WAKOLOSAI 2 - Biblia Ilagho Jiboie Kwa Wandu Wose

¹ Angu nakunde mmanye seji nawuyafunga ndighi kwa wundu ghonyu, na kwa wundu ghwa wandu wa Laodikea, na awo wose wiseniwonie jingi;

² eri wipate kuhoreshwa ngolo rawo kwa kuwadanishwa chiaimweri kwa lukundo, wipate iro mali rose ra kuelelwa kwa loli, na kuimanya ngasu ya Mlungu, nayo ni Kristo;

³ andenyi kwake uo raviswa mali rose ra hikima na kumanya.

⁴ Naghora huwu, eri mndungi usemkalie kwa madedo gha wukalo.

⁵ Angu hata ngera sikwanye nenyo kwa mumbi, ela neko andwamweri nenyo kwa roho; ngiboilwa kwa kuwona seji mwawuyaghenda nicha kwa irumirio jenyu jimange andenyi ya Kristo.

Kuchua kwa irangi andenyi ya Kristo

⁶ Kwa huwo, sa iji koni moremmbusireghe Kristo Jesu kukaia Bwana, duonyi huwo koni andenyi kwake;

⁷ mkidunga miri na kuaghwa andenyi kwake kwa ijo irumirio, sa iji koni morefundishiroghe, na kudua mkifunya chawucha.

⁸ Manyenyi mndungi usakemlaghasha kwa mafundisho na makalio ghake gha duu, kwa kunugha mizango ya wandu, na mafundisho gha pepo, ghiseko gha Kristo anduangi.

⁹ Angu andenyi ya Kristo, ghwadakaia wulungu ghose kwa chia ya mumbi;

¹⁰ nenyo mwachulwa ni irangi andenyi kwake, uo uko chongo aighu ya nguma rose na kudima.

¹¹ Andenyi kwake wori, inyo mwashamishiro, kwa kushamishwa kusebonyero ni mikonu anduangi, ela ni kuja kubonywagha ni Kristo moni kwa chia ya kughurua ghuja wundu ghwa mumbi ghwa kaung'a.

¹² Nenyo mwarikilo andwamweri nao kwa wubaputizo, na kwa ugho wubaputizo, mkarukanya andwamweri nao kwa chia ya irumirio, kwa uko kubonya kazi kwa Mlungu; uo oremrukishireghe Kristo kufuma kwa wafu.

¹³ Na inyo, wandu morekoghe mfue kiroho kwa wundu ghwa makosa, na kwa kusowa kushamishwa kwa mimbi yenyu, Mlungu oremkaishireghe moyo andwamweri na Kristo, umeria kudifuya wughoma makosa ghedu ghose,

¹⁴ na kuivuta ija karatasi ya mashitakio erekoghe ikidishitakia kwa sharia raro; nayo oreiwikieghe na mbai, ukiiwamba aighu ya msalaba.

¹⁵ Nao ukawisoka ndighi rawo awo wabaa wa ndighi ra kira, na pepo ribonyagha nguma, ukawibonya wiwoneke worinyi kukaia si kilambo chingi; ukizuma aighu yawo kwa ugho msalaba.

¹⁶ Kwa huwu mndungi usakemtanya kwa maza ra vindo, angu kunywa, angu kwa wundu ghwa karamu ringi, angu matuku gha Mori Lukombe, angu Sabato.

¹⁷ Maza iri ni fwana ya iro maza richagha, ela wuloli ni ghwa Kristo.

¹⁸ Mndungi usakemtanya kwa kuzitiria malagho ghake gha wundu ghwa kukusera, na kutasa weke malaika, ukikusaghika aighu ya kuwona mawono, na kukujosa duu kwa maririkanyo ghake gha kimmbi;

¹⁹ usewadanagha na Kristo uo uko chongo, nao wadaghulisha mumbi ghose na kughuwadanisha chiaimweri kwa mawungo na mighenu yaro, nagho ghwazoghua kwa kuzoghua kufumagha kwa Mlungu.

Kufwa na kukaia moyo na Kristo

²⁰ Ikakaia morefueghe andwamweri na Kristo, mkarisigha maza ra asili ra pepo ribonyagha nguma wurumwengunyi, kwaki sena mwawuyakaia sa wandu wa wurumwengu? Kwaki mwawuyakuwika aisi ya malaghiro?

²¹ “Msakewada, Msaketoa, Msakeadada”

²² (kunughana na ivo vilambo, navo ni vejighwa na kutota) karakara na malaghiro na mafundisho gha wandu?

²³ Maza iri loli rawoneka kukaia na hikima kwa mundu utasagha kikwake, kukusera kwa tee, na kughutirira mumbi, ela nderitesiagha kughiria mumbi ghusekatishe bea rake anduangi.