwa wadamu, wikaie mavalo gha imbiri kwa Mlungu na kwa Mwana wa Ng'ondi;

⁵ nawo ndewerewonekieghe na tee ingi, kwa kukaia ndewerewadieghe iboli jingi anduangi.

Weke malaika wadadu

⁶ Niko ngawona malaika umu ukiburuka mbeonyi, uko na Ilagho Jiboie ja kala na kala; upate kuwichilia awo wikaiagha ndoenyi wa kula mbari, kichuku, kiteto, na wandu;

⁷ ukaghora kwa lwaka lubaa, “Muobuonyi Mlungu, mumneke wubaa, angu ngelo ya kutanya kwake yameria kuvika; mtasenyi uo ubonyere mlungunyi na ndoenyi, bahari na ndoria ra machi.”

⁸ Na malaika umu wa kawi ukanugha ukighamba, “Ghwaghue, ghwaghue ugho muzi m'baa ghwa Babuloni! Ugho ghorewibonyereghe wandu wa mbari rose kunywa divei ya bea ra wulaki ghwake.”

⁹ Na malaika umu wa kadadu ukawinugha ukighamba kwa lwaka lubaa, “Ngera mndungi waitasa iyo nyamandu, na iyo fwana yake, na kupata alama chamunyi kwake, angu mkonunyi kwake,

¹⁰ uchanywa divei irudie ya kubia kwa machu gha Mlungu, idungilo andenyi ya kikombe cha machu ghake; nao uchatirirwa kwa modo na kibiriti imbiri ya weke malaika wielie, na imbiri ya Mwana wa Ng'ondi.

¹¹ Na mosi ghwa ugho modo ghuwitiriragha, ghwajoka kwa kala na kala. Wandu awo witasagha iyo nyamandu, na iyo fwana yaro, na uo ose uko na alama ya irina jake, ndewina kuhora na dime hata na kio anduangi.”

¹² Aha niko jikundikie irumaghio ja waeli, awo wiiwadiagha memu ya Mlungu na ijo irumirio ja Jesu.

¹³ Nani neresikireghe lwaka kufuma mlungunyi lukighamba, “Andika huwu: Warasimilwa wafu wifwagha wiko andenyi ya Bwana kufuma idana.” Roho nao waghamba, “Ee, warasimilwa nandighi, wipate kuhora nyuma ya kazi rawo; angu mabonyo ghawo ghawinugha.”

Ndoenyi kukuwidwa

¹⁴ Niko ngazighana, najo hejija iwingu ja chokwa, na umu wasea kidombo aighu yaro ufwanane na mdamu; urwae kirumbu cha dhahabu chongonyi kwake, uko na mundu ghukalie mkonunyi kwake.

¹⁵ Malaika umu ukafuma hekalunyi, ukimmbanga kwa lwaka lubaa uo oreserieghe kidombo aighu ya iwingu, na kumzera “Tumia mundu ghwako kukuwide, angu ngelo ekuwida yameria kuvika na mvono ghwa ndoenyi ghwakaia tayari.”

¹⁶ Niko uo oreserieghe kidombo aighu ya iwingu, ukakumba mundu ghwake ndoenyi, na ndoe ikakuwidwa.

¹⁷ Na malaika umu ukafuma hekalunyi aho mlungunyi, nao moni wori orekoghe na mundu ghukalie.

¹⁸ Nao malaika umu ukafuma madhabahunyi, uo ukaiagha na nguma aighu ya modo, ukammbanga kwa lwaka lubaa uo orekoghe na mundu ghukalie na kumzera, “Tumia mundu ghwako, kuvikwanye vanga va zabibu ra ndoenyi, angu zabibu raro rawurue.”

¹⁹ Niko uja malaika ukaghukumba mundu ghwake ndoenyi, ukarikwanya zabibu ra ndoenyi na kurikumba andenyi ya chombo kibaa chekamia zabibu cha machu gha kubia kwa Mlungu;

²⁰ zabibu rikakamwa andenyi ya chombo chekamia shighadi ya muzi, na bagha ikafuma chombonyi, ikasalama wukula ghwa kilometa maghana adadu, na wuighu kaavui meta iwi.