WAEFESO 3 - Biblia Ilagho Jiboie Kwa Wandu Wose

Kazi ya Paulo kwa wandu wa mbari zima

¹ Kwa wundu ughu, ini Paulo mfungwa wa Kristo Jesu, kwa wundu ghonyu inyo wandu wa mbari zima,

² nasuwiria angu mwamerie kusikira malagho gha wudumiki ghwa mvono ghwa Mlungu ninekelo kwa wundu ghonyu;

³ kukaia, neremanyishiroghe iyo ngasu kwa chia ya wufunuo, sa iji nereandikieghe kwa wuvui.

⁴ Iji mwaghishoma malagho niandikie, mwadima kuwona seji nipatire kumanya iyo ngasu ya Kristo.

⁵ Nayo ndeeremanyishiroghe wandu wa vivalwa vizima, seji imanyishiro idana kwa wadumi na walodi wake wielie, kwa chia ya uo Roho Mweli;

⁶ kukaia, wandu wa mbari zima wapatire kuwuya wandu wa ifwa, via va ghuja mumbi ghumweri, na wangara wa ijo ilaghiro Mlungu orejibonyereghe andenyi ya Kristo Jesu kwa chia ya Ilagho Jiboie.

⁷ Ini nerebonyeroghe nikaie mdumiki wa ijo Ilagho Jiboie, karakara na ijo inosi ja mvono ghwa Mlungu nerenekeloghe kwa chia ya kubonya kazi kwa kudima kwake.

⁸ Hata ngera ini nerekoghe mtini wa waeli wose, ela nerenekeloghe mvono ugho, nipate kuwichilia awo wandu wa mbari zima malagho gha iro mali ra Kristo risemanyikagha.

⁹ Na kuwibonya wandu wose wighuwone ugho mpango ghwa iyo ngasu erevisiroghe kwa Mlungu ngelo riidie, Uo uumbie vilambo vose;

¹⁰ ipate kukaia kwa chia ya ikanisa, hikima ya Mlungu iko kwa chia zima-zima, imanyike idana kwa wabaa na awo wiwadie ndighi wa malalo gha mlungunyi.

¹¹ Maza iri, rerebonyeroghe ni Mlungu karakara na mpango ghwake ghwa kala, ugho ughukatishire andenyi ya Kristo Jesu Bwana odu;

¹² nesi deko na wuwana ghongia kwa Mlungu kwa wuing'oni, kwa chia ya irumirio diko najo andenyi ya Kristo.

¹³ Niko namlomba, inyo msefo ngolo kwa matiriro niko nagho kwa wundu ghonyu; angu agho ni wubaa ghonyu.

Lukundo lwa Kristo

¹⁴ Kwa wundu ughu, namdungia ngokoro uja Aba,

¹⁵ nao ni ndee wa vichuku vose va mlungunyi na ndoenyi;

¹⁶ ngimlomba umneke mundu onyu wa ndenyi ndighi ra Roho wake, karakara na wungi ghwa mali ra wubaa ghwake;

¹⁷ na Kristo ukaie andenyi ya ngolo renyu kwa chia ya irumirio. Nenyo mkidunga miri na kumanga kwa lukundo,

¹⁸ mpate kukaia nandighi retambukilwa chiaimweri na waeli wose, niki wushapa, na wulacha, wuighu, na wundenyi;

¹⁹ na kulumanya lukundo lwa Kristo ulo luchumbie kumanya kose, mpate kuchulwa ni kuchua kose kwa Mlungu.

²⁰ Idana kwa Mlungu uo udimagha kubonya maza mbaa andenyi kodu kuchumba iro dimlombagha angu kuririkanya,

²¹ kwake uo ndeghukaie wubaa andenyi ya ikanisa, na andenyi ya Kristo Jesu; kwa vivalwa vose kwa kala na kala. Amen.