WALAWI 1 - Biblia Ilagho Jiboie Kwa Wandu Wose

Vizongona vikorwagha vose

¹ BWANA ukammbanga Musa na kughora nao kufuma kwa iyo Hema ekwania, ukighamba,

² “Zera wandu wa Israeli kukaia, mndungi onyu ukakareda ifunyo kwa BWANA, urede kufuma chaghenyi cha mfugho.

³ Ikakaia uafunya ng'ombe yake ikaie kizongona chekora, suti urede njau isene itiko. Uchaireda mnyangonyi ghwa Hema ekwania, eri kizongona chake chipate kurumirilwa ni BWANA.

⁴ Uo mundu uchawika mkonu ghwake aighu ya chongo cha ija njau ya kizongona chekora, nayo icharumirilwa ikaie kizongona cheinja kaung'a rake.

⁵ Nao uchaibwagha iyo njau imbiri ya BWANA, na wana wa Haruni, awo wakohani wichafunya iyo bagha, na kuimichira madhabahu chia rose aho mnyangonyi ghwa Hema ekwania.

⁶ Niko uchaisicha iyo njau na kuitemeria vipande vipande.

⁷ Wakohani, awo wana wa Mkohani Haruni, wichapanga mbande aighu ya madhabahu, na kukora modo.

⁸ Wakohani wichawikiria vija vipande va nyama, na chongo na mavuda aighu ya iro mbande rawuyahia aighu ya madhabahu.

⁹ Uja mundu wafuya icho kizongona uchaoghosha mawula na vindo vose va ndenyi na maghu gharo, na mkohani uchavikora vose madhabahunyi, vikaie kizongona chekora; irumba ja vindo ivo jamnukiagha BWANA nicha nandighi.

¹⁰ “Ikakaia inosi ja uo mundu ja kizongona chekora ni ng'ondi angu mburi, uchafunya bauru angu fwandi iseko na itiko jingi anduangi.

¹¹ Uchaibwaghia chia ya kaskazinyi ya iyo madhabahu imbiri ya BWANA, na wakohani, awo wana wa Haruni wichaimichira iyo madhabahu bagha chia rose.

¹² Na uo mundu uchaitemeria vipande vipande, chiaimweri na chongo na mavuda gharo, na uo mkohani uchaviwikiria nicha aighu ya iro mbande rawuyahia aighu ya madhabahu.

¹³ Uja mundu wafunya icho kizongona uchaoghosha na mkohani uchavifunya vose kwa BWANA na kuvikora aighu ya madhabahu, vikaie kizongona chekora; irumba ja vindo ivo jamnukiagha BWANA nicha na ndighi.

¹⁴ “Ikakaia ifunyo jake kwa BWANA ni kizongona chekora cha nyonyi, uchareda chana cha mbughi angu iringo.

¹⁵ Niko mkohani uchaireda aighu ya madhabahu, nao uchainyighara chongo na kuikora aighu ya madhabahu; na bagha yake ichadika luwarunyi lwa madhabahu.

¹⁶ Niko uchainja chija kifu na wuchafu ghwaro na kuchidagha mbai na mbai ya madhabahu, chia ya mashariki andu ivu jidilwagha.

¹⁷ Uchaibara mawawenyi, ela ndechaitanya putu; na mkohani uchaikora yose aighu ya madhabahu, ikaie kizongona chekora; irumba ja vindo ivo jamnukiagha BWANA nicha na ndighi.