WATANYI 6 - Biblia Ilagho Jiboie Kwa Wandu Wose

Gideoni

¹ Wandu wa Israeli wikam'bonyera BWANA kaung'a sena, na BWANA ukawikumba mikonunyi kwa Wamidiani miaka mfungade.

² Wamidiani wikakaia na ndighi aighu ya Waisraeli, hata Waisraeli wikakubonyera weni vizimba vekaia mighondinyi, na mbangenyi, na ngome rekuvisa.

³ Angu ngelo yose Waisraeli werewaeghe miwalwa mbuwenyi kwawo, awo Wamidiani na Waamaleki chiaimweri na wandu wa mashariki werejokieghe na kuwingiria Waisraeli.

⁴ Werekoghe wikicha na kupanga kambi rawo aho, wikanona iyo miwalwa hata kuvika Gaza. Ndewerewisighieghe Waisraeli kilambo chingi, hata ng'ondi, ng'ombe na punda wikariwusa putu.

⁵ Werechieghe na mfugho rawo chiaimweri na hema rawo karakara na zighe. Werekoghe wengi wisetalikagha chiaimweri na ngamila rawo, wikajinona isanga iji werekoghe wikicha.

⁶ Israeli ukakorongwa ni Wamidiani na ndighi hata wandu wa Israeli wikamkemia BWANA.

⁷ Nao iji wandu wa Israeli weremkemieghe BWANA uwitesie kwa wundu ghwa Wamidiani,

⁸ BWANA ukawidumia mlodi na kuwizera, “BWANA Mlungu wa Israeli waghamba huwu, Neremfunyireghe Misri isanga ja wuzumba;

⁹ ngamkira kufuma kwa Wamisri, na wandu wose weremkorongieghe chienyi, ngamghenja ngiwiwinga imbiri konyu hata ngamneka isanga jawo.

¹⁰ Niko ngamzera kukaia ini ne Bwana Mlungu onyu, msaketasa milungu ya Waamori awo mwawuyakaia isangenyi jawo. Ela ndemorenisikireghe anduangi.”

¹¹ Niko malaika wa Bwana ukacha muzi ghwa Ofra, ukasea kidombo aisi ya mualoni, ghorekoghe mali ya Joashi, Muabiezeri, na mwana wake Gideoni orekoghe ukikaba ngano andenyi ya kidu chekamia divei eri ukuvise usewono ni Wamidiani.

¹² Malaika wa Bwana ukamfutukia ukamzera, “BWANA oko andwamweri na kumoni, oho ing'oni jiwadie ndighi.”

¹³ Gideoni ukamzera, “Nga Bwana, ikakaia BWANA oko andwamweri nesi, kwaki sena dapatwa ni iri maza rose? Iro kazi rake ra mashiniko dighorelo ni weke aba reko hao, iro werekoghe wikidighoria, wei BWANA wadifunyire isanga ja Misri? Ela idana BWANA wadisighie na kudikumba mikonunyi kwa Wamidiani.”

¹⁴ BWANA ukamghalukia na kumzera, “Ghenda na ireni ndighi rako iri, kupate kuwivuvua Waisraeli kufuma mikonunyi kwa Wamidiani. Ni ini moni nawuyakuduma.”

¹⁵ Gideoni ukamzera “Nga Bwana, nidima wada kuwikira Israeli nani ngifuma kwa kichuku kitini cha mbari ya Manase, sena ni ini mtini andenyi ya nyumba ya mzedu.”

¹⁶ BWANA ukamzera, “Ini nichakaia andwamweri na oho, na oho kuchawikaba Wamidiani seji ni mundu umweri.”

¹⁷ Gideoni ukamzera, “Ikakaia kwaniwona nafwane, niwonyere alama ewonyera andu ni oho kwadedanya na ini.

¹⁸ Nakulomba kuseinjike aha hata nameria kukuredia inosi japo.” Ukatumbulia, “Nikaia hata kuwuye.”

¹⁹ Niko Gideoni ukaghenda nyumbenyi kwake, ukaboisa mwana wa mburi, na mikate isewadie chachu kufuma kwa efa imweri ya mufu. Ukakumbiria nyama kikapunyi, na supu ukaidungiria nyungunyi, ukavireda aisi ya mualoni na kuviwika imbiri kwake.

²⁰ Malaika wa Mlungu ukamzera, “Wada nyama na mkate ghusewadie chachu kuviwike aighu ya igho iji, nao kudunge supu aighu yaro.” Ukabonya wokoni.

²¹ Niko malaika wa Bwana ukaghorua ghuja mzata ghorekoghe mkonunyi kwake ukaviadada vija vindo na mudo ghwa mzata ghwake. Modo ghukafuma ighonyi, ghukakora ija nyama na mkate ghusewadie chachu; malaika wa bwana ukalaghaya mesonyi kwake.

²² Niko Gideoni ukamanya angu uja ni malaika wa BWANA, ukaghamba, “Oe! E BWANA Mlungu! Nammbona malaika wa BWANA kwa wushu.”

²³ Bwana ukamzera, “Kusakeobua, kaia na sere; ndekufwagha kungi.”

²⁴ Nao Gideoni ukamuaghia BWANA madhabahu aho na kuiwanga, “Bwana nuo sere.” “Nayo yaduagha aho Ofra ya Wabiezeri hata linu.”

²⁵ Kio chija BWANA ukamzera Gideoni, “Wada njau ya ndeyo, ija njau ya kawi ya miaka mfungade, nao kuichikanye iyo madhabahu ya ndeyo oremuaghieghe Baali, na ghuja mlungu ghwa waka Ashera ghuko na mbai ya iyo madhabahu.

²⁶ Kumuaghie BWANA Mlungu wako madhabahu andu kwa ighu kwa magho seji ifwane; nao kuwade ija njau ya kawi kuifunye ikaie kizongona chekora na iro mbande ra Ashera uo kwamchikanya.”

²⁷ Niko Gideoni ukawada wandu ikumi wa wadumiki wake, ukabonya sa iji koni BWANA oremzerieghe; ela ukabonya maza iro rose nakio, kwa kukaia orekoghe ukiwiobua wandu wa kinyumba cha mzawo, na wandu wa muzi.

²⁸ Nao iji wandu wa muzi werewukieghe nakesho wikawona madhabahu ya Baali imerie kuchikanywa chiaimweri na ghuja mlungu ghwa waka Ashera ghorekoghe na mbai ya iyo madhabahu, na wokoni ija njau ya kawi imerie kufunywa kizongona aighu ya iyo madhabahu ereaghiloghe.

²⁹ Wikakotiana weni na weni, “Nani ubonyere ilagho iji?” Hata nyuma ya kukotia maza iro, wikamanya na kughamba, “Gideoni mwana wa Joashi nuo ubonyere ilagho ijo.”

³⁰ Wandu wa muzi wikamzera Joashi, “Funya mwana wako upate kubwaghwa, angu wamerie kuichikanya madhabahu ya Baali na kuinja Ashera uja orekoghe na mbai yaro.”

³¹ Ela Joashi ukawizera awo wandu wose werekoghe wikisimana nao, “Wele muasimana aighu ya Baali? Angu muamdederia? Uo ose umdederiagha uchabwaghwa kesho. Ikakaia uo ni mlungu, ndekudederie moni angu madhabahu yake yachikanywa.”

³² Kwa huwo ituku ijo Gideoni ukawangwa Jerubaali; na kutambua kwaro ni “Baali ndekudederie moni,” angu oreichikanyireghe madhabahu yake.

³³ Niko Wamidiani, Waamaleki na wandu wose wa Mashariki wikakwana chiaimweri, wikaruwuka Moda ghwa Jordani na kubonya kambi aja vololonyi ya Jezreeli.

³⁴ Roho wa Mlungu ukamchea Gideoni, nao ukakaba tarumbeta kuwiwanga Wabiezeri wipate kumnugha.

³⁵ Ukaduma wandu kwa mbari ya Manase yose, na mbari ya Asheri, Zebluni na Naftali wipate kumnugha; nawo wose wikajoka kukwana nao.

³⁶ Niko Gideoni ukamzera Mlungu, “Ikakaia oho kuchawikira Waisraeli kwa mkonu ghwapo sa iji kughorie,

³⁷ ola ini niawika mafuri gha ng'ondi wazenyi echania ngano; kukareda mami aighu ya agho mafuri ghiekeri na ndoe yose isigharikie iomie, niko nichaamanya angu oho kuchawikira Israeli sa iji koni kughorie.”

³⁸ Nao ikakaia woruwo; ukawuka nakesho kio, ukakama agho mafuri ukachura bakuli imweri ya machi.

³⁹ Niko Gideoni ukamzera Mlungu, “Kusakebonya machu aighu yapo, leka nighore indo jimweri. Nakulomba kunisighe nitime agha mafuri indo jimu. Idana mafuri ndeghisigharike ghiomie, na ndoe ikaie na mami.”

⁴⁰ Nao Mlungu ukabonya woruwo kio chija; nakesho mafuri ghikakaia ghiomie na ndoe ikachua mami.