WUFUNUO 12 - Biblia Ilagho Jiboie Kwa Wandu Wose

Muka na Choka

¹ Nao alama mbaa ikawoneka mlungunyi; muka urushiro iruwa, na mori ghuko aisi ya maghu ghake; na chongonyi kwake, korekoghe na kirumbu cha nyerinyeri ikumi na iwi.

² Nao orekoghe na kifu, ukakema ukilumwa na kukumba lufu ukikunda kuva.

³ Na alama imu ikawoneka sena mlungunyi; choka mbaa ya mkundu, iko na vongo mfungade, mbembe ikumi na virumbu mfungade.

⁴ Na iyo choka ikakurudua ifungu ja kadadu ja nyerinyeri kwa kikomba chake, na kurikumba andoenyi. Ikakaia kimusi imbiri ya uo muka orekoghe kaavui na kuva mwana; eri uo mwana ukavalwa, ipate kummila.

⁵ Nao uo muka ukava mwana wa womi, uo uchaaribonyera nguma mbari rose kwa mzata ghwa chuma; ela mwana wake ukakafulwa noko cha kwa Mlungu na kwa kifumbi chake cha nguma.

⁶ Uo muka ukakimbia cha kireti, andu Mlungu orem'boisireghe wulalo ghwake, upate kulishwa aho matuku elfu imweri maghana awi na mirongo irandadu.

⁷ Niko wuda ghukabuka mlungunyi, Mikaeli na weke malaika wake wikilwa na iyo choka, na iyo choka ikalwa chiaimweri na weke malaika wake;

⁸ ela choka na weke malaika wake weresimiloghe, na wulalo ghungi ghwawo mlungunyi ndeghorewonekieghe sena anduangi.

⁹ Na iyo choka mbaa ikapotolwa, iyo choka ya kala, iyo iwangwagha Ibilisi na Shetani, uo mkalii wa wurumwengu ghose; nao ukapotolwa andoenyi chiaimweri na weke malaika wake.

¹⁰ Ngasikira lwaka lubaa mlungunyi lukighamba, “Idana kukia kwa Mlungu odu kwameria kucha; na uko kudima kwake, na wuzuri ghwake, na iyo nguma ya Kristo wake; angu uo mshitaki uwishitakiagha wanidu kio na dime imbiri ya Mlungu wameria kupotolwa.

¹¹ Nawo wedemsima kwa iyo bagha ya Mwana wa Ng'ondi, na kwa ilagho ja wushuhuda ghwawo; angu ndewereghikundieghe marangi ghawo hata kifwa.

¹² Kwa wundu ugho, boilonyi ee mlungunyi, nenyo mmbose mkaiagha andenyi kwaro. Ela ni bugha konyu ee ndoenyi, na bahari, angu uo Ibilisi wamseria inyo uko na machu mabaa, angu waichi kukaia ngelo yake ni vui.”

¹³ Nao iji iyo choka yawona angu yapotolwa andoenyi, ikamnugha uo muka orevaeghe uo mwana wa womi;

¹⁴ ela uo muka ukanekwa mawawa awi gha indu mbaa, eri upate kuburuka cha kireti na kuikimbia iyo choka; andu uchaakaia ukilishwa kwa kimu, na vimu na nusu ya kimu.

¹⁵ Iyo choka ikafunya machi momunyi kwake sa moda na nyuma ya uo muka, upate kudwalwa ni kusalama kwa agho machi.

¹⁶ Ela ndoe ikamtesia uo muka na kunywa ugho moda ghorefumieghe momunyi kwa iyo choka.

¹⁷ Niko iyo choka ikam'bonyera machu uo muka, ikaghenda kubonya wuda na kivalwa chake chisigharikie; awo wandu wiiwadiagha memu ya Mlungu na awo wiko na wushuhuda ghwa Jesu. Nayo ikakaia kimusi a msangaghenyi ghwa bahari.