WUFUNUO 1 - Biblia Ilagho Jiboie Kwa Wandu Wose

¹ Wufunuo ghwa Jesu Kristo, ugho Mlungu oremnekieghe uwiwonyere wadumiki wake iro maza riko suti rikaie kafwani. Na Kristo ukamduma malaika wake urimanyishe kwa mdumiki wake Johane;

² uo orejishuhudieghe ijo ilagho ja Mlungu na ugho wushuhuda ghwa Jesu Kristo, aighu ya ghose oreghiwonieghe.

³ Warasimilwa uo ughishomagha malagho gha wulodi ughu na awo wighisikiragha na kughiwadia wori; angu iyo ngelo yalighisa.

Voro kwa makanisa mfungade

⁴ Ini Johane, naghiandikia makanisa mfungade ghiko isanga ja Asia. Mvono ndeghukaie konyu, na sere ifumagha kwa Mlungu uo uko, nao orekoghe, na nuo uchagha; na kufuma kwa iro roho mfungade riko imbiri ya kifumbi chake cha nguma,

⁵ na kufuma kwa Jesu Kristo uo mshahidi mloli, mvalwa wa imbiri wa awo wifue, na uo uwibonyeragha nguma wazuri wa ndoenyi. Kwake uo udikunde, ukadifungua kwa bagha yake difume kaung'enyi redu,

⁶ na kudibonya dikaie wuzuri, na wakohani wedumika kwa Mlungu wake nao ni Ndee; kwake uo, ndeghukaie wubaa, na kubonya nguma kwa kala na kala. Amen.

⁷ Olenyi uacha mawingunyi, na kula iriso jichammbona, na kula mundu oremdungieghe, na wandu wa mbari rose ra ndoenyi, wichakema mchungu kwa wundu ghwake. Niko koni. Amen.

⁸ “Ini ne Alfa na Omega” waghamba Bwana Mlungu uo uko, nao orekoghe, na nuo uchagha; Uo Uwadie Ndighi Rose.

Mawono ghemmbona Kristo

⁹ Ini Johane mwanyinyu, mngara onyu andenyi ya Jesu, kwa agho matiriro, na ugho Wuzuri, na uko kurumaghia luma; nerekoghe andenyi ya kisiwa chiwangwagha Patimo, kwa wundu ghwa ijo ilagho ja Mlungu, na ugho wushuhuda ghwa Jesu.

¹⁰ Nerekoghe andenyi ya Roho ituku ja Bwana; ngasikira lwaka lubaa sa lwa tarumbeta lukideda nyuma yapo,

¹¹ lukighamba, “Agho kughiwonagha kughiandike chuonyi, na kughighenjera agho makanisa mfungade; Efeso, Simurna, Pergamo, Thuatira, Saridi, Filadelfia, na Laodikea.”

¹² Niko nereghalukieghe nimmbone uo orededanyagha nani; hata iji naghaluka, ngawona vinara va taa va dhahabu mfungade.

¹³ Na aghadi ya vinara va taa, nerewonieghe mndumu sa Mwana wa Mdamu, urwae nguwo ndacha, na mkumbo ghwa dhahabu ghufungilo laghenyi kwake.

¹⁴ Iridia jake jerekoghe ja chokwa sa sufu, ja chokwa choo sa thaluji; meso ghake gherekoghe sa lumu lwa modo;

¹⁵ maghu ghake gherekoghe sa shaba izughulo na ndighi, seji eeleshwa na modo, na lwaka lwake loresikirikieghe sa lwaka lwa machi mengi.

¹⁶ Orekoghe wawadia nyerinyeri mfungade kwa mkonu ghwake ghwa kiwomi, momunyi kwake lorefumieghe lufu lukalie chia rose, na wushu ghwake ghorekoghe ghuking'ala-ng'ala sa iruwa jakala na ndighi.

¹⁷ Nani iji neremmbonieghe, nereghueghe maghunyi kwake seji naafwa. Ela ukaniwikiria mkonu ghwake ghwa kiwomi ukaghamba, “Kusakeobua, ini nuo wa imbiri, na wa kutua;

¹⁸ uo uko moyo. Nerefueghe, nani hoku neko moyo kwa kala na kala; nani nawadie mifunguo ya kifwa na Andu kwa Wafu.

¹⁹ Idana kuandike iro maza kuriwonagha; iro riko, na iro richaakaia konyuma.

²⁰ Ngasu ya iro nyerinyeri mfungade kuriwonie kwa mkonu ghwapo ghwa kiwomi, na vinara va taa va dhahabu mfungade ni ihi: iro nyerinyeri mfungade ni weke malaika mfungade wa makanisa mfungade; na ivo vinara va taa mfungade, ni makanisa mfungade.