WAEBRANIA 6 - Biblia Ilagho Jiboie Kwa Wandu Wose

¹ Kwa huwo, ndedighende imbiri, divikie kukaia wandu wikatie; dikisigha agho mafundisho gha imbiri gha Kristo. Diseaghe msingi sena ghorihea kazi rifue, na ghwa irumirio kwa Mlungu,

² na ghwa mafundisho gha wubaputizo, na gha kuwikiria mikonu, na gha kuruka kufuma kwa wafu, na gha kutanywa kwa kala na kala.

³ Na iri dicharibonya Mlungu ukakunda.

⁴ Angu ndeidimikagha kuwiwunja wihee sena awo wandu wimerie kulangalishirwa mwengere, wikajitoa ijo inosi ja mlungunyi, wikabonywa wangara wa Roho Mweli,

⁵ wikaghutoa wucha ghwa Ilagho ja Mlungu nandighi ra ngelo richagha,

⁶ iji wajikana ijo irumirio; angu waameria kumsulubisha Mwana wa Mlungu kwa kukunda kwawo weni, na kumfusha waya worinyi.

⁷ Ija ndoe inywagha machi gha vua inyagha aighu yaro shwa kwa shwa, na kuva mavalo ghiwifwanagha awo wandu wereilimieghe, yadarasimilwa ni Mlungu.

⁸ Ela ikabuka minjwa na masaka, ndeifwanagha; nayo yakaia kaavui na kuwasirwa njowe, na kutua kwaro ni kukorwa.

⁹ Hata ngera dadeda huwo saki wakundwa, elaima kwa luwaru lonyu deko na loli angu moko na maza ndicha kuchumba riko ra kukia.

¹⁰ Si angu wei Mlungu oosowa hachi, hata uleghe kuritala kazi renyu na lukundo muko nalo, ulo moreluwonyereghe kwa wundu ghwake kwa chia ya kuwidumikia waeli, sa iji koni mduagha mkibonya.

¹¹ Na isi dakunde kula umu onyu uwonyere kufunga ndighi uko koni, kwa kukatisha ijo isuwirio hata kutua.

¹² Msekaie waghadi, ela mkufwananishe na awo wichaajipata ifwa ijo ilaghiro, kwa chia ya irumirio na irumaghio.

Ilaghiro ja loli ja Mlungu

¹³ Iji Mlungu orebonyagha ilaghiro na Abrahamu, kwa kukaia userekoghe na mndungi m'baa oghema nao, oreghemieghe kwa uo moni,

¹⁴ ukighamba, “Loli nichakurasimia na kukubonya kuchurikie.”

¹⁵ Na huwo, nyuma ya Abrahamu kurumaghia kwa wumboa, orejipatireghe ijo ilaghiro.

¹⁶ Loli wandu wadaghema kwa umu uko m'baa kuwichumba, na nganyi rawo rose radamerelwa na kumangishwa kwa chia ya ighemi.

¹⁷ Kwa wundu ugho, iji Mlungu orekundeghe kuwiwonyera kilolia agho makusudi ghake ghiseghalukagha, awo werekoghe wijipate ifwa ijo ilaghiro, orejibonyereghe ijo ilaghiro kwa ighemi;

¹⁸ eri kwa chia ya agho malagho awi, ilaghiro na ighemi, agho isedimikagha Mlungu ughore tee, isi dikusaghikie nao, didime kukaia na ngolo mbaa ejiwada ijo isuwirio jiwikilo imbiri kodu.

¹⁹ Isi deko na ijo isuwirio jiko sa nanga imange ya irangi jedu, jingiagha kondenyi na kuida pazia na nyuma,

²⁰ andu Jesu uzoe ukakiria na kungia kwa wundu ghodu, uendawuya Mkohani M'baa wa kala na kala, kwa kunughishira wukohani ghwa Melkizedeki.