WATANYI 10 - Biblia Ilagho Jiboie Kwa Wandu Wose

Tola

¹ Nyuma ya kifwa cha Abimeleki, Tola mwana wa Pua, wawae Dodo, mundu wa mbari ya Isakari, ukawuka kuwikira Waisraeli; nao orekoghe ukikaia Shamiri, isanga ja mighondinyi ja Efraimu.

² Nao ukatanya Israeli kwa miaka mirongo iwi na idadu. Niko ukafwa na kurikwa aho Shamiri.

Jairi

³ Nyuma yake, ukawuka Jairi, Mgileadi, uo orewitanyireghe Israeli kwa miaka mirongo iwi na iwi.

⁴ Nao orekoghe na wadawana mirongo idadu awo werejokagha weke punda mirongo idadu; nawo werekoghe na mizi mirongo idadu iwangwagha: Havoth-jairi hata idime; nayo yadakaia andenyi ya isanga ja Gileadi.

⁵ Jairi ukafwa, ukarikwa aho Kamoni.

Jefitha

⁶ Wandu wa Israeli wikam'bonyera BWANA kaung'a sena; wikawidumikia weke Baali na Ashtarothi, chiaimweri na milungu ya Siria, na Sidoni, ya Moabu na ya Waamoni, na milungu ya Wafilisti, wikamsigha BWANA hata ndeweremdumikieghe anduangi.

⁷ BWANA ukajokwa ni machu aighu ya Israeli ukawisigha wingie mikonunyi kwa Wafilisti na kwa Waamoni.

⁸ Wikawikoronga na kuwitirira Waisraeli mwaka ugho. Wikawikoronga Waisraeli wose werekoghe wikikaia kimonu cha Jordani, andenyi ya isanga ja Waamori jiko Gileadi kwa miaka ikumi na wunyanya.

⁹ Wokoni Waamoni wikaruwuka Jordani wipate kulwa na mbari ya Juda, na Benjamini, na Efraimu; Waisraeli wikakaia na wasi loli-loli.

¹⁰ Niko wandu wa Israeli wikamkemia BWANA wikighamba, “Dabonyere kaung'a imbiri kwako, kwa kukaia dakusighie oho Mlungu odu na kudumikia weke Baali.”

¹¹ BWANA ukawizera wandu wa Israeli, “Welee, Ini seremkirieghe kufuma kwa Wamisri na kufuma kwa Waamori, na Waamoni, na kwa Wafilisti?

¹² Hata Wasidoni, na Waamaleki, na Waamoni, weremkorongieghe; mkanililia, nani ngamkira.

¹³ Chiaimweri na agho, morenisighieghe ini, mkadumikia milungu mizima; kwa huwo sichaamkira sena.

¹⁴ Ghendenyi muikemie milungu yenyu iyo moreisaghueghe, nayo ndeimkire ngelo ya wasi ghonyu.”

¹⁵ Wandu wa Israeli wikamzera BWANA, “Isi dabonyere kaung'a, dibonye sa iji kuwonagha nicha oho kumoni, ela tu dakuvoya kudikire idime jeni.”

¹⁶ Wikainja milungu ya kighenyi kufuma kwawo, wikamdumikia BWANA; nao ukawawa kwa wundu ghwa wasi ghwa Waisraeli.

¹⁷ Niko ijeshi ja Waamoni wikakutumbanya kwa wuda; wikabonya kambi yawo Gileadi; wandu wa Israeli nawo wikakwana chiaimweri wikabonya kambi yawo Mispa.

¹⁸ Na awo wandu, na vilongozi va vichuku va Israeli wikazerana weni na weni, “Ni mundu uao uchaazoya kulwa na Waamoni? Uo mundu uchakaia m'baa aighu ya wandu wose wa Gileadi.”