WALAWI 25 - Biblia Ilagho Jiboie Kwa Wandu Wose

Mwaka ghwa Mfungade

¹ BWANA ukamzera Musa aighu ya Mghondi ghwa Sinai,

² “Wizere wandu wa Israeli kukaia wikameria kungia ijo isanga BWANA wawuyamneka, wichamneka BWANA ishima kwa kusigha kulima mbuwa rawo kula mwaka ghwa mfungade.

³ Mchalima mbuwa renyu m'boise na kukuwida zabibu renyu kwa miaka irandadu;

⁴ ela mwaka ghwa mfungade ni gholeka mbuwa rihore. Ni mwaka ghutengelo kwa wundu ghwa BWANA; mselime mbuwa renyu, hata kuboisa mizabibu yenyu.

⁵ Msekuwide hata ivo vibukie veni, na mizabibu ivae cheni ugho mwaka; ni mwaka gholeka mbuwa rihore.

⁶ Ela hata ngera mbuwa nderilimwagha ugho mwaka, mchakaia mkija vindo vibukagha veni; inyo, na wazumba wenyu wa womi na wa waka, wandu wa kazi, na waghenyi wiko aghadi konyu;

⁷ wokoni na mfugho renyu, na nyamandu ra isakenyi, richakaia rikija agho mavalo.

Mwaka ghowunja vilambo

⁸ “Kutale miaka mfungade mando mfungade iyo ya kuhora kwa mbuwa, mando mfungade; ipate kuvika miaka mirongo ina na ikenda.

⁹ Niko kuchafunya mundu na tarumbeta ituku ja ikumi ja mori ghwa mfungade, upate kukaba tarumbeta ya Ituku ja Wukomboli isangenyi kose.

¹⁰ Kwa chia iyo kuchakaia kwaghuwika mwaka ghwa mirongo misanu kukaia ghwa wuhuru kwa wandu wose wiko isangenyi; ichakaia ni jubili konyu. Ngelo iyo, kula kilambo chereghuloghe chichawunjirwa mundu orechiuzireghe, na kula mundu oreuziroghe kukaia mzumba, uchaghala mzawo.

¹¹ Mwaka ghwa mirongo misanu, ghuchakaia jubili konyu; msewe hata kukuwida ivo viro vibukie veni, hata zabibu rivae riseboisiro;

¹² kwa kukaia iyo ni jubili, mwaka ghonyu ghueleshero; mavalo ghifumagha aho mbuwenyi ghichakaia vindo venyu veja.

¹³ “Mwaka ghwa jubili, kula mundu uchawuria vilambo vake.

¹⁴ Kwa huwo, iji mwakaghuana, msekitane.

¹⁵ Bei ichawikwa kunughana na miaka yasigharika kuvikia Mwaka ghwa Wukomboli.

¹⁶ Miaka ikakaia mingi, na bei yaro ichakaia ighu; ela ikakaia miaka yasigharika ni mitini, bei yaro ichakaia ndonyi; kwa kukaia kilambo chawuyauzwa ni mtalo ghwa mavalo ghichapatika kwa miaka yasigharika.

¹⁷ Msekitane, ela kumuobuo BWANA Mlungu wako.

Ikoto aighu ya mwaka ghwa mfungade

¹⁸ “Kuwadie sharia ra BWANA na memu yake, kupate kukaia banana isangenyi.

¹⁹ Isanga jichava mavalo gharo, na oho kuchaja kughude na kukaia banana.

²⁰ “Mndumu wadima kukotia ngera dichajaki ugho mwaka ghwa mfungade, ngelo kilambo chingi chisewalwagha mbuwenyi hata kukuwida kindo chingi.

²¹ BWANA ucharasimia isanga mwaka ghwa karandadu jipate kukaia na mavalo ghikate miaka iwi.

²² Iji kwawa mbuwa yako mwaka ghwa wunyanya, kuchakaia kukija ivo vindo korevipatireghe mwaka ghwa karandadu, na oho kuchakaia na vindo vikate veja, hata kwakuwida ivo viro koreviwaeghe mwaka ghuja ghumu.

Kuwunja vilambo

²³ “Kuseuze mbuwa yako putu, kwa kukaia si yako ingi ela ni ya Mlungu, na oho ko mghenyi na mundu oida unekelo wulalo ghoitumia.

²⁴ Mbuwa ikauzwa andu uko kose, suti isighilo wulalo ghokombolwa.

²⁵ Mwanyinyu Muisraeli ukawuya mkiwa nao ikaie suti uuze mbuwa yake, mundu wa kichuku chake cha kaavui uikombuo.

²⁶ Mundu ukakaia usewadie mndungi wa kichuku chake cha kaavui, yadimika konyuma ushame hata ukaie na pesa reikombua.

²⁷ Iji yakaia huwo, utale miaka kufuma waiuza, nao ummbunjire uja mundu oreighueghe ifungu jake, ima uikombuo.

²⁸ Ela ikakaia ndewadie mali rikate reikombua, ichasigharika mikonunyi kwa uja mundu oreighueghe, hata yavika mwaka ghwa jubili. Mwaka ugho niko ichaawunjwa kwa mundu wa mbuwa.

²⁹ “Mundu ukauza nyumba iko andenyi ya muzi ghwa wurigha, uchakaia na hachi eikombua andenyi ya mwaka mlazi kufuma ituku jija oreiuzireghe.

³⁰ Ela ukakaia useikombue andenyi ya mwaka mlazi, uchalaghasha iyo hachi yake ya kuikombua; na ija nyumba ichawuswa putu ni uja mundu oreighueghe, na kivalwa chake wori; ndeichaawunjwa ngelo ya jubili, ugho Mwaka Ghowunja Vilambo anduangi.

³¹ Ela nyumba riko shighadi ya wurigha, richatalwa kara kara na mbuwa; mundu oreiuzireghe uchakaia na hachi eikombua, naro radima kuwunjwa ngelo ya jubili ugho Mwaka Ghowunja Vilambo.

³² Elaima Walawi wichakaia na hachi ekombua vilambo vawo viko andenyi ya muzi ngelo iyo yose.

³³ Nyumba ingi iko andenyi ya imu ya mizi iyo ikauzwa ni Mlawi, nao ikaie isekombolo, suti iwunjo ngelo ya Mwaka Ghowunja vilambo, kwa kukaia nyumba ra Walawi riko andenyi ya mizi yawo, ni mali yawo aghadi ya wandu wa Israeli.

³⁴ Mbuwa relishira riko shighadi ya mizi yawo ni mali yawo toe; riseuzo.

Mkopo kwa wakiwa

³⁵ “Mwanyinyu Muisraeli ukawuya mkiwa usedimagha kukutesia moni, kumtesie sa mghenyi angu mundu okaia kiwughenyi. Kumtesie upate kukaianya na oho.

³⁶ Kusewuse fwaida iyo yose kufuma kwake, ela oho kumuobuo Mlungu, kumsighe mmbenyu ukaie kaavui na oho.

³⁷ Kusemkopeshe mali rako kwa fwaida, hata kusemneke vindo kukiweseria fwaida.

³⁸ Ini ne BWANA Mlungu wako, uo ukufunyire isanga ja Misri, upate kukuneka isanga ja Kanaani, nao moni ukaie Mlungu wako.

Kulekerelwa kwa wazumba

³⁹ “Mwanyinyu Muisraeli ukawuya mkiwa, na kukuuza uo moni kwako sa mzumba, kusem'bonyeshe kazi sa mzumba;

⁴⁰ uchakaia kwako sa mdumiki wa mafungu, na sa mghenyi. Uchakudumikia hata mwaka ghuja ghwa jubili;

⁴¹ niko ufume kwako chiaimweri na wana wake, na kughenda cha mzawo andu ifwa ja ndee jerekoghe.

⁴² Wandu wa Israeli ni wadumiki wapo niwifunyire isanga ja Misri; ndewichauzwa jingi wikaie wazumba.

⁴³ Kusem'bonyere nguma kwa kubia; ela kumuobuo Mlungu.

⁴⁴ Iji kukunde wazumba, wa womi angu wa waka, kwadima kuwighua kwa mbari zima riko kaavui na oho.

⁴⁵ Wokoni kwadima kughua wana wa waghenyi wiko aghadi konyu. Wana wivalo aghadi konyu wadima kuwuya mali renyu;

⁴⁶ hata mwadima kuwineka wana wenyu wiwuye mali rawo ra matuku ghose; nawo wichawidumikia matuku ghose wichaadua moyo. Ela Muisraeli mmbenyu, jingi kusem'bonyeshe kazi kwa kumkoronga.

⁴⁷ “Iji mghenyi, angu mndungi ukanye na oho kiwughenyi wawuya mzuri, na mwanyinyu Muisraeli uko kaavui nao uwuye mkiwa, hata ukuuze moni kuwuya mzumba wa uo mghenyi, angu kwa umu wa kinyumba cha uo mghenyi; kwa mkichuku wa uo mghenyi;

⁴⁸ ukameria kughulwa, wadima kukombolwa ni mruna ungi wake,

⁴⁹ angu awue wake, angu mwandee, angu mndungi wake wa kichuku cha kaavui; angu iji washama, wadima kukukombua moni.

⁵⁰ Uchabonya mtalo na uja mundu oremghueghe, kufuma mwaka ghuja orekuuzireghe moni kwake, hata mwaka ghwa jubili; na mtalo ghwa malipo ghuchanughana na mtalo ghwa miaka ukaie aho; niko uchamlipa sa mdumiki oreandikiloghe.

⁵¹ Ikakaia mtalo ghwa miaka evikia jubili yasighwa mingi, uchalipa pesa nyingi kwa wukomboli ghwake.

⁵² Na ikakaia ni miaka mitinieri yasigharika kuvikia jubili, wichabonya mtalo kunughana na matuku udumikie kwake, niko ubonye malipo gha wukomboli ghwake.

⁵³ Uchakaia sa mdumiki oreandikiloghe mwaka kwa mwaka, na uo mghenyi ndechaam'bonyesha kazi kwa kumkoronga kukiwona.

⁵⁴ Ukakaia usekombolo kwa iro chia, uchalekerelwa chiaimweri na wana wake Mwaka ghwa Jubili.

⁵⁵ Kwa kukaia wandu wa Israeli ni wadumiki wa BWANA orewifunyireghe isanga ja Misri; uo ni BWANA Mlungu wako.”