WALAWI 24 - Biblia Ilagho Jiboie Kwa Wandu Wose

Kulindia Taa ra Hemenyi

¹ BWANA ukamzera Musa,

² “Wilaghire wandu wa Israeli wirede mavuda gha zeituni ghiboie kuchumba, kwa wundu ghwa Taa riko Hemenyi, ripate kukorwa na kureda mwengere andenyi ngelo rose.

³ Haruni uchakaia ukirikora luma lwa kenyi, naro richakaia rikiaka imbiri ya BWANA chee, hata nakesho aho shighadi ya pazia kaavui na Sanduku ya Ilaghano, iko andenyi ya Andu kwa Wueli Kuchumbie. Sharia ihi ichanughwa vivalwa vose.

⁴ Haruni uchakaia ukirilindia iro taa riko aighu ya kinara charo cha dhahabu ielie, nao suti uwone kukaia taa iro rawuyaaka imbiri ya BWANA ngelo rose.

Mkate ghofunywa kwa Mlungu

⁵ “Kuwade kilo ikumi na iwi ra mufu ghudendere nao kubonye mikate ikumi na iwi.

⁶ Kuipange zaria iwi, kula luzaria mikate irandadu aighu ya meza ya dhahabu ielie imbiri ya BWANA.

⁷ Nao kungire marumba ghiboie kula luzaria lwa mikate, ghipate kukaia lukumbuso kwa wundu ghwa kizongona cha vindo chafunywa kwa BWANA.

⁸ Kula ituku ja Sabato, Haruni uchaiwika iyo mikate nicha imbiri ya BWANA, kwa wundu ghwa wandu wa Israeli, jikaie ilaghano ja kala na kala.

⁹ Iyo mikate ni ifungu ja Haruni na wana wake, nawo wichaijia Andu kwa Wueli kwa kukaia ivo ni vindo va wueli vieleshero vifunyiro kwa BWANA kwa wundu ghwa wakohani.”

Mfwano ghwa ikabo ja hachi jifwanagha

¹⁰ Korekoghe na mndumu orevaloghe ni muka Muisraeli, ndee orekoghe Mmisri; nao orekoghe aghadi ya wandu wa Israeli. Uja mundu ukarashana na Muisraeli umu kambinyi.

¹¹ Niko uja mundu, uo orevaloghe ni muka Muisraeli, ukamsholia na kumuewia Mlungu, na wandu wikamreda kwa Musa. Uja mundu mae orewangwaghwa Shelomithi, mwai wa Dibri, wa kichuku cha Dani.

¹² Wikamrughia wikiweseria seji lukundo lwa Mlungu luchaafunukua.

¹³ Nao BWANA ukamzera Musa,

¹⁴ “Mredenyi uo mundu ujisholie irina japo shighadi ya kambi, chia imweri na waja wandu weremsikireghe ukijisholia, wipate kuwikiria mikonu yawo aighu ya chongo chake kumshuhudia kukaia ni mkosi; na izungu jose jimlase na magho hata ufo.

¹⁵ Niko kuwizere wandu wa Israeli kukaia, mundu uo ose umsholiagha Mlungu wake, uchabonywa wokoni, nao uchaduka kaung'a rake moni.

¹⁶ Uo ose uchaajisholia irina ja BWANA, uchabwaghwa kwa kulaswa na magho ni izungu jose, ukaiagha mghenyi angu muisanga; ukekola wamsholia Mlungu, uchabwaghwa.

¹⁷ Uo ose uchaabwagha mundu uchabwaghwa.

¹⁸ Uo ose uchaabwagha nyamandu ya mmbao, uchalipa nyamandu. Sharia ni irangi kwa irangi.

¹⁹ Mundu ukamshoghonua mmbao, nao moni uchashoghonolwa.

²⁰ Ukamchikanya indi, uchachikanywa indi; ukam'bara iriso, uchabarwa iriso; ukamkua ighegho, uchakulwa ighegho; ijo jose mundu uchaam'bonyera mmbao, jichabonywa kwake wokoni.

²¹ Uo ose uchaabwagha nyamandu uchailipia, ela ukabwagha mundu nao moni uchabwaghwa.

²² Sharia ihi ichakaia kwa wundu ghonyu, na hata kwa waghenyi wiko aghadi konyu wori; Ini ne BWANA Mlungu onyu.”

²³ Nyuma ya Musa kughora huwo, wandu wa Israeli wikamreda uja mundu oremsholieghe BWANA shighadi ya kambi, na kumlasa na magho hata ukafwa. Huwo wandu wa Israeli wikabonya sa iji koni BWANA oremlaghirieghe Musa.