WATANYI 13 - Biblia Ilagho Jiboie Kwa Wandu Wose

Kuvalwa kwa Samsoni

¹ Wandu wa Israeli wikam'bonyera BWANA kaung'a sena na BWANA ukawifunya mikonunyi kwa Wafilisti kwa miaka mirongo ina.

² Korekoghe na mndumu muzi ghwa Sora wa mbari ya Dani, irina jake orewangwagha Manoa, mkake orekoghe kolowi, nao nderemvaieghe wana wangi.

³ Malaika wa BWANA ukamfutukia uja muka ukamzera, “Zighana oho ko kolowi kusewadie wana wangi, ela kuchapata kifu kuve mwana wa womi.

⁴ Kwa huwo kukulindie kusenyo divei angu kindo chingi chewongera, hata kusakeja kindo chingi chiseelie.

⁵ Zighana kuchakaia na kifu, kuve mwana wa womi. Jingi usearo chongo chake, angu uo mwana uchakaia Mnaziri kwa Mlungu kufuma kuvalwa kwake; nao uchazoya kuikira Israeli kufuma kwa Wafilisti.”

⁶ Niko uja muka ukaghenda na kumghoria mumi wake, “Mundu wa Mlungu wacha kwapo, na kuwoneka kwake kodeeka sa kwa malaika wa Mlungu uoboshagha na ndighi. Simkotere ngera wafuma hao, nao ndenighorie irina jake;

⁷ ela wanizera huwu, ‘Ola kuchakaia na kifu, kuve mwana wa womi, kwa huwo kusenyo divei, angu kindo chingi chewongera, hata kusakeja vindo viseelie; angu uo mwana uchakaia Mnaziri kwa Mlungu kufuma kuvalwa kwake hata kufwa kwake.’”

⁸ Niko Manoa ukamlomba BWANA ukighamba, “Ee BWANA, nakulomba angu kumdume uo mundu wa Mlungu kumdumieghe udichee sena, udifundishe seji dichaam'bonyera uo mwana uchaavalwa.”

⁹ Nao Mlungu ukamsikira Manoa, na malaika wa Mlungu ukamchea uja muka sena uko kidombo mbuwenyi; ela mumi wake Manoa nderekwanyeghe nao.

¹⁰ Uja muka ukakimbia shwa-shwa, ukamghoria mumi, “Ola uja mundu orechieghe kwapo jija ituku wanifutukia.”

¹¹ Manoa ukawuka ukanughana na mkake, ukacha kwa uja mundu ukamzera, “Oho ko uja mundu orededanyeghe na uhu muka?” Ukaghamba, “Ni ini moni.”

¹² Manoa ukamzera, “Malagho ghako ghikawuya gha loli-lee, uo mwana uchabonya wada na irangi jake jichakaia wada?”

¹³ Malaika wa BWANA ukamzera Manoa, “Agho ghose nimlaghirie mkako, ughilindie.

¹⁴ Useje kilambo chingi chibonywagha kwa zabibu, hata usenyo divei angu kindo chingi chewongera, hata usakeja kindo chingi chiseelie. Agho ghose nimlaghirie ughilindie.”

¹⁵ Manoa ukamzera malaika wa BWANA, “Nakulomba kuweserie nikuboisire mwana wa mburi.”

¹⁶ Malaika wa BWANA ukamzera Manoa, “Kukanibonya niweserie sichaaja vindo vako, ela kukawika kizongona chekora tayari, kuchifunye kwa BWANA.” (Kwa kukaia Manoa nderemanyireghe wei ni malaika wa BWANA.)

¹⁷ Manoa ukamzera malaika wa BWANA, “Irina jako nani, eri malagho ghako ghikawuya gha loli dikuneke ishima?”

¹⁸ Malaika wa BWANA ukamzera, “Kwaki kukotiagha irina japo, na irina ijo ni ja mashiniko?”

¹⁹ Niko Manoa ukawada ndaghina na kizongona cha viro, ukavifunya kizongona kwa BWANA aho ighonyi, uo BWANA ubonyagha mashiniko.

²⁰ Nao iji lumu lorekoghe lukijoka cha mlungunyi kufuma madhabahunyi, malaika wa BWANA ukajoka andenyi ya ulo lumu lwa modo Manoa na mkake wikizighana; wikaghwa kiwushu-wushu andoenyi.

²¹ Malaika wa BWANA nderewifutukiege Manoa na mkake sena anduangi. Niko Manoa ukamanya angu uo odeeka ni malaika wa BWANA.

²² Manoa ukamzera mkake, “Kwa loli daakola dafwa, angu dammbona Mlungu.”

²³ Ela mkake ukamzera, “Ngera BWANA odekunda kudibwagha, kumangu ndachirumiriagha kizongona chekora na mafunyo gha viro kufuma mikonunyi kodu, angu kudiwonyera maza iri rose na kudighoria malagho agho ghose.”

²⁴ Uja muka ukava mwana wa womi, ukammbanga irina jake Samsoni; mwana ukazoghua, na BWANA ukamrasimia.

²⁵ Roho wa BWANA ukazoya kumnyavura aho Mahanedani ghadi na ghadi ya Sora na Eshtaoli.