WAEFESO 1 - Biblia Ilagho Jiboie Kwa Wandu Wose

¹ Ini Paulo, mdumi wa Kristo Jesu kwa lukundo lwa Mlungu; namuandikia inyo waeli wa loli wiko andenyi ya Kristo Jesu aho Efeso.

² Mvono ndeghukaie konyu, na sere rifumagha kwa Mlungu Aba odu, na kwa Bwana Jesu Kristo.

Marasimio gha kiroho andenyi ya Kristo

³ Ndekaso uo Mlungu, Ndee wa Bwana odu Jesu Kristo, uo oredirasimieghe andenyi ya Kristo na kula irasimio ja kiroho cha mlungunyi.

⁴ Nao oredisaghueghe isi andenyi ya Kristo kufuma aho imbiri wurumwengu ghuseumbilo; eri dikaie dielie, wandu wisewadie ikosa jingi imbiri kwake.

⁵ Mlungu orebonyere mpango ghwa kusaghulwa kodu kwa lukundo, dipate kukaia wana wake kwa chia ya Jesu Kristo, kunughana na mpango ghwake seji orekundieghe moni;

⁶ upate kukaswa kwa wundu ghwa mvono ghwake ghwa wubaa, ugho oredinekieghe duu andenyi ya uo Mkundwa.

⁷ Andenyi kwake, isi deko na wukomboli ghodu, kwa chia ya bagha yake; kuja kulekelwa makosa ghedu, karakara na wungi ghwa mvono ghwake,

⁸ ugho udinekie kwa wungi.

⁹ Angu Mlungu wadimanyishire iyo ngasu ya lukundo lwake, kwa hikima yose na kumanya, kunughana na mpango ghwake oreghuwikieghe andenyi ya Kristo

¹⁰ kukaia, kwa ngelo ikatie, upate kuvikwanya vilambo vose andenyi kwake; ivo viko mlungunyi, na ivo viko andoenyi.

¹¹ Andenyi kwake Kristo, kunughana na ugho mpango ghwa Mlungu, uo uvikatishagha vilambo vose, karakara na njama ya lukundo lwake,

¹² isi deresuwirieghe andenyi ya Kristo koimbiri, damerie kusaghulwa na kuwikwa dikaie moyo kwa wundu ghwa kughukasa ugho wubaa ghwake.

¹³ Andenyi ya Kristo, inyo wori moresikireghe ilagho ja loli, ijo Ilagho Jiboie ja kukia konyu; nenyo mwendamrumiria, morekabiloghe muhuri kwa Roho Mweli wa ilaghiro;

¹⁴ nao nuo wufunga ghwa ifwa jedu, hata divikie kujiwusa kwa kughukasa ugho wubaa ghwake.

Ilombi ja Paulo

¹⁵ Kwa wundu ughu, angu nisikire malagho gha irumirio jenyu andenyi ya Bwana Jesu, na lukundo lonyu kwa waeli wose,

¹⁶ silekagha kufunya chawucha kwa wundu ghonyu; ngimkumbuka andenyi ya malombi ghapo

¹⁷ kukaia, uo Mlungu wa Bwana odu Jesu Kristo Aba wa wubaa, umneke inyo Roho ya hikima, na ya mafunuo ghemmanya uo.

¹⁸ Meso gha ngolo renyu ghineko mwengere, eri mpate kumanya wammbangie kwa isuwirio ja indoki, na ni mali rifwane wada ra ifwa ja wubaa ghwake riko andenyi ya waeli.

¹⁹ Na seji iro ndighi rake risepimikagha ring'ane andenyi kodu isi dirumiriagha, karakara na uko kubonya kazi kwa ndighi rake mbaa;

²⁰ iro orerikatishireghe andenyi ya Kristo, iji oremrukishireghe kufuma kwa wafu, na kumsera kidombo chia ya mkonu ghwake ghwa kiwomi aho mlungunyi;

²¹ ighu nandighi kuchumba kubonya nguma kose, na kudima, na ndighi, na wuzuri, na aighu ya kula irina jiwangilo; si kwa ngelo ihi cheni anduangi, ela hata na iyo ichagha wori.

²² Mlungu waviwikie vilambo vose vikaie maghunyi kwake Kristo, na kummbika ukaie chongo aighu ya vilambo vose kwa wundu ghwa ikanisa;

²³ najo nijo mumbi ghwake, uko kuchua kwake uchuragha vose andenyi ya vose.