WAEBRANIA 7 - Biblia Ilagho Jiboie Kwa Wandu Wose

Mkohani Melkizedeki

¹ Uo Melkizedeki, mzuri wa Salemu, mkohani wa Mlungu Uko Aighu Na Ndighi, orekwaneghe na Abrahamu, iji orekoghe ukiwuya kufuma wudenyi, andu orekoghe wawibwagha wazuri; Melkizedeki ukamrasimia;

² na Abrahamu ukamneka ifungu ja ikumi ja vindo vose orekoghe navo. Irina ja Melkizedeki kutambua kwaro kwa imbiri ni Mzuri wa Hachi, nao sena angu orekoghe mzuri wa Salemu, irina jake jeko na kutambua kwaro kwa kawi Mzuri wa Sere.

³ Uo ndewadie ndee, angu mae, hata kichuku chingi; ndewadie kuzoya hata kutua kungi anduangi. Nao ukifwanana na Mwana wa Mlungu, wadua mkohani kwa kala na kala.

⁴ Wona seji uo mundu uko m'baa! Aba odu Abrahamu oremnekieghe ifungu ja ikumi ja vilambo oreviwadieghe wudenyi.

⁵ Na waja wandu wa kivalwa cha Lawi wiwadagha kazi ya wukohani, weko na malaghiro gha Sharia, ghiwirumiriagha wiwuse ifungu ja ikumi kufuma kwa wandu, nawo ni waruna; hata ngera saki awo wandu wori ni wa kivalwa cha Abrahamu.

⁶ Ela uo Melkizedeki useko wa mzawo, orewusireghe ifungu ja ikumi kufuma kwa Abrahamu, nao ukamrasimia uo mundu orekoghe wapata agho malaghiro gha Mlungu.

⁷ Mndungi ndedimagha kukana kukaia mundu mtini nuo urasimilwagha ni uhu m'baa.

⁸ Awo wakohani wiwusagha ifungu ja ikumi, ni wandu wifwagha; ela aho dawona angu ijo ifungu jerewusiroghe ni Melkizedeki, mundu wawuyashuhudilwa kukaia oko moyo.

⁹ Dadima kughora hata Lawi moni, uo uwusagha ifungu ja ikumi, orefunyireghe ijo ifungu kwa chia ya Abrahamu;

¹⁰ kwa kukaia hata ngera orekoghe usevalo, ela orekoghe andenyi ya viwonu va wawae Abrahamu iji orekwanagha na Melkizedeki.

¹¹ Idana, ikakaia wukohani ghwa wen-Lawi ghorekateghe-lee, (angu wandu wedepata Sharia kwa chia ya ugho wukohani) ekoo hajaki sena kukaia na mkohani mzima, onughishira wukohani ghwa Melkizedeki, wulalo ghwa uja moni uwikwagha kwa kunughishira wukohani ghwa Haruni?

¹² Angu maghaluso ghangi ghikakabonywa kwa wukohani, suti na Sharia wori ighaluso wokoni.

¹³ Na Bwana odu, uo maza iri rawuyaghorwa aighu yake, orekoghe wa mbari iseko ya wukohani, nayo hata mndungi waro jingi ndedumikie madhabahunyi.

¹⁴ Ni worinyi kukaia Bwana odu orekoghe wa kivalwa cha Juda, na Musa jingi ndeghora ilagho jingi ja wukohani aighu ya mbari iyo anduangi.

Mkohani mzima sa Melkizedeki

¹⁵ Maza iri reko worinyi kuchumba, kwa kuwona seji mkohani umu wawuka ufwanane na Melkizedeki.

¹⁶ Nao wawurie mkohani kuseko na mawiko gha kivalwa cha mumbi, ela kwa ndighi ra irangi jisewadie kunoneka.

¹⁷ Angu washuhudilo huwu, “Oho ko mkohani kwa kala na kala kwa kunughishira wukohani ghwa Melkizedeki.”

¹⁸ Kwa luwaru lumu, Sharia ya imbiri yawikwa na mbai kwa wundu ghwa wunyonge iko nagho, na kuleghafwana kwaro;

¹⁹ (angu Sharia ndeeredimieghe kukatisha ilagho jingi); na kwa luwaru lumu isuwirio jiboie kuchumba jaredwa, ijo jididimishagha kumsoghodera Mlungu kaavui.

²⁰ Najo ndejerekoghe kuseko na ighemi anduangi.

²¹ Awo wandu werewuyagha wakohani imbiri, wada-wada kazi rawo kuseko na ighemi. Ela Jesu orewurieghe mkohani kwa ighemi huwu, “Bwana waghemie, nao ndewuyaaghaluka; ‘Oho ko mkohani kwa kala na kala.’”

²² Ilagho iji jam'bonya Jesu ukaie muichi wa ilaghano jiboie kuchumba.

²³ Awo wakohani wa imbiri werekoghe wengi, kwa wundu ghwa kughirilwa kudua kazinyi ni kifwa;

²⁴ ela Jesu wadua na wukohani ghwake toe, angu uduagha kwa kala na kala.

²⁵ Kwa chia io, wadima kuwikira ngelo rose awo wimsoghoderagha Mlungu wikiidia kwake; kwa kukaia uo wadua moyo matuku ghose, upate kuwilombia.

²⁶ Niko koni erefwaneghe dipate Mkohani M'baa uko huwo; wa wueli, usewadie ikosa jingi, usene iboli, utanyiro na wakaung'a, na kujoswa ighu kuchumba milungunyi.

²⁷ Uo ndena haja efunya vizongona matuku ghose, sa waja wakohani wabaa; wei ufunye kizongona kwa wundu ghwa kaung'a rake moni imbiri, ima uwonefunya kwa wundu ghwa wandu. Jesu odebonya huwo indo jimweri tua, iji orekufunyireghe moni kizongona.

²⁸ Loli Sharia yawiwika wandu wiko na wunyonge wikaie wakohani wabaa, ela ilaghiro jibonyero kwa ighemi, najo jerechieghe nyuma ya Sharia, jammbika Mwana uo ukatishiro kwa kala na kala.