WALAWI 26 - Biblia Ilagho Jiboie Kwa Wandu Wose

Marasimio kwa wundu ghosikira

¹ BWANA ukaghamba, “Msekubonyere mlimu ghungi, angu kuwika kimusi fwana ingi iwachilo angu nguro; hata msebonye fwana ya igho jingi jiwachilo isangenyi konyu, kwa kujighoghomia na kujitasa; angu Ini ne BWANA Mlungu onyu.

² Mmbwadie ndima rapo ra dini, na kukutala Andu Kwapo kwa Wueli; Ini ne BWANA.

³ “Mkanugha sharia rapo, na kusikira malaghiro ghapo,

⁴ nichamredia vua kwa vimu varo, isanga jipate kuva viro, na midi ive matunda.

⁵ Mchakaia na vindo vingi, hata modekuwidagha viro ngelo ewaya zabibu, na kuwaya zabibu ngelo ewa viro. Muchaja vindo venyu na kughuda, na kukaia isangenyi konyu kwa sere.

⁶ “Nichamredia sere isangenyi, nenyo mchalala mseobuagha mndungi, nichainja nyamandu rose ra ndengwa isangenyi, hata ndemchaakaia na wuda isangenyi anduangi.

⁷ Mchawiwinga wamaiza wenyu na kuwisima;

⁸ wandu wenyu wasanu, wichawinga wandu ighana; na wandu wenyu ighana, wichawinga wandu elfu ikumi; nenyo mchawibwagha.

⁹ Nichamrasimia na kumneka wana wengi; nani nichajimangisha ilaghano japo nerejibonyereghe nenyo.

¹⁰ Makuwido ghenyu ghichakaia mengi nandighi ghemeria mwaka; hata ichakaia suti kuinja viro va kala, eri mdime kungira viro viwishi.

¹¹ Nichakaia aghadi konyu, hata sichazamilwa ni inyo anduangi.

¹² Nichasela aghadi konyu, nani nichakaia Mlungu onyu, nenyo mchakaia wandu wapo.

¹³ Ini ne BWANA Mlungu onyu, uo oremfunyireghe kufuma isanga ja Misri, eri msekaie wazumba wawo. Namerie kudumbua vifungo va ghongolo renyu, na kum'bonya mghende mghorokie.

Makabo kwa wundu gholeghasikira

¹⁴ “Ela iji msenisikiragha, hata kulegha kuwadia memu yapo,

¹⁵ na kuleghatala sharia rapo na kuzamilwa ni malaghiro ghapo, hata mlemo ni kurikatisha na kuchikanya ilaghano japo,

¹⁶ nicham'bonya huwu: Nichamredia maza reobosha, makongo ghiseboagha, homa rem'bwagha meso na kumeria marangi ghenyu. Mchawa viro, ela ndemchaapata kindo chingi; kwa kukaia wamaiza wenyu wichavija.

¹⁷ Nichalwa nenyo, mpate kusimwa ni wamaiza wenyu; awo wizamilwagha ni inyo, wicham'bonyera nguma; nenyo mchakimbia, ngelo mndungi usewuemmbinga.

¹⁸ “Mkalema kusikira nyuma ya agho makabo ghose, nichaghichuria makabo ghenyu mando mfungade kwa wundu ghwa kaung'a renyu.

¹⁹ Nichainja kukujosa konyu; sichaamredia vua, na ndoe ichaoma ikuo sa chuma.

²⁰ Kukufunya kose kwa kazi renyu kuchakaia kwa duu, kwa kukaia ndoe ndeichaava mavalo ghangi, na midi ndeichaafunya matunda ghangi.

²¹ “Mkachuria kuleghanisikira, nichachuria sena makabo genyu mando mfungade kunughana na kaung'a renyu.

²² Nichamredia nyamandu ribirie, ripate kumjia wana wenyu, na kubwagha ng'ombe renyu, na mtalo ghonyu ghupunguo, hata chia renyu rikwame.

²³ “Mkalegha kunighalukia nyuma ya agha makabo ghose, na kuchuria kunimenya,

²⁴ ini wori nichamghalukia na mbai na kumkaba mando mfungade kwa wundu ghwa kaung'a renyu.

²⁵ Nichamredia wuda nipate kulipia kisasi kwa wundu ghochikanya ilaghano; hata mkakukwanya chiaimweri kukulindia andenyi ya mizi yenyu, nichamredia makongo ghiserighitikagha, hata mdime mwakufunya kwa wamaiza wenyu.

²⁶ Nichapunguza vindo venyu, hata ikaie waka ikumi wioche mkate ghonyu andenyi ya iriko jimweri; wichaghuwagha ugho mkate, nenyo mchaghuja na kulemwa ni kughuda.

²⁷ “Mkachuria kunimenya na kulegha kunisikira,

²⁸ nichamghalukia na kumkaba kwa kubia mando mfungade kwa wundu ghwa kaung'a renyu.

²⁹ Njala yenyu ichakaia mbaa hata mdime mwaja wana wenyu.

³⁰ Nichakunona andu konyu kwa ighu kotasira, na kughinona madhabahu ghenyu ghefukiria marumba; nicharikumba gharia ra mimbi yenyu aighu ya milimu yenyu ifue; nichazamilwa ni inyo.

³¹ Nichabonya mizi yenyu iwue maghacho, na kunona andu konyu kotasira; nani nichavilegha vizongona venyu.

³² Nichajinona isanga jenyu putu, hata awo wamaiza wichaajikaia wishinulo ni uko kunoneka kwaro.

³³ Nani nichamredia wuda na kumsaghisa aghadi ya mbari zima. Isanga jenyu jichawuya kireti, na mizi yenyu ichawuya maghacho.

³⁴ Na isanga jichahora ngelo rose jichaakaia iduu; iyo ngelo inyo mchaakaia isanga ja wamaiza wenyu, niko ijo isanga jichahora na kukaia nicha.

³⁵ Ngelo rose ijo isanga jikaiagha iduu, jichakaia jikihora nicha kuchumba ngelo rose morekoghe mkijikaia na kuwika sabato renyu.

³⁶ “Na wamzenyu wisigharikagha wubarishonyi, nichawingiria kiture cheobua wamaiza wawo, hata malemba ghapotolwa ni mbeo, ghichawibonya wikimbie sa iji wandu wikimbiagha wudenyi; nawo wichaghwa kuseko na kuwingwa ni mndungi.

³⁷ Wichakuwarana wikikimbia kuseko na kuwingwa ni mndungi, hata ndemchakaaia na ndighi relwa na wamaiza wenyu anduangi.

³⁸ Mchafuya isanga izima, na kujighwa ni ndoe ra ijo isanga ja wamaiza wenyu.

³⁹ Awo wandu watini wichaasigharika andenyi ya isanga ja wamaiza wenyu, wichakaia wikipungua kwa wundu ghwa kaung'a rawo na kaung'a ra weke ndee.

⁴⁰ “Ela wikahea mawiwi ghawo, na mawiwi gha weke ndee, na kuja kunikalia winikalie na kunimenya,

⁴¹ nani ngawilegha na kuwireda andenyi ya isanga ja wamaiza wawo; wikaghaluka ngolonyi kwawo na kukusera, hata wiboise makosa ghawo,

⁴² niko na ini nichaakumbuka ilaghano japo nerejibonyereghe na Jakobo, Isaaka, na Abrahamu; nani nichajimangisha ilaghano japo sena, na kuwineka wandu wapo isanga.

⁴³ Ela isanga jisighwa ni wandu wake, najo jichahora andu kose jisighilo iduu; hata wameria kuboisa makosa ghawo, kwa kukaia wereleghieghe memu yapo na kuzamilwa ni malaghiro ghapo rohonyi kwawo.

⁴⁴ Elaima kwa agho ghose, ngelo wikikaia isanga ja wamaiza wawo, sichaawisigha putu hata kuvikia kuwinona anduangi, hata sichaajiinja ilaghano japo nerejibonyereghe nawo, angu Ini ne BWANA Mlungu wawo.

⁴⁵ Ela kwa wundu ghwawo, nichajikumbuka ilaghano japo sena, ijo nerejibonyereghe na weke ndee, awo nerewifunyireghe isanga ja Misri mbari zima rikiwona eri nipate kukaia Mlungu wawo; Ini ne BWANA.”

⁴⁶ Ihi niyo memu, malaghiro, na sharia iro BWANA oreriwikieghe aghadi yake na wandu wa Israeli, kuidia kwa Musa aighu ya Mghondi ghwa Sinai.