WAEBRANIA 2 - Biblia Ilagho Jiboie Kwa Wandu Wose

Kukia kubaa

¹ Kwa huwo, suti diriwadie nandighi iro maza dirisikire, disechewuya nyuma.

² Ikakaia malagho ghereghoreloghe ni weke malaika gherekoghe gha loli, na awo werekosereghe kwa kulegha kusikira, kula umu orepatireghe ikabo jake ja hachi;

³ isi-lee, dichafufunuka wada dikakumenya kukia kubaa kung'ane huwu? Na Bwana orezoeghe kukughora, na wandu weremsikireghe ukikughora, wikadiwonyera seji kuko kwa loli.

⁴ Mlungu ukikushuhudia kwa chia ya alama na mashiniko, na weke mwakilimbiti wazima-wazima, na kwa manosi gha Roho Mweli ghiwaghilo karakara na seji orekundieghe moni.

Kilongozi odu wa kukia

⁵ Angu Mlungu nderewikieghe weke malaika wicheghubonyera nguma wurumwengu ghuchagha, ugho dawuyaja malagho gharo.

⁶ Na andu kumu yaghorelo huwu, “Mdamu niki hata kumkumbuke, angu mwana wa mdamu niki hata kumtale?

⁷ Oho korem'bonyereghe mtini kuchumba weke malaika kwa ngelo ndini, kukamrusha kirumbu cha wubaa na ishima;

⁸ kukaviwika vilambo vose aisi ya maghu ghake vipate kumsikira.” Idana kwa kuviwika vilambo vose aisi yake, vipate kumsikira, ndesighie kilambo chingi usechiwikie aisi yake anduangi. Seji iko, daduagha disewonie vilambo vose vawikwa aisi yake.

⁹ Ela dammbona Jesu, uo orebonyeroghe mtini kuchumba weke malaika kwa ngelo ndini, eri kwa mvono ghwa Mlungu, upate kufwa kwa wundu ghwa kula mundu; nesi dammbona warushwa kirumbu cha wubaa na ishima, angu orepatireghe matiriro gha kifwa.

¹⁰ Angu erefwaneghe, Mlungu uo uumbie vilambo vose, sena kwa chia yake vikakaia, umkatishe Jesu kwa chia ya matiriro, eri upate kuwireda wana wengi wingie kwa wubaa ghwake. Angu Jesu nuo kilongozi cha kukia kwawo.

¹¹ Angu uo ueleshagha, na awo wieleshwagha, weefuma kwa Ndee umweri. Kwa wundu ugho niko Jesu usefwagha waya kuwiwanga waruna

¹² ukighamba, “Nichawichilia wanidu irina jako, na aghadi ya izungu, nichakukasa.”

¹³ Na sena, “Nichawika isuwirio japo kwa Mlungu.” Na sena, “Neko aha chiaimweri na wana Mlungu uninekie.”

¹⁴ Idana kwa kukaia awo wana ni wandu wiko na nyama na bagha, huwo koni Jesu orewusireghe fwana tiki ya kidamu, eri kwa chia ya kifwa, upate kumtotesha uo uko nandighi ra kifwa, uo Ibilisi;

¹⁵ na kuwikira awo wose werekoghe wuzumbenyi kwa chia ya kuobua kifwa irangi jawo jose.

¹⁶ Angu uo loli nderechieghe kwa wundu ghwa weke malaika, ela odecha kwa wundu ghwa kivalwa cha Abrahamu.

¹⁷ Kwa huwo, eremfwaneghe ufwananisho na waruna kwa kula chia, eri upate kukaia Mkohani M'baa uwadie wughoma, na uko mloli kwa wudumiki ghwa Mlungu, na kulipia kaung'a ra wandu.

¹⁸ Na kwa kukaia uo moni watiririlo na kutimwa, wadima kuwitesia awo witimwagha.