WAEFESO 5 - Biblia Ilagho Jiboie Kwa Wandu Wose

Kukaia mwengerenyi

¹ Kwa huwu mkaie mfwanane na Mlungu, sa wana wikundo.

² Nenyo mghende kwa lukundo, sa iji koni Kristo oredikundieghe, na kukufunya moni kwa wundu ghodu, ukaie ifunyo na kizongona cha marumba mecha kwa Mlungu.

³ Ela kulaka, na maza rose riseelie, angu iriso; hata kughorwa koni viseghoro konyu seji koni iwifwane waeli wikaie.

⁴ Msakekaia na wuchafu ghungi, hata madedo gha kisha kisha, angu nganyi risefwanagha, ela wulalo ghwaro mumfunyire Mlungu chawucha.

⁵ Manyenyi kwa loli, ndekuwadie mlaki ungi, angu mundu useelie, angu mundu wa iriso (nao nuo mtasi milimu), uko na ifwa jingi andenyi ya wuzuri ghwa Kristo na ghwa Mlungu anduangi.

⁶ Msakekalilwa ni mndungi kwa madedo maduu, angu kwa wundu ghwa maza iri, machu gha Mlungu ghawichea awo wisesikiragha.

⁷ Kwa huwu msakekaia ngara nawo,

⁸ angu aho imbiri morekoghe kirenyi, ela idana moko mwengerenyi andenyi ya Bwana; ghendenyi sa wana wa mwengere;

⁹ (angu itunda ja mwengere jawoneka andenyi ya icho chose chiko chiboie, na hachi, na loli);

¹⁰ mkitima kukufundisha icho chim'boiagha Bwana.

¹¹ Msakekaia ngara na kazi ra kira risene fwaida, ela mrifunukuo worinyi.

¹² Angu ni waya hata kurighora iro maza wiribonyagha kivisonyi.

¹³ Ela iji maza ringi rafunukulwa ni ghuja mwengere, rakaia worinyi; angu icho chose chiko worinyi ni mwengere.

¹⁴ Niko huwu ighorelo, “Wuka ee mundu kulalagha kuruke kufuma kwa wafu na Kristo uchakulangalishira mwengere.”

¹⁵ Idana manyenyi seji mghendagha, si sa wandu wisewadie suku anduangi, ela sa wandu wiwadie suku;

¹⁶ mkiitumia nicha ngelo muko nayo, angu matuku agha ghazamie.

¹⁷ Kwa huwo, msekaie wakelu, ela mtambukilo seji Bwana ukunde konyu.

¹⁸ Msakewongia kwa divei, angu aho koko na kunoneka; ela mchulo ni Roho,

¹⁹ mkidedanya kwa zaburi, na chumbo, na kubora kwa rohonyi. M'bore na kumzumia Bwana kwa ngolo renyu rose;

²⁰ mkimfunyira chawucha Mlungu Aba matuku ghose, kwa wundu ghwa kula ilagho, kwa irina ja Bwana odu Jesu Kristo.

Waka na womi wawo

²¹ Kula mundu ndekuwike aisi ya mmbao kwa kumwobua Kristo.

²² Inyo waka, mkuwike aisi ya womi wenyu, sa kukuwika aisi ya Bwana.

²³ Angu mndwawomi nuo uko na nguma aighu ya mkake, seji koni Kristo uko na nguma aighu ya ikanisa, ugho mumbi ghwake; nao nuo moni Mkiri wake.

²⁴ Na sa iji koni ikanisa jiko aisi ya Kristo, huwo koni na waka ndewikaie aisi ya womi wawo kwa maza rose.

²⁵ Inyo womi, wikundenyi waka wenyu, sa iji koni Kristo orejikundieghe ikanisa; ukakufunya moni kwa wundu ghwaro,

²⁶ upate kujielesha kwa kujioghosha na machi kwa ilagho;

²⁷ eri ukupatire moni ikanisa jighokie na ndighi, jisewadie iboli angu itiko jingi, hata ilagho jingi jifwane sa ijo anduangi; jielie, jiseko na kilema chingi.

²⁸ Huwo koni, yawifwana womi wiwikunde waka wawo karakara na mimbi yawo cheni. Uo umkundagha mkake, wadakukunda uo moni.

²⁹ Angu ndekuwadie mndungi uzamilwagha ni mumbi ghwake moni; ela wadaghulisha, na kughulindia, sa iji koni Kristo ujibonyeragha ikanisa;

³⁰ angu isi deko via va mumbi ghwake.

³¹ “Kwa wundu ughu, mundu uchamsigha ndee na mae, umaziriane na mkake, na awo wawi, wichawuya mumbi ghumweri.”

³² Ihi ni ngasu mbaa, nani naawuyaghamba kukaia yaawuyawonyera seji Kristo uko na ikanisa jake.

³³ Elaima kula umu onyu, ndemkunde mkake seji ukukunde moni, na muka wori uwone kukaia wamneka ishima mumi wake.