WATANYI 9 - Biblia Ilagho Jiboie Kwa Wandu Wose

Abimeleki

¹ Idana Abimeleki mwana wa Jerubaali oreghendieghe Shekemu andu waawuye werekoghe, ukawizera awo chiaimweri na kinyumba cha weke mae,

² “Muwikotie waisanga wose wa Shekemu, ‘Jiboie konyu ni jiao? Kubonyerwa nguma ni wadawana mirongo mfungade wa Jerubaali angu ni kubonyerwa nguma ni mdawana umweri?’ Wokoni kumbukenyi angu ini ne bagha imweri nenyo.”

³ Waawue wikaghora na wandu wa Shekemu malagho agho ghose wulalo ghwake; na ngolo rawo rikaghaluka kumnugha Abimeleki, angu wereghambieghe, “Uo ni mwanidu.”

⁴ Wikamneka vibelele mirongo mfungade va feza kufuma nyumbenyi kwa Baal-berithi, na Abimeleki ukakodesha navo wandu wa kisha kisha wisefwanagha; awo weremnughieghe.

⁵ Abimeleki ukaghenda nyumbenyi kwa ndee aja Ofra na kuwibwagha waruna, awo wadawana mirongo mfungade wa Jerubaali aighu ya igho jimu. Ela Jothamu, mdawana mtini wa Jerubaali ukasigharika, angu orekuvisireghe.

⁶ Waisanga wose wa Shekemu wikakwanyika chiaimweri na wandu wose wa Beth-milo; wikaghenda kaavui na mualoni ghwa wueli ghuko kaavui na ija nguro aja Shekemu, na kum'bonya Abimeleki ukaie mzuri.

⁷ Nao iji Jothamu waghorelwa maza iro, ukajoka na kukaia kimusi aighu ya Mghondi ghwa Gerizimu, ukakema na lwaka lubaa ukawizera, “Nisikirienyi inyo wandu wa Shekemu, eri Mlungu upate kumsikiria inyo.

⁸ Ituku jimu, midi erefumieghe kwendasaghua mzuri, ikaizera mzeituni, ‘Dibonyere nguma oho.’

⁹ Ela mzeituni ghukaizera, ‘Nisighe mavuda ghapo, agho ghimrediagha Mlungu na wadamu ishima, nao niendenyembeleka a midinyi?’

¹⁰ Midi ikaizera mtini, ‘Oho choo kudibonyere nguma.’

¹¹ Ela mtini ghukaizera midi, ‘Nisighe kusinga kwapo na matunda ghapo ghiboie, nao niendenyembeleka a midinyi?’

¹² Niko midi ikaghuzera mzabibu, ‘Oho choo kudibonyere nguma.’

¹³ Ela mzabibu ghukaizera midi, ‘Nisighe divei yapo isekeshagha milungu na wandu, nao niendenyembeleka a midinyi?’

¹⁴ Niko midi yose ikaghuzera mudi ghwa minjwa, ‘Oho choo kudibonyere nguma.’

¹⁵ Nao mudi ghwa minjwa ghukaizera midi, ‘Ikakaia loli mwarumiria kwa ngolo kunibonya mzuri onyu, haya muche na kukaia aisi ya kiju chapo; na ikakaia msekunde, modo ndeghufume minjonyi na kukora mierezi ya Lebanoni.’

¹⁶ “Kwa huwu idana, ikakaia loli moom'bonya Abimeleki ukaie mzuri kwa ngolo ndicha na ishima, na ikakaia loli mwam'bonyere nicha Jerubaali na nyumba yake, na kum'bonyera kunughana na agho mabonyo ghake orebonyereghe;

¹⁷ angu aba oremlueghe inyo, ukawika irangi jake ndengonyi na kumkira inyo kufuma mikonunyi kwa Wamidiani;

¹⁸ na idime mwawoka kulwa na nyumba ya aba, nenyo mwawibwaghie wadawana wake mirongo mfungade aighu ya igho na kum'bonya Abimeleki mwana wa muka wake mzumba ukaie mzuri aighu ya waisanga wa Shekemu, kwa kukaia wei ni mwanyinyu.

¹⁹ Idana ikakaia loli mwam'bonyera nicha na kwa ishima Jerubaali na nyumba yake, idime boilwanyenyi na Abimeleki,

²⁰ ela ikakaia si huwo kungi, modo ndeghufume kwa Abimeleki ghukore Waisanga wa Shekemu na Beth-milo, na modo ghufume kwa waisanga wa Shekemu na Beth-milo, ghukore Abimeleki.”

²¹ Niko Jothamu ukakimbia kula, ukaghenda kukaia Beeri angu oremuobueghe mruna Abimeleki.

²² Abimeleki ukawibonyera Waisraeli nguma kwa miaka idadu.

²³ Niko Mlungu ukaduma roho mbiwi aghadi ya Abimeleki na wandu wa Shekemu; awo wandu wa Shekemu wikamkita Abimeleki,

²⁴ eri mabonyo ghizamie ghibonyero kwa wadawana mirongo mfungade wa Jerubaali, na bagha yawo idikie idime kulipwa kwa mruna Abimeleki uo orewibwaghieghe; na kwa wandu wa Shekemu awo weremkumbieghe ndighi upate kuwibwagha waruna.

²⁵ Wandu wa Shekemu wikawika wandu wimlalirie Abimeleki koighu mighondinyi, nawo wikamsoka vilambo kula mundu oreidieghe chia iyo. Abimeleki ukaghorelwa maza iro.

²⁶ Nao Gaali mwana wa Ebedi ukacha Shekemu andwamweri na waruna; wandu wa Shekemu wikamrumiria.

²⁷ Wikafuma na kughenda cha mbuwenyi, wikawaya zabibu kufuma kwa mbuwa rawo ra mizabibu, wikarikama na kubonya karamu. Wikangia hekalunyi ya mlungu ghwawo, wikaja na kunywa na kumseka Abimeleki.

²⁸ Nao Gaali mwana wa Eberi ukaghamba, “Abimeleki nani, na isi wa Shekemu deko wa wada dimdumikiagha? Welee, mwana wa Jerubaali na Sebuli umu wa wabaa wake ndewerewidumikieghe wandu wa Hamori ndee wake Shekemu? Kwaki sena isi dimdumikiagha?

²⁹ Ngera nedeeka kilongozi cha awa wandu, kumangu namuinja Abimeleki na kumzera, ‘Churia majeshi ghako kufume dilo.’”

³⁰ Nao iji Zebuli wasikira malagho gha Gaali mwana wa Ebedi, ukajokwa ni machu loli loli.

³¹ Ukaduma wandu kwa Abimeleki aho Aruma ukighamba, “Ola Gaali mwana wa Ebedi na waruna wachee Shekemu, nawo waawuyakubonyera sheshe mzinyi.

³² Kwa huwo idana, oho na wandu mkwanye muche nakio mlalirie mbuwenyi.

³³ Hata nakesho iruwa jikabuka, kuwuke kungie mzinyi shwa-shwa, na iji uo chiaimweri na wandu wikwanye wakufumia, kuchawikaba seji kuchaadima.”

³⁴ Niko Abimeleki na wandu wose werekwanyeghe nao wikawuka nakio, wikakupanga mafungu ana na kulaliria kaavui na Shekemu.

³⁵ Nao Gaali mwana wa Ebedi ukafuma na kukaia kimusi mbengenyi engia mzinyi; Abimeleki na wandu werekwanyeghe nao, wikafuma kivisonyi kwawo.

³⁶ Gaali uendawiwona awo wandu, ukamzera Zebuli, “Zighana wandu wawuyasea kufuma mghondinyi.” Zebuli ukamzera, “Kwaawuyawona virerendi va mghondi seji wei ni wandu.”

³⁷ Gaali ukaghora sena, “Wona wawuyaseria ghadi na ghadi ya isanga, na wamu wafuma chia ya Mualoni Gholaghuya.”

³⁸ Niko Zebuli ukamzera, “Oke seji kooghambagha wei, Abimeleki nani hata dimdumikie? Welee, Awa siwo weni wandu korewimenyagha? Oke fuma idana kulo nawo.”

³⁹ Niko Gaali ukawilongoza wandu wa Shekemu, ukawifunya kulwa na Abimeleki.

⁴⁰ Nao Abimeleki ukammbinga, na Gaali ukakimbia imbiri kwake, wandu wengi wikashoghonolwa hata mnyangonyi ghwa mbenge.

⁴¹ Abimeleki ukakaia Aruma, na Zebuli ukammbinga Gaali na waruna wifume Shekemu; kwa huwo ndeweredimieghe kukaia aho anduangi.

⁴² Nakesho, Abimeleki ukaghorelwa kukaia wandu wa Shekemu waawuyafuma shighadi noko cha mbuwenyi.

⁴³ Nao ukawada wandu wake na kuwiwagha mafungu adadu, wikawilaliria mbuwenyi. Hata iji orewiwonieghe wandu wikicha kufuma mzinyi, ukawiwukia na kuwibwagha.

⁴⁴ Abimeleki chiaimweri na jija ifungu ja wandu werekwanyeghe, wikashashira kughenda imbiri; wikakaia kimusi aho mbengenyi ya muzi, na ghaja mafungu awi gha wandu wake, wikawingiria wandu werekoghe mbuwenyi na kuwibwagha wose.

⁴⁵ Abimeleki ukalwa na wandu wa ghuja muzi dii, ukaghuwada ghuja muzi, ukabwagha wandu werekoghe andenyi yaro; ukaghuwudua ugho muzi, na kughudunga chumbi.

⁴⁶ Hata iji vilongozi va wandu werekoghe Mnara ghwa Shekemu wasikira agho, wikangia andenyi ngomenyi ya nyumba ya El-berethi.

⁴⁷ Abimeleki ukaghorelwa kukaia wandu wose werekoghe Mnara ghwa Shekemu wakwanyika chiaimweri.

⁴⁸ Abimeleki ukajoka Mghondi ghwa Zalmoni andwamweri na wandu wose orekwanyeghe nawo. Ukadwa isoka mkonunyi kwake, ukadema irio ja midi na kujiduka mawengenyi kwake. Ukawizera waja wandu orekwanyeghe nawo, “Ijo mchaaniwona ngijibonya, mshashire kujibonya.”

⁴⁹ Niko huwo, awo wandu wose wikadema mario ghawo gha midi wikamnugha Abimeleki na kusaghika iyo midi wurighenyi ghwa ngome. Wikakora iyo ngome, na wandu wose wa ugho mnara ghwa Shekemu wokoni, wikafwa; sa wandu elfu imweri waka na womi.

⁵⁰ Nao Abimeleki ukaghenda Thebesi ukabonya kambi na kughuwusa ugho muzi.

⁵¹ Ela korekoghe na mnara ghumange andenyi ya ugho muzi; wandu wose wa ugho muzi wikakimbiria aho, womi na waka na kukurughia andenyi; wikajoka aighu ya ipaa ja ugho mnara.

⁵² Abimeleki ukacha mnarenyi, ukasoghoda kaavui kulwa nawo, ukasoghoda kaavui na mnyango ghwa mnara upate kughukora.

⁵³ Niko muka umu ukampotuya igho jesha chongonyi kwake ukachibara.

⁵⁴ Nao shwa ukammbanga uo mdawana oremdwaiagha maswagha ukamzera, “Funya lufu lwako kunibwaghe wandu wisecheghora wei, ‘Oobwaghwa ni muka.’” Nao uo mdawana wa irika ukalukua lufu lwake, ukamdunga nalo; ukafwa.

⁵⁵ Wandu wa Israeli wiendawona angu Abimeleki wafwa, wikaghenda kula mundu nyumbenyi kwake.

⁵⁶ Niko huwo, Mlungu ukamlipa Abimeleki ghuja wuwiwi oreghubonyereghe kwa ndee, kwa kuwibwagha waruna mirongo mfungade;

⁵⁷ wokoni Mlungu ukalipia ghuja wuwiwi ghorebonyeroghe ni wandu wa Shekemu; wikachelwa ni njowe sa iji koni Jothamu mwana wa Jerubaali orewilodereghe.