WATANYI 12 - Biblia Ilagho Jiboie Kwa Wandu Wose

Jefitha na Waefraimu

¹ Wandu wa Efraimu wikakuwika tayari kwa wuda; wikaruwuka moda ghwa Jordani hata Safoni, wikamzera Jefitha, “Kwaki koreruwukagha kwendelwa na Waamoni kusedighorie dikaghendanya? Dichakukoronga na nyumba yako.”

² Jefitha ukawizera, “Ini na wandu wapo derengirieghe andenyi ya marashano mabaa na Waamoni; nani iji neremmbangieghe, ndemorechieghe kunivuvua na mikonu yawo.

³ Nani niendawona ndemchaanivuvua, ngakuwika ndengonyi, ngaruwuka kwa Waamoni, na BWANA ukawingira mikonunyi kwapo; Idana kwaki mchagha kwapo idime kulwa nani?”

⁴ Nao Jefitha ukakwanya wandu wose wa Gileadi, ukalwa na Efraimu na kuwisima; angu wereghambieghe, “Inyo Wagileadi muko andenyi ya Efraimu na Manase, mo watoro mfumie kwa Efraimu.”

⁵ Nao Wagileadi wikaviwada viruwuko va Jordani kuwitangala Waefraimu, eri mtoro ungi ufumagha Efraimu ukakunda kuruwuka, wandu wa Gileadi wipate kumkotia, “Oho ko Muefraimu?” nao ukatumbulia “Hata,”

⁶ niko wichaamzera, “Idana ghora, Shibolethi.” Nao uchaghora “Sibolethi,” angu usedimagha kughora ijo ilagho nicha; niko aho wichammbwada, na kum'bwagha aho viruwukonyi va Jordani. Ngelo iyo wandu wa Efraimu wikabwaghwa elfu mirongo ina na iwi.

⁷ Jefitha ukawitanya Israeli kwa miaka irandadu; niko ukafwa, ukarikwa mzinyi kwa Gileadi.

Ibzani, Eloni, na Abdoni

⁸ Nyuma ya Jefitha, Ibzani wa Bethlehemu ukawitanya Israeli.

⁹ Orekoghe na wadawana mirongo idadu, na wai mirongo idadu awo orewifunyireghe wikalowolwa cha shighadi ya kichuku chake; na kuwireda wai mirongo idadu kufuma shighadi ya kichuku chake wilowolo ni wadawana wake. Nao ukatanya Israeli kwa miaka mfungade.

¹⁰ Niko Ibzani ukafwa, ukarikwa Bethlehemu.

¹¹ Nyuma ya Ibzani, Eloni, Mzebluni, ukawitanya Israeli kwa miaka ikumi.

¹² Niko Eloni, Mzebluni, ukafwa; ukarikwa aja Aijaloni andenyi ya isanga ja Zebluni.

¹³ Nyuma ya Eloni, Abdoni mwana wa Hileli, Mpirathoni ukawitanya Israeli.

¹⁴ Orekoghe na wana mirongo ina, na weke wawae mirongo idadu; werejokagha weke punda mirongo mfungade; ukatanya Israeli kwa miaka wunyanya.

¹⁵ Niko Abdoni mwana wa Hileli, Mpirathoni ukafwa; ukarikwa aja Pirathoni andenyi ya isanga ja Efraimu, andenyi ya isanga ja mighondinyi ya Waamaleki.