WATANYI 1 - Biblia Ilagho Jiboie Kwa Wandu Wose

Kichuku cha Juda na Simeoni kuwada Adonibezeki

¹ Nyuma ya kifwa cha Joshua, wandu wa Israeli wikamkotia BWANA, “Nani uchaakaia wa imbiri kujoka kwa wundu ghodu kulwa na Wakanaani?”

² BWANA ukaghamba, “Kichuku cha Juda chichakaia cha imbiri kujoka; nani najingira isanga ijo mikonunyi kwawo.”

³ Niko wandu wa Juda wikawizera wandu wa Simeoni, “Jokenyi andwamweri nesi kwa ijo isanga derenekeloghe, dipate kulwa na Wakanaani, nesi dichaghendanya nenyo kwa ijo isanga morenekeloghe.” Niko kichuku cha Simeoni wikajokanya nawo.

⁴ Juda wikajoka wudenyi, na BWANA ukawingira Wakanaani na Waperizi mikonunyi kwawo; wikawisima wandu elfu ikumi aja Bezeki.

⁵ Wikamchea Adonibezeki aho Bezeki, na kuwisima Wakanaani na Waperizi.

⁶ Adonibezeki ukakimbia; ela wikamnugha, wikammbwada na kumdumbua vala vake va maghosi na mano ghake gha maghosi.

⁷ Adonibezeki ukaghamba, “Wazuri mirongo mfungade widumbulo vala vawo va maghosi na mano ghawo gha maghosi, werekoghe wikishoa makombo aisi ya meza yapo. Mlungu wanibonyera sa iji koni nerebonyereghe.” Nao wikamreda Jerusalemu, ukafuya aho.

Kichuku cha Juda kusima Jerusalemu na Hebroni

⁸ Wandu wa Juda wikalwa na Jerusalemu, na kughuwada ugho muzi. Wikawibwagha wandu werekoghe aho kwa lufu na kukora ugho muzi.

⁹ Kufuma aho wikafuma kwendalwa na Wakanaani awo werekoghe wikikaia isanga ja mighondinyi, na ja kusinyi, na ja kirindinyi.

¹⁰ Wikawighendia Wakanaani awo werekoghe wikikaia muzi ghwa Hebroni, ugho ghorewangwagha Kiriath-araba; wikawisima Sheshai, Ahimani na Talmai.

Othinieli kughusima muzi ghwa Debiri

¹¹ Kufuma aho, wandu wa Juda wikaghughendia muzi ghwa Debiri, ugho ghorewangwagha koimbiri, Kiriath-seferi.

¹² Nao Kalebu ukaghamba, “Uo ose uchaakaba muzi ghwa Kiriath-seferi na kughusima, nichamlowora mwai wapo Aksa.”

¹³ Niko aho Othinieli mwana wa Kenazi, mruna mtini wa Kalebu, ukaghuwada ugho muzi, na Kalebu ukamlowora mwai wake Aksa.

¹⁴ Nao iji walowolwa, ukamvoya Othinieli umrumirie uendelomba ndoe kwa ndee. Nao Aksa ukasea kufuma kwa punda wake na Kalebu ukamkotia, “Kwakunde kii?”

¹⁵ Ukamtumbulia, “Neekunda kuninose; angu hoku kwaniwika isanga jiomie ja kusinyi, kunineke na ndoria ra machi wori.” Niko Kalebu ukamneka ndoria ra lughu na ra naisi wori.

Wusimi ghwa mbari ya Juda na Benjamini

¹⁶ Kivalwa cha mghosi wake Musa awo Wakeni wikajokanya na mbari ya Juda, kufuma muzi ghwa mitende ghuko kireti cha Juda noko cha kusinyi kaavui na Aradi; wikaghendanya na kukanya na awo wandu.

¹⁷ Wandu wa Juda wikajokanya na wandu wa mruna Simeoni, wikawisima na kuwitotesha putu Wakanaani werekoghe wikikaia Sefathi. Muzi ugho ghukawangwa irina jake Horma.

¹⁸ Wokoni Juda ukawada Gaza, Ashkeloni, na Ekroni chiaimweri na mipaka yawo.

¹⁹ BWANA ukawitesia wandu wa Juda kujiwusa isanga ja mighondinyi, ela wikalemwa ni kuwiwinga wandu werekoghe wikikaia kirindinyi, angu awo werekoghe na magare gha chuma.

²⁰ Kalebu ukanekwa Hebroni sa iji koni Musa orelaghirieghe, nao moni ukawiwinga awo wana wadadu wa Anaki.

²¹ Ela wandu wa Benjamini ndewerewingieghe Wajebusi awo werekoghe wikikaia Jerusalemu, na kufuma aho Wajebusi wikakaianya na wandu wa Benjamini hata idime.

Mbari ya Efraimu na Manase kusima Betheli

²² Na wokoni wandu wa Josefu wikajoka kulwa na Betheli. BWANA ukakaia andwamweri nawo.

²³ Wandu wa Josefu wikaduma washeki kwendazighana Betheli (ugho kala ghorewangwagha Luzu.)

²⁴ Nawo wikammbona mndumu ukifuma mzinyi wikamzera, “Dakulomba kudiwonyere chia engia cha mzinyi, nesi dichakubonyera nicha.”

²⁵ Ukawiwonyera chia engia cha mzinyi, nawo wikaghukaba ugho muzi, ela wikamlekeria uja mundu na wandu wose wa nyumbenyi kwake.

²⁶ Uo mundu ukaghenda cha kwa Wahiti, ukaagha muzi aho, ukaghuwanga Luzu na ijo jikawuya irina ja ugho muzi hata idime.

Wandu awa wiserewingiloghe ni Waisraeli

²⁷ Kichuku cha Manase ndecherewiwingieghe wandu awo werekoghe wikikaia Beth-sheani chiaimweri na mizi yaro mitini, hata Taanaki na mizi yaro mitini, hata na wandu werekoghe wikikaia Ibleamu na mizi yaro mitini, hata na wandu werekoghe wikikaia Megido, na mizi yaro mitini; Wakanaani ndewererumiriloghe kujisigha ijo isanga.

²⁸ Ela iji Waisraeli wachurikia ndighi wikawidumikisha awo Wakanaani; ela ndewerewiwingieghe anduangi.

²⁹ Mbari ya Efraimu ndeerewiwingieghe Wakanaani werekoghe wikikaia muzi ghwa Gezeri; kwa huwo Wakanaani wikadua aghadi kwawo.

³⁰ Mbari ya Zebluni ndeerewiwingieghe awo wandu werekoghe wikikaia andenyi ya iyo mizi ya Kitroni na Nahalali; kwa wundu ugho, Wakanaani wikadua aghadi kwawo, nawo wikadumikishwa.

³¹ Mbari ya Asheri ndeerewiwingieghe awo wandu werekoghe wikikaia andenyi ya iyo mizi ya Ako, Sidoni, Ahlabu, Akzibu, Helba, Afeki, na Rehobu.

³² Wandu wa Asheri wikakaianya na waisanga wa Kanaani angu werelemeloghe ni kuwifunya.

³³ Mbari ya Naftali ndeerewiwingieghe awo wandu werekoghe wikikaia andenyi ya mizi ya Beth-shemeshi na Beth-anathi. Wandu wa Naftali werekanyeghe na waisanga wa Kanaani, ela wikawibonya wikaie wadumiki wawo.

³⁴ Waamori wikawitangala wandu wa mbari ya Gadi, na kuwiwinga cha isanga ja mighondinyi; hata ndewerewisighieghe kusea cha kirindinyi anduangi.

³⁵ Waamori wikadua wikikaia Aijaloni, Shaalbimu, na mghondi ghwa Heresi. Ela mbari ya Efraimu na Manase wikawiwika aisi ya nguma yawo wikawibonya wiwidumikieghe.

³⁶ Mpaka ghwa Waamori ghukajokeria mishoromoto ya Akrabimu kufuma Sela ya kaskazinyi na nokolughu.