WALAWI 23 - Biblia Ilagho Jiboie Kwa Wandu Wose

Ndima ra dini

¹ BWANA ukamzera Musa,

² “Wizere wandu wa Israeli kukaia wicharitala Ndima riwikilo ra wueli ingelo wakwanyika kunitasa.

³ Matuku arandadu ni ghebonya kazi, ela ituku ja mfungade ni Sabato ehora; mkwanyike kwa wutasi, nenyo msakebonya kazi ingi; ni Sabato kwa BWANA andu uko kose mchaakaia.

⁴ Mtangaze iro Ndima ra wueli riwikilo kwa ngelo raro.

Pasaka na Mkate ghusewadie chachu

⁵ “Ndima ya Pasaka, iwikilo kwa wundu ghwa kumneka BWANA ishima, ichazolwa nakenyi ya ituku ja ikumi na inya ja mori ghwa imbiri.

⁶ Ituku ja ikumi na isanu, mchazoya Ndima ya Mikate Isewadie Chachu; mseje mkate ghuko na chachu kwa matuku mfungade.

⁷ Ituku ja imbiri ja agho matuku, mchakaia na ikwanyiko ja wutasi ghwa wueli; msebonye kazi ingi.

⁸ Ela mchakaia mkifunya vizongona va vindo kwa BWANA kwa matuku mfungade. Ituku ja mfungade, mchakwanyika sena kwa wutasi ghwa wueli; msebonye kazi renyu ra ituku ituku.”

⁹ BWANA ukamzera Musa,

¹⁰ “Wizere wandu wa Israeli kukaia wikangia andenyi ya ijo isanga BWANA uwinekagha, wikakuwida viro, wirede visuke vawo va mavalo gha imbiri kwa mkohani.

¹¹ Na mkohani uchavisughusa imbiri ya BWANA, eri oho kurumirikie. Mkohani uchachisughusa icho kisuke ngelo ya nakesho, nyuma ya ituku ja Sabato.

¹² Ijo ituku jesughusa kisuke chako kuchafunya mwana wa ng'ondi wa womi wa mwaka ghumweri, useko na itiko ukaie kizongona chekora kwa BWANA.

¹³ Huwo koni kuchafunya kilo iwi ra mufu ghuranganyiro na mavuda, ghipate kukaia kizongona cha viro. Irumba ja kizongona icho, jam'boiagha BWANA loli-loli. Icho kizongona kuchifunyanye na lita imweri ya divei.

¹⁴ Kuseje mavalo mawishi gha makuwido ghako, hata kwameria kufunya icho kizongona kwa Mlungu. Mavalo agho kuseje ghikaiagha mawishi, ghiochelo, angu ghiochelo ghiwuye mkate, hata kwakatisha agho malaghiro; nagho kuchaghiwadia matuku ghose vivalwa vako vose.

Ndima ya Makuwido

¹⁵ “Kutale njumwa mfungade gi, kufuma ituku ja kawi ja ija Sabato koreredieghe kisuke cha viro vako kwa BWANA.

¹⁶ Ituku ja mirongo misanu, jiko nyuma ya iro Sabato mfungade, kumfunyire BWANA kizongona chimu cha agho mavalo mawishi.

¹⁷ Kula nyumba ichafunya mikate iwi, ipate kusughuswa. Kula mkate ghubonyo kwa kipimo cha mufu ghwa kilo iwi ghuko na chachu; nagho ghuchafunywa kwa BWANA ghukaie ifunyo ja mavalo gha imbiri gha viro vikuwidiro.

¹⁸ Chiaimweri na iyo mikate, wandu wichafunya wana wa ng'ondi mfungade wa mwaka ghumweri-ghumweri wiseko na itiko, na mwana wa njau, na bauru iwi; ripate kukaia kizongona chekora kwa BWANA, chiaimweri na kizongona cha viro na kizongona cha kunywa; mafunyo agho gheko na irumba jim'boiagha BWANA loli-loli.

¹⁹ Sena kufunye fwandi ikaie kizongona kwa wundu ghwa kaung'a, na wana wa ng'ondi wawi wa mwaka ghumweri-ghumweri wikaie kizongona cha mapatano.

²⁰ Na mkohani uchawisughusa chiaimweri na ugho mkate, vikaie kizongona chesughuswa kwa BWANA kwa wundu ghwa mkohani, mafunyo agho ni gha wueli.

²¹ Ituku ijo, msebonye kazi ingi, ela mkwanyike kwa wutasi. Vivalwa venyu vichanugha sharia ihi matuku ghose ghichagha, andu uko kose wichaakaia.

²² “Iji mwakakuwida viro venyu, mseinje vija va mwanonyi ghwa mbuwa renyu, hata msakewuria kusaka masighariko; mughisighie wakiwa na waghenyi; Ini ne BWANA Mlungu onyu.”

Ndima ya Mwaka mmbishi

²³ BWANA ukamzera Musa,

²⁴ “Wizere wandu wa Israeli kukaia, ituku ja imbiri ja mori ghwa mfungade, jichakaia ni ituku jehora; mjikumbuke kwa kukaba tarumbeta, nenyo m'bonye ikwanyiko ja wueli.

²⁵ Msebonye kazi, ela mumfunyire BWANA vizongona va vindo.”

Ituku ja Mapatano

²⁶ BWANA ukamzera Musa,

²⁷ “Ituku ja ikumi ja mori ghwa mfungade ichakaia ni ituku ja mapatano, nenyo m'bonye ikwanyiko ja wutasi. Mfunge tumu na kufunya kizongona cha vindo kwa BWANA.

²⁸ Ijo ituku msebonye kazi ingi kwa kukaia ni ituku ja mapatano; nagho ghichabonywa imbiri ya BWANA Mlungu onyu.

²⁹ Mndungi ukalegha kufunga tumu ituku ijo, uchatanywa na wandu wapo.

³⁰ Na uo ose uchaabonya kazi ituku ijo, nichamnona na kumuinja aghadi ya wandu wapo.

³¹ Msebonye kazi ijo ituku; iyo ni sharia ya kala na kala vivalwa venyu vose, andu uko kose mchaakaia.

³² Kuzoya luma lwa kenyi lwa ituku ja ikenda ja ugho mori, mchahora na kufunga tumu hata luma lwa kenyi lwa ituku ja ikumi; nenyo mchaiwadia Sabato.”

Ndima ya Viwanda

³³ BWANA ukamzera Musa,

³⁴ “Wizere wandu wa Israeli kukaia ituku ja ikumi na isanu ja mori ghwa mfungade, mchakaia na Ndima ya Viwanda kwa BWANA kwa matuku mfungade.

³⁵ Ituku ja imbiri mchakaia na ikwanyiko ja wueli; msebonye kazi.

³⁶ Mchakaia mkireda mafunyo gha vindo kwa BWANA kwa matuku mfungade; na ituku ja wunyanya mchakaia na ikwanyiko ja wueli, na kufunya mafunyo gha vindo kwa BWANA; ijo ni ituku jetasa, msebonye kazi.

³⁷ (“Iri niro Ndima ra dini riwikilo kwa wundu ghwa kumneka BWANA ishima, nenyo mchakaia mkibonya makwanyiko gha wueli kwa wundu ghwa kureda mafunyo gha vindo kwa BWANA, vizongona vekora, vizongona va viro, na vizongona va kunywa; kula chimu kwa ituku jaro.

³⁸ Ndima iro ni zima riko aighu ya rija sabato ra BWANA, na mafunyo ghenyu gha manosi na gha maghemi, na ghose mumfunyiragha BWANA kwa ngolo.)

³⁹ “Iji kwameria kukuwida viro kufuma mbuwenyi kwako, kubonye iyo ndima kwa matuku mfungade, kukizoya ituku ja ikumi na isanu ja mori ghwa mfungade. Ituku ijo jichakaia jehora na ituku ja wunyanya wokoni jichakaia jehora.

⁴⁰ Ituku ijo ja imbiri kudo matunda ghiboie gha imbiri kufuma kwa midi yako, na mbashu ra mitende, na mbashu ra midi iko na malemba, na maria ghiko mbai mbai ya meda; nao kuboilo imbiri ya BWANA Mlungu wako kwa matuku mfungade.

⁴¹ Kubonye Ndima ihi kula mwaka kwa matuku mfungade; ni sharia ya kala na kala kwa vivalwa venyu vose vichaanugha nyuma.

⁴² Wandu wose wa Israeli wichakaia viwandenyi kwa matuku mfungade,

⁴³ eri vivalwa venyu wipate kumanya angu nerewibonyereghe wandu wa Israeli kukaia viwandenyi iji nerewifunyireghe isanga ja Misri; Ini ne BWANA Mlungu wako.”

⁴⁴ Huwo niko Musa orewighorieghe wandu wa Israeli mawiko gha Ndima ra BWANA.