WUFUNUO 11 - Biblia Ilagho Jiboie Kwa Wandu Wose

Mashahidi wawi

¹ Niko nganekwa mrangi ghopima ghuko sa mzata na kuzerwa, “Wuka kuipime iyo Hekalu ya Mlungu na madhabahu; na awo witasagha aho kuwitale.

² Ela kuseipime iyo waza iko shighadi ya hekalu, kuseipime; angu yamerie kunekwa iro mbari, nawo wichaghuwadia-wadia ugho muzi ghwa wueli kwa meri mirongo ina na iwi.

³ Nani nichawineka ndighi washahidi wapo wawi, wipate kuchila ilagho ja Mlungu matuku elfu na maghana awi na mirongo irandadu, wikirwa nguwo ra magunia.”

⁴ Awo ni iyo mizeituni iwi, na vinara va taa viwi, vikaiagha kimusi imbiri ya Bwana wa ndoenyi.

⁵ Na ngera mndungi wakunda kuwibonya ilagho jingi, modo ghwafuma memunyi kwawo na kuwisaghisa wamaiza wawo, na mndungi uchaakunda kuwibonya ilagho jingi, uchabwaghwa kwa iyo chia.

⁶ Weko na nguma efunga mawingu, vua ingi isenye ngelo ya kuchila kwawo; sena weko na nguma reghalusa machi ghiwuye bagha, na kuikaba ndoe kwa kula ikabo shwa kwa shwa seji wikundagha weni.

⁷ Hata iji wameria wushuhuda ghwawo, ija nyamandu ifumagha andenyi ya icho kina cha abuso, ichabonya wuda nawo, na kuwisima; na kuwibwagha.

⁸ Na gharia rawo richakaia a chienyi ya ugho muzi m'baa ghuwangwagha kiroho Sodoma na Misri, andu Bwana wawo oresulubishiroghe.

⁹ Na wandu wa kula kichuku, na kiteto, na mbari, wichacha kurizighana iro gharia kwa matuku adadu na nusu; nawo wichalegha riseriko.

¹⁰ Na wandu wa ndoenyi wichaboilwa kwa wundu ghwa kubwaghwa kwawo, nawo wichabonya maseko na kuenjerana manosi; angu awo walodi wawi wedeeka matiriro kwa wandu ndoenyi.

¹¹ Ela nyuma ya agho matuku adadu na nusu, miruke ya irangi kufuma kwa Mlungu ikawingia awo walodi, nawo wikawuka kimusi kwa maghu ghawo, na wowa m'baa ghukawingia awo werewiwonieghe.

¹² Niko awo walodi wikasikira lwaka lubaa kufuma mlungunyi lukiwizera, “Jokenyi nokunu.” Nawo wikajoka cha mlungunyi andenyi ya iwingu imbiri ya meso gha wamaiza wawo.

¹³ Ngelo ija cheni, korekoghe na msughusiko m'baa ghwa ndoe, na ifungu ja ikumi ja muzi jikaghwa; wandu elfu mfungade wikabwaghwa ni ugho msughusiko; na awo weresigharikieghe, wikakambwa ni chongo na ndighi, na kuobua, nawo wikamneka wubaa Mlungu wa mlungunyi.

¹⁴ Bugha ya kawi yameria kuida, ola bugha ya kadadu icha kafwani.

Iyo tarumbeta ya mfungade

¹⁵ Niko uo malaika wa mfungade ukaikaba tarumbeta yake, kukakaia na chwaka mbaa mlungunyi rikighamba, “Wuzuri ghwa wurumwengu ghwawuya wuzuri ghwa Bwana odu na ghwa Kristo wake, nao uchabonya nguma kwa kala na kala.”

¹⁶ Na awo waghosi mirongo iwi na bana, wiseagha kidombo vifumbinyi vawo va nguma imbiri ya Mlungu, wikaghwa kijimijimi na kumtasa Mlungu,

¹⁷ wikighamba, “Dakufunyira chawucha, Bwana Mlungu, Kuwadie ndighi rose, oho kuko, nao korekoghe; kwa kukaia kwariwusa iro ndighi rako mbaa, kukazoya kubonya nguma.

¹⁸ Wandu wa iro mbari werezamiloghe na ndighi; ela ngelo ya machu ghako yavika, na ngelo ya wafu kutanywa; kupate kuwineka mafungu ghawo awo walodi na waeli, na awo wijiobuagha irina jako wose, wabaa na watini; na kwa wundu ghowinona awo wanoni wa ndoenyi.”

¹⁹ Niko Hekalu ya Mlungu ikarughulwa mlungunyi, na Sanduku ya Ilaghano jake ikawoneka Hekalunyi; kukakaia kukaba chuhehia, chwaka, mirurumo ya lukuwa, msughusiko ghwa ndoe, na vua mbaa ya magho.