WAEFESO 6 - Biblia Ilagho Jiboie Kwa Wandu Wose

Wana na wavi wawo

¹ Inyo wanake, wisikirenyi wavi wenyu sa kumsikira Bwana, angu ilagho iji jaboie.

² “Kuwibonyere ishima ndeyo na mayo, (ughu ni momu ghwa imbiri ghuko na ilaghiro)

³ kupate kuwona nicha, na kukaia na matuku mengi ndoenyi.”

⁴ Weke aba, msakewinona ngolo wana wenyu, hata wivikie kukaia na machu; ela muwilele kwa mawonyero na mafundisho gha Bwana.

Wazumba na weke bwana

⁵ Inyo wazumba, wisikirenyi awo wiko weke bwana wenyu wa kimmbi kwa kuobua na kusughusika; kwa ngolo ielie, seji mwaawuyamdumikia Kristo;

⁶ si ngelo wiko aeni wikimzighanira, sa kukunda kuwiboia wadamu anduangi; ela sa wadumiki wa Kristo, mkibonya lukundo lwa Mlungu kwa ngolo.

⁷ Bonyenyi kazi kwa ngolo iboie, sa kumdumikia Bwana; hata si wadamu anduangi.

⁸ Mkimanya angu icho chose mundu uchibonyagha chiboie, uchapata wuja koni kufuma kwa Bwana; ukaiagha ni mzumba, angu mkitina.

⁹ Nenyo weke bwana, wibonyerenyi wuja koni wazumba wenyu, msakewikumba wowa; mkimanya angu uo uko Bwana onyu mmbose oko mlungunyi, nao ndemtalagha mndungi kuchumba mmbao anduangi.

Maswagha ghose gha Mlungu

¹⁰ Kutua, kaienyi nandighi andenyi ya Bwana, na kwa ndighi ra kudima kwake.

¹¹ Ronyi maswagha ghose gha Mlungu, eri mdime kuitangala mikalo ya Ibilisi.

¹² Angu ndediwuelwa na wadamu, ela daawuyalwa na mawubaa, na awo wiwadie ndighi, na wabonyi nguma wa wurumwengu ughu ghwa kira chiko idime, na majeshi gha roho rizamie, ghiko cha mlungunyi.

¹³ Kwa huwu wadenyi maswagha ghose gha Mlungu, eri mdime kughiria wuwiwi ghwa ituku jaro; hata iji mwameria kubonya ghose mmange.

¹⁴ Kwa huwu mangenyi, mkikaia na loli sa mkowa kiwonunyi konyu; na hachi sa ngao laghenyi konyu;

¹⁵ na kuja kukaia tayari kwa kueresha Ilagho Jiboie ja sere sa vadu maghunyi konyu.

¹⁶ Na aighu ya agha ghose, mkaie na irumirio sa ngao, mpate kurimisha mawanu ghose gha modo gha Uja Mmbiwi.

¹⁷ Sena wusenyi kukia sa kofia ya chuma, na Ilagho ja Mlungu sa lufu lwa Roho.

¹⁸ Lombenyi kwa Roho tuli tuli; kwa kulomba na kuvoya kose, mkicheresha aighu ya agho kwa kurumaghia kose, na kuvoya kwa wundu ghwa waeli wose.

¹⁹ Na kwa wundu ghwapo wori, nipate kunekwa kuighora iyo ngasu ya Ilagho Jiboie kwa wuwana;

²⁰ kwa io, ini neko mdumwa waro, nifungilo na mnyororo; nipate kujighora kwa wuwana seji inifwanagha.

Voro ra kutua

²¹ Uo mwanidu Tukiko mkundwa, na mdumiki wa loli andenyi ya Bwana, uchamghoria maza rapo rose.

²² Naamduma kwa wundu ghwa ijo ilagho jeni, mpate kumanya seji diko, sena upate kumkumba ngolo.

²³ Sere ndeikaie kwa wanidu, na lukundo andwamweri na irumirio jifumagha kwa Mlungu Aba, na kwa Bwana Jesu Kristo.

²⁴ Mvono ndeghukaie andwamweri na awo wose wimkundagha Bwana odu Jesu Kristo kwa lukundo lusewadie kutua.