WATANYI 21 - Biblia Ilagho Jiboie Kwa Wandu Wose

Waka kwa wundu ghwa kichuku cha Benjamini

¹ Idana wandu wa Israeli werebonyereghe ighemi aja Mispa huwu: “Mndungi odu ndefunyagha mwai wake ulowolo ni Wabenjamini.”

² Niko awo wandu wa Israeli wikaghenda Betheli na kusea kidombo imbiri ya Mlungu hata luma lwa kenyi. Wikakema na kulila kwa kuwawa wikighamba,

³ “Ee BWANA Mlungu wa Israeli kwaki ilagho iji jabonyeka andenyi ya Israeli, hata ikaie idime iji mbari imu kusoweka andenyi ya Israeli.”

⁴ Na nakesho yaro, wikawuka kokesho kio, wikaagha madhabahu aho, na kufunya vizongona vekora na vizongona va mapatano.

⁵ Wandu wa Israeli wikaghamba, “Ni mbari iao aghadi ya mbari ya Israeli wiserechieghe kwa ikwanyiko ja BWANA aja Mispa?” (kwa kukaia werekoghe wabonya ighemi aja Mispa wei mndungi ukakaia usechee kwa ikwanyiko ja BWANA, Uchabwaghwa.)

⁶ Wandu wa Israeli wikawadwa ni wughoma ghwa mruna Benjamini, wikaghamba, “Mbari imweri ya Israeli yasoweka idime.

⁷ Dibonya wada diwipatire waka awandu wa Benjamini wisigharikie, nesi hoku daghemie kwa BWANA wei ndedichaawilowora wai wedu?”

⁸ Hata iji wakotia ngera oko mndungi wa mbari ya Israeli usereghendieghe ikwanyikonyi ja BWANA aho Mispa, wikawona angu wandu kufuma Jabeshi Gileadi ndewereghendieghe kwa ijo ikwanyiko.

⁹ Angu iji wandu werekoghe wikiwangwa, ndekorewonekieghe mndungi kufuma Jabeshi Gileadi anduangi.

¹⁰ Niko ijo ikwanyiko wikaduma wandu elfu ikumi na iwi wiwadie ndighi na malaghiro agha, “Ghendenyi muwibwaghe kwa lufu wandu wose wa Jebeshi Gileadi; waka na wana wori.

¹¹ Mchabonya huwu, mchatotesha kula mundu wa womi, na kula muka umerie kummanya mndwawomi.”

¹² Wikawikwa waka maghana ana aja Jebeshi Gileadi, jingi wisemmanyire mndwawomi ungi; niko wikawireda kambinyi aja Shilo iko isanga ja Kanaani.

¹³ Niko ikwanyiko jose wikawidumia momu Wabenjamini werekoghe wikikaia Igho ja Rimoni; wikawitangazira sere.

¹⁴ Wabenjamini wikawuya; na Waisraeli wikawineka awo waka werefumieghe Jabeshi Gileadi, ela sena ndewerewikateghe anduangi.

¹⁵ Wandu wikawadwa ni wughoma aighu ya Benjamini, angu BWANA orekoghe waghudumbua wumweri ghwa wandu wa Israeli.

¹⁶ Vilongozi wa ijo ikwanyiko wikaghamba, “Dibonya wada diwipatire waka waja Wabenjamini wisigharikie wisewadie waka, na waka wamerie kubwaghwa andenyi ya Benjamini?”

¹⁷ Nao wikaghamba, “Suti Wabenjamini wisigharikie wipate ifwa; eri iyo mbari iselaghae putu andenyi ya Israeli.

¹⁸ Sena ndedidimagha kuwilowora wai wedu. Kwa kukaia daghemie mndungi ukafunya mwai wake ulowolo ni Wabenjamini, uwado ni njowe.”

¹⁹ Niko wikaghamba, “Zighanenyi deko na ndima ya BWANA ya kula mwaka aja Shilo, kuko cha magharibi ya Betheli, mashariki ya ija chia mbaa ijokagha kufuma Betheli hata Shekemu cha kusinyi ya Lebona.”

²⁰ Nao wikawizera Wabenjamini, “Ghendenyi mkuvise andenyi mizabibunyi,

²¹ mzighanireghee; wai wa Shilo wikafuma na kucha kuvina, mfume mizabibunyi na kuwiwada kula mundu muka wake, nao mghende nawo cha isangenyi ja Benjamini.

²² Hata iji weke ndee angu waruna wa womi wareda malalamiko ghawo kodu, isi dichawizera ‘Difuyenyi wughoma muwitesie; kwa kukaia ndederewidwaeghe wunyika kufuma wudenyi, hata inyo ndemorewifunyireghe kwa kukunda konyu; kwa huwo inyo ndemko na ikosa jingi kunughana na ighemi morejibonyereghe.’”

²³ Niko Wabenjamini wikabonya woruwo, wikawusa waka kunughana na mtalo ghwawo kufuma kwa awo werechieghe kuvina, wikaghenda nawo; wikawuya andu kwawo, wikaagha mizi, na kukaia aho.

²⁴ Wandu wa Israeli wikafuma aho ngelo iyo, wikaghenda kula mundu kwa mbari yake na nyumba yake, na kula mundu ukanugha ifwa jake.

²⁵ Matuku agho ndekorekoghe na mzuri ungi andenyi ya Israeli; kula mundu orebonyereghe sa iji koni orekundieghe moni.