WALAWI 5 - Biblia Ilagho Jiboie Kwa Wandu Wose

Maza refunyirwa vizongona kwa wundu ghwa kaung'a

¹ “Mndungi ukawangwa kufunya wushahidi ghwa maza urisikire angu kuriwona, nao ulemo ni kughora; uchatalwa kukaia mkosi.

² “Mndungi ukawada kilambo chiseelie usemanyire, ikaiagha ni gharia ya nyamandu ya isakenyi, angu ifughilo, angu shimandu nao uluo, uchatalwa kukaia mkosi.

³ Mndungi ukawada wuchafu ghungi ghwa mdamu ugho ghose ghudimagha kum'bonya uluo usemanyire, ingelo wachamanya, uchatalwa kukaia mkosi.

⁴ “Mndungi ukabonya ighemi kisha kisha usemanyire usepimagha, ikaiagha ni jebonya kiwiwi angu nicha usemanyagha, ingelo wachamanya, uchatalwa kukaia mkosi.

⁵ “Mndungi ukakaia mkosi aghadi ya jingi ja agha, uchairumiria kaung'a yake iyo oreibonyereghe;

⁶ nao uchafunya kizongona kwa BWANA kwa wundu ghwa iyo kaung'a oreibonyereghe. Uchafunya kufuma chaghenyi ng'ondi angu mburi ya waka ikaie kizongona kwa wundu ghwa kaung'a; na mkohani uchabonya mapatano kwa wundu ghwa kaung'a yake.

⁷ “Ela ikakaia ndedimagha kupata mwana wa ng'ondi uchareda kwa BWANA vana viwi va mbughi angu maringo awi kukaia kizongona kwa wundu ghwa kaung'a yake; imu ikaie kizongona kwa wundu ghwa kaung'a, na imu kwa wundu ghwa kizongona chekora.

⁸ Uchamredia mkohani, nao uchafunya kande nyonyi imu ikaie kizongona kwa wundu ghwa kaung'a; uchainyighara singo ela usetakuo chongo.

⁹ Niko uchaashinga bagha imu ya icho kizongona kwa wundu ghwa kaung'a luwarunyi lwa madhabahu, na bagha yasigharika uchaidia nandonyi ya madhabahu; ni kizongona kwa wundu ghwa kaung'a.

¹⁰ Nao uchafunya ija nyonyi ya kawi ikaie kizongona chekora, kunughana na sharia. Mkohani uchabonya mapatano kwa wundu ghwa kaung'a ya uo mundu, nao uchafuilwa wughoma.

¹¹ “Na ikakaia ndedimagha kupata mbughi iwi angu maringo awi, niko uchafunya kilo imweri ya mufu ghudendere kwa wundu ghwa iyo kaung'a uibonyere, usedunge mavuda ghangi angu vilungo; kwa kukaia ni ifunyo kwa wundu ghwa kaung'a.

¹² Nao uchaghureda kwa mkohani, ughubeghe ngonde ichue, ghukaie sa ifungu jekumbuka kukaia ghwaafunywa kwa BWANA; nao uchaghukora aighu ya vizongona madhabahunyi; ni kizongona cha vindo kwa wundu ghwa kaung'a.

¹³ Kwa chia iyo, mkohani uchabonya mapatano kwa wundu ghwa kaung'a yake, nao uchafuilwa wughoma. Masighariko gha mufu ghichawuya gha mkohani; ni kizongona cha viro.”

Vizongona kwa wundu ghwa makosa

¹⁴ BWANA ukamzera Musa,

¹⁵ “Mndungi ukabonya kaung'a usemanyire kwa kulemwa ni kulipa malipo kwa BWANA, uchareda kizongona kwa BWANA kwa wundu ghwa makosa, bauru kufuma chaghenyi iseko na itiko. Ighuri jaro jichaboiswa kunughana na malipo gha agho matuku gha Andu kwa Wueli; ni kizongona kwa wundu ghwa wuwiwi.

¹⁶ Uchalipa iyo sile ya makosa ukosere, sena uchurie mirongo iwi kwa ighana ya agho malipo na kumneka mkohani; uchaifunya iyo bauru ikaie kizongona kwa wundu ghwa makosa ghake, nao uchafuilwa wughoma.

¹⁷ “Mndungi ukabonya kaung'a aghadi ya iro BWANA orelaghirieghe risebonyo usemanyire uchakaia mkosi, nao uchalipa kwa wundu ghwa wuwiwi ghwake.

¹⁸ Uchareda bauru iseko na itiko kwa mkohani kufuma chaghenyi, na oho kuchabonya ighuri jaro kunughana na ighuri ja agho matuku; mkohani uchabonya mapatano kwa wundu ghwa kaung'a yake uibonyere usemanyire, nao uchafuilwa wughoma.

¹⁹ Ni kizongona cha malipo kwa wundu ghwa makosa, kwa wundu ghwa kaung'a uo mundu orem'bonyereghe BWANA.”