WALAWI 14 - Biblia Ilagho Jiboie Kwa Wandu Wose

Kueleshwa nyuma ya kuwadwa ni sima

¹ BWANA ukamzera Musa,

² “Ihi niyo sharia ya mundu orewadiloghe ni sima, nao wakunda kueleshwa. Ucharedwa kwa mkohani,

³ na mkohani uchamfunya shighadi ya kambi upate kumzighana. Ukawona angu ugho wukongo ghwa sima ghwasirie,

⁴ uchafunya momu kukaia uo mundu orekoghe na sima nao wakunde kueleshwa uredelo nyonyi iwi rimoo riboie, chiaimweri na mudi ghwa sida, uzi wa ngundu na hisopu.

⁵ Niko mkohani uchafunya momu imu ya iro nyonyi ibwagho aighu ya kilambo cha wongo chiko na machi ghawuyaida.

⁶ Nao uchawada ija nyonyi imu iko moyo, na kuingira baghenyi irangane na machi ghawuyaida, na ija nyonyi yabwaghwa, chiaimweri na mudi ghwa sida, uzi wa ngundu, na hisopu.

⁷ Niko uchammichira uja mundu ukunde kueleshwa iyo bagha mando mfungade, na kumghora kukaia uelie. Nao uchailekeria ija nyonyi iko moyo iburuke noko.

⁸ Niko uo mundu ukundagha kueleshwa, uchaoghosha nguwo rake na kuara iridia jake, na kukuoghosha machinyi, nao uchaela. Ukafuma aho, uchacha kambinyi; ela uchakaia shighadi ya hema yake kwa matuku mfungade.

⁹ Ituku ja mfungade, uchaara chongo chake sena, na sombe rake na vikunya vake, na andu kose kuko na mafuri mumbinyi kwake. Niko aho uchaoghosha nguwo rake, na kukuoghosha uo moni; nao uchakaia waela kunughana na sharia.

¹⁰ “Ituku ja wunyanya, uchareda wana wa ng'ondi wa womi wawi, na ng'ondi ya waka ya mwaka ghumweri, riseko na itiko, kilo idadu ra mufu ghudendere; ghuranganyiro na mavuda, na ifungu jimweri ja kadadu ja lita ya mavuda.

¹¹ Mkohani uchammbwada uo mundu chiaimweri na mafunyo ghake, nao uchamghenja mnyangonyi ghwa Hema ekwania.

¹² Niko mkohani uchawada imu ya awo wana wa ng'ondi, chiaimweri na ifungu ja kadadu ja lita ya mavuda, na kuvifunya vikaie kizongona kwa wundu ghwa makosa. Niko uchavifunya vikaie kizongona chesughuswa kwa BWANA.

¹³ Nao uchabwagha uo mwana wa ng'ondi andu vizongona kwa wundu ghwa kaung'a, na vizongona vekorwa vibwaghilwagha. Uchabonya huwo, kwa kukaia vizongona kwa wundu ghwa makosa karakara na vizongona kwa wundu ghwa kaung'a ni ifungu ja mkohani; navo ni va wueli loli loli.

¹⁴ Mkohani uchawada bagha imu ya iyo bauru kwa chala chake na kuishinga mdonyi ghwa kudu kwa kiwomi kwa uja mundu ukundagha kueleshwa; na bagha imu uchaishinga chalenyi chake cha ighosi cha mkonu ghwa kiwomi, na inonyi jake ja ighosi ja kughu kwa mkonu gha kiwomi.

¹⁵ Niko mkohani uchawada mavuda ghamu na kughidunga luinyi lwake lwa mkonu ghwa kiwaka;

¹⁶ nao uchangira chala chake cha mkonu ghwa kiwomi mavudenyi ghiko luinyi lwa mkonu ghwake ghwa kiwaka, na kumichira agho mavuda aeni aho imbiri ya BWANA mando mfungade.

¹⁷ Agho mavuda ghasigharika luinyi kwake, uchaghishinga na chala chake mdonyi ghwa kudu kwa uja mundu ukunde kueleshwa; na wokoni uchamshinga chala chake cha ighosi cha mkonu ghwa kiwomi na ino jake ja ighosi ja kughu kwa mkonu ghwa kiwomi aighu ya bagha ishingiloghe ya kizongona kwa wundu ghwa makosa.

¹⁸ Niko uchamshinga agho mavuda ghasigharika luinyi aighu chongonyi kwake; na mkohani uchabonya wupatanisho kwa wundu ghwake imbiri ya BWANA.

¹⁹ “Niko mkohani uchafunya kizongona kwa wundu ghwa kaung'a, upate kubonya mapatano kwa wundu ghwa uja mundu ukundagha kueleshwa. Konyuma uchaibwagha iyo nyamandu kwa wundu ghwa kizongona chekora,

²⁰ na kuchifunya chiaimweri na kizongona cha viro aighu ya madhabahu. Nao uchabonya wupatanisho kwa wundu ghwake, na uja mundu uchatalwa kukaia uelie.

²¹ “Ela ikakaia uo mundu ooka mkiwa usedimagha kupata ivo vilambo, uchareda mwana wa ng'ondi wa womi kwa wundu ghwa kizongona cha makosa chesughuswa, mkohani upate kubonya wupatanisho kwa wundu ghwake. Sena uchareda kilo imweri ya mufu ghudendere na mavuda kwa wundu ghwa kizongona cha viro, na ifungu ja kadadu ja lita ya mavuda,

²² angu maringo seji uchaadima, ghikaie kizongona na kwa wundu ghwa kaung'a na kizongona chekora.

²³ Ituku ja wunyanya ja kukuelesha kwake, uchareda ivo vilambo kwa mkohani imbiri ya BWANA, aho mnyangonyi ghwa Hema ekwania.

²⁴ Na mkohani uchawada iyo bauru, na mavuda nao uchavifunya vikaie kizongona chesughuswa kwa BWANA.

²⁵ Niko uchabwagha ija bauru ya kizongona cha makosa, na kuwusa bagha imu; nao uchaishinga m'bonyenyi ya kudu kwa kiwomi kwa uja mundu ukunde kueleshwa, na chalenyi chake cha ighosi cha mkonu ghwa kiwomi, na inonyi jake ja ighosi ja kughu kwa mkonu ghwa kiwomi.

²⁶ Na mkohani uchadunga mavuda ghamu luinyi kwa mkonu ghwake ghwa kiwaka,

²⁷ nao uchamichira na chala chake bagha imu kufuma luinyi lwake aeni aho imbiri ya BWANA mando mfungade.

²⁸ Nao uchadunga mavuda ghamu ghiko mkonunyi kwake mdonyi ghwa kudu kwa kiwomi kwa uja mundu ukunde kueleshwa, na chalenyi chake cha ighosi cha kiwomi, na inonyi jake ja ighosi ja kiwomi, andu koni ukoghe washinga bagha ya kizongona cha makosa.

²⁹ Mavuda ghose ghisigharikagha luinyi lwa mkohani, uchaghishinga chongonyi kwa uja mundu ukunde kueleshwa, upate kubonya mapatano kwa wundu ghwake imbiri ya BWANA.

³⁰ Niko uja mundu uchafunya mbughi angu iringo jimu, seji udimagha;

³¹ ikaie kizongona kwa wundu ghwa kaung'a, na imu kwa wundu ghwa kizongona chekora chiaimweri na kizongona cha viro. Na mkohani uchabonya mapatano imbiri ya BWANA kwa wundu ghwa uo mundu ukunde kueleshwa.

³² Ihi niyo sharia, kwa wundu ghwa mundu orewadiloghe ni sima, ela usedimagha kupata vilambo vikundikie kwa wundu ghwa kueleshwa kwake.”

Mruruwe kuwoneka nyumbenyi

³³ BWANA ukawizera Musa na Haruni,

³⁴ “Iji mwavika isanga ja Kanaani ijo nimnekagha jikaie jenyu, nani ningire mruruwe andenyi ya nyumba imu ya iro nimnekagha,

³⁵ mundu wa nyumba iyo uchaghenda na kumghoria mkohani kukaia, kilambo chimu sa mruruwe chawuyawoneka nyumbenyi kwake.

³⁶ Niko mkohani uchafunya momu vilambo vose vifunyo cha shighadi imbiri mkohani usengirie kuzighana ugho mruruwe; eri vilambo vose viko nyumbenyi, visecheghorwa kukaia viseelie. Nyuma ya huwo, mkohani uchangia nyumbenyi kuzighana.

³⁷ Niko uchazighana ugho mruruwe, Iji mruruwe ghwawoneka wurighenyi ghwa nyumba, na alama ra makumbo na ra ngundu ringirie nokondenyi ya wurigha

³⁸ mkohani uchafuma na kuirugha iyo nyumba kwa matuku mfungade.

³⁹ Ituku ja mfungade uchawuya sena kuzighana. Ukawona angu ugho mruruwe ghwaawuyaera wurighenyi,

⁴⁰ uchafunya momu agho magho ghawuayawoneka kukaia na mruruwe, ghifunyo na kudaghwa kula shighadi ya muzi, andu kwa wuchafu.

⁴¹ Nyuma ya huwo, mkohani uchalaghira angu wurigha ghose ghwa nyumba ghukangarulo, na wuchafu ghwaro ghukumbo andu kwa wuchafu shighadi ya muzi.

⁴² Niko wichashoa magho mazima, na kuagha andu wifunyireghe magho gha wukongo, ima ukabe plasta andu aho.

⁴³ “Ugho mruruwe ghukawoneka sena nyuma ya kuinja magho, na kukangarua wurigha ghwa nyumba, na kuwunja magho mazima, na kukaba nyumba plasta wuwishi,

⁴⁴ mkohani uchaghenda na kuzighana. Ukawona ghwaawuyaera, ugho ghuchakaia mruruwe ghuzamie; na nyumba ichatalwa kukaia iseelie.

⁴⁵ Niko mundu wa nyumba uchavuchua ija nyumba putu; kufuma magho, mbau, na plasta raro putu; nao uchavifunya na kuvida noko andu kwa wuchafu, shighadi ya muzi.

⁴⁶ Aighu ya agho, mndungi ukangia iyo nyumba nyuma ya kurughwa, uchatalwa kukaia useelie hata luma lwa kenyi;

⁴⁷ na uo ose uchaalala andonyi andenyi ya nyumba iyo uchaoghosha nguwo rake; na uo ose uchaaja vindo andenyi ya nyumba iyo, uchaoghosha nguwo rake.

⁴⁸ “Ela mkohani ukacha kuzighana, nao usowe mruruwe na nyumba yakabilo plasta, uchaighora iyo nyumba kukaia ielie, mruruwe ghwainjiro.

⁴⁹ Kwa kuelesha nyumba, uchawada nyonyi iwi, na mudi ghwa sida, uzi wa ngundu na hisopu;

⁵⁰ nao uchabwaghia imu ya iro nyonyi andenyi ya chombo cha wongo, chiko na machi gha ndoria.

⁵¹ Niko aho mkohani uchawada mudi ghwa sida, hisopu na uzi wa ngundu, chiaimweri na ija nyonyi iko moyo, nao uchavingira andenyi ya bagha ya nyonyi yabwaghwa, iko andenyi ya kilambo cha wongo chiko na machi ghawuyaida na kuimichira ija nyumba mando mfungade.

⁵² Kwa chia iyo, uchaielesha nyumba kwa bagha ya nyonyi, na machi ghawuyaida, na nyonyi iko moyo, na mudi ghwa sida, na hisopu, na uzi wa ngundu.

⁵³ Niko mkohani uchailekeria ija nyonyi iko moyo iburuke noko shighadi ya muzi. Kwa chia iyo, uchakaia wabonya mapatano kwa wundu ghwa iyo nyumba, nayo ichatalwa kukaia ielie.”

⁵⁴ Ihi niyo sharia ya wukongo ghwa sima, wukongo ghokusuwa,

⁵⁵ na mrasi nguwonyi, angu mruruwe nyumbenyi,

⁵⁶ na wukongo ghovimba kilemenyi, na ghokonoka, angu andu kuko na dadama;

⁵⁷ ipate kuwonyera ngelo kilambo chielie, na ngelo chiseelie.