WALAWI 19 - Biblia Ilagho Jiboie Kwa Wandu Wose

Sharia aighu ya wueli na hachi

¹ BWANA ukamzera Musa,

² “Kujizere izungu jose ja wandu wa Israeli huwu, Mkaie waeli angu ini BWANA Mlungu onyu ne Mweli.

³ Kula umu onyu uchamneka ishima mae na ndee, nenyo mriwadie sabato rapo: Ini ne BWANA Mlungu onyu.

⁴ Msakerighalukia fwana angu kukubonyera milungu eyeyusha: Ini ne BWANA Mlungu onyu.

⁵ “Iji mwakafunya vizongona va mapatano kwa BWANA, mfunye sa iji koni neremlaghirieghe; nani nichamrumiria.

⁶ Nyama ya kizongona ichajighwa ituku jija jeni kizongona chafunywa, angu hata nakesho yaro; ela nyama ingi ikasigharika hata ituku ja kadadu, ichakorwa na modo.

⁷ Ikakaia kwa chia ingi yajighwa ituku ja kadadu, ni wuchafu; icho kizongona ndechichaarumirilwa anduangi.

⁸ Uo ose uchaaja, uchaduka wuwiwi ghwake moni, angu wachinona icho chereelesheroghe ni BWANA; nao uchatanywa na wandu wa Mlungu.

⁹ “Iji kwakakuwida mavalo gha mbuwenyi kwako, kulindie kusekuwide vose, hata va mwanonyi, hata kusakesaka masighariko gharo.

¹⁰ Wokoni iji kwakakuwida zabibu rako, kusakewuria kukuwida masighariko gharo, hata kuseshoo iro rapotoka andonyi; ivo vose kuwisighie wakiwa na waghenyi; Ini ne BWANA Mlungu wako.

¹¹ “Kusakeiwa, hata kusekalie, hata mseghoriane tee.

¹² Kusakeghema kwa irina japo kwa tee, kuchejilusha; ini ne BWANA Mungu wako.

¹³ “Kusakemkoronga mmbenyu angu kumuiwia; hata mafungu gha kibarua ghiselale mfukonyi kwako hata nakesho.

¹⁴ Kusemmbwasire njowe mundu ufue madu angu kituri, hata kitungure kusemdeghie shaghala kitungure, ela kumuobua Mlungu wako; ini ne BWANA.

¹⁵ “Iji kwakatanya kusevise hachi; kusebonye wuchumbano ghungi kwa mkiwa, na kukaia wuzima kwa uo uko m'baa, ela kumtanye mmbenyu kwa hachi.

¹⁶ Kusekaie mundu wa ighu ighu kwa madedo ghako sa mghori tee aghadi ya wandu wako, hata kusetangale hachi ya mmbenyu ngelo etanywa kufwa; ini ne BWANA.

¹⁷ “Kusewikie mwanyinyu ngolo ingi, ela tima kuboisa malagho nao kwa njama, eri kusechengia kaung'enyi kwa wundu ghwake.

¹⁸ Kusakemlipia mndungi angu kukaia na ngenga nao. Ela kumkunde mmbenyu sa iji koni kukukunde kumoni; ini ne BWANA.

¹⁹ “Kuiwadie memu yapo. Kusevarishe mfugho rako na kichuku kizima. Kusewe mbari iwi ra mbeu mbuwenyi, hata kusero nguwo ya vichuku viwi va uzi.

²⁰ “Ngera mwai uko mzumba wachamanyika kukaia walowolwagha ni mndumu, nao ndelipilo hata kufungulwa kufuma kwa wuzumba ghwake, nao ikaie mundu umu mzima walala nao, wose wawi wichanekwa adhabu, ela ndewichaabwaghwa anduangi; kwa kukaia uo mwai waduagha mzumba.

²¹ Uja mundu walala nao uchareda bauru mnyangonyi ghwa Hema ekwania, ikaie kizongona cha malipo;

²² na mkohani uchawada iyo bauru, na kubonya mapatano kwa wundu ghwa kaung'a ya uo mundu; na Mlungu uchamfuya wughoma.

²³ “Iji mwameria kuvika isanga ja Kanaani, na kuwa midi yose ya matunda, mtale matunda gharo kukaia ghighirilo kujighwa kwa miaka idadu. Mseje itunda jingi jaro andenyi ya iyo miaka idadu.

²⁴ Mwaka ghwa kana, matunda ghose ghichatalwa kukaia ghieleshero; nagho ghichafunywa kukaia ifunyo jenikasa ini.

²⁵ Ela mwaka ghwa kasanu, kwadima kuja matunda gharo. Mkabonya huwo, midi yenyu ichava matunda kwa wungi; ini ne BWANA Mlungu wako.

²⁶ “Mseje nyama iko na bagha andenyi yaro. Kusefundishe kulogha angu kulaghua.

²⁷ Mseare maridia ghenyu virodi, hata msedumbuo sombe renyu.

²⁸ Msekucho na kukubonya alama ringi mimbinyi konyu mkililia wafu; ini ne BWANA.

²⁹ Kusemnone mwai wako kwa kumfunya ukaie ilaya, eri isanga jisechengia wumalaya na kuchulwa ni wuwiwi ghose.

³⁰ Mchawadia sabato rapo na kulindia Andu Kwapo kwa Wueli; ini ne BWANA.

³¹ “Kuselole njama kwa wandu widedanyagha na roho ra wandu wifuye angu wasawi, kuchelushwa; ini ne BWANA Mlungu wako.

³² “Kummbukie kimusi mghosi uko na imbu kwa kumneka ishima, kumuobuo Mlungu wako; ini ne BWANA.

³³ “Kukakaianya na mghenyi isangenyi kwako kusem'bonye kiwiwi.

³⁴ Uo mghenyi mwawuyakanya uchakaia kwako sa muisanga aghadi konyu; na oho kuchamkunda seji kukukunde kumoni, kwa kukaia na oho korekoghe mghenyi isanga ja Misri; ini ne BWANA Mlungu wako.

³⁵ “Kusekalie mndungi kwa kutumia vipimo va tee, sa vepima wulacha, wulemeri angu vipimo vizima.

³⁶ Mtumie vipimo va wulacha, na va wulemeri, na vipimo kwa hachi; Ini ne BWANA Mlungu onyu orekufunyireghe isanga ja Misri.

³⁷ Na oho kuritale sharia rapo rose na memu yapo yose, kupate kurikatisha; Ini ne BWANA.”