WAEBRANIA 12 - Biblia Ilagho Jiboie Kwa Wandu Wose

Aba Mlungu odu

¹ Kwa huwo na isi wori, kwa kukaia damarwa ni iwingu ibaa ja washahidi jing'ane huwu, ndediinje kula kighirio, na iyo kaung'a idikakadiagha na ndighi; dikimbie kwa kurumaghia, kwa kuja kuisana kuwikilo imbiri kodu

² dikimzighana Jesu mzoishi na mkatishi wa irumirio jedu. Uo, kwa wundu ghwa kuja kuboilwa korewikiloghe imbiri kwake, oreghurumaghieghe msalaba, ukaghumenya waya; nao waserie kidombo chia ya mkonu ghwa kiwomi ghwa kifumbi cha nguma cha Mlungu.

³ Mtalenyi uo orerumaghieghe kutangalwa kung'ane huwu ni wakaung'a, eri msechesilwa ni ndighi angu kufwa ngolo.

⁴ Inyo ndemcheelwa mkisimana na kaung'a hata kuvikia kudia bagha anduangi.

⁵ Angu mooliwa agho malagho ghemshashira ghighoragha nenyo sa wana? “Mwanwapo, kusakewona ni ilagho itini kuja kukania kwa Bwana, hata kusakefwa ngolo iji wakukaba.

⁶ Kwa kukaia Bwana wadamkania uo mundu umkunde, na kumdama mwana uo ose umrumiriagha.”

⁷ Kwa wundu ghwa kukanilwa, yamfwana mrumaghie. Mlungu waawuyam'bonyera sa wana wake; angu ni mwana uao usekanilwagha ni ndee?

⁸ Mkasighwa wokoni msekanilwaghwa, na wandu wose wadakanilwa wokoni, aho mooka wana wesholwa msevalo nyumbenyi anduangi.

⁹ Chiaimweri na agho isi derekoghe na weke aba wa ndoenyi, werekoghe wikidikania, nesi dikawineka ishima. Welee, ndeidifwane dikusere kuchumba kwa Aba wa roho redu dipate kukaia moyo anguwada?

¹⁰ Weke aba wa ndoenyi weredikanieghe kwa ngelo ndini seji werekundieghe, ela Mlungu wadikania kwa fwaida edu diweni, dighupate ghuja wueli ghwake.

¹¹ Ingelo dikanilwagha dadawawa, wulalo ghoboilwa; ela konyuma, kukanilwa kose kwadareda matunda gha sere ghiko gha hachi kwa uo ufundishiro nako.

Mafundisho na mawonyero

¹² Kwa huwo iwusirenyi mikonu yenyu iko minyonge na kuvifungisha ndighi vitemberu venyu vitewelekagha.

¹³ Mrighoruo chia renyu mghendagha naro, eri icho kia chikelemere chisetanyo na wambao, ela bora chiboiso.

¹⁴ Fungenyi ndighi kulola sere na wandu wose, na ugho wueli; mndungi useko nagho, ndechaammbona Bwana anduangi.

¹⁵ Manyenyi mndungi useghusowe ghuja mvono ghwa Mlungu, isechekaia muri ghungi ghwa kuwawa ghubuke na kureda wasi hata kuwilusha wandu wengi.

¹⁶ Mndungi usekaie mlaki, angu usemuobuagha Mlungu sa Esau uo oreuzireghe hachi ya kuvalwa kwake kwa vindo va ngelo imweri.

¹⁷ Angu mwamanya kukaia, konyuma iji orekundeghe kupata ifwa ja irasimio, orelegheloghe; angu nderepatireghe wulalo ghungi ghohea anduangi, hata ngera orejilolieghe kwa ndighi, ukidikwa ni mbori.

¹⁸ Angu inyo ndemghuvikie Mghondi ghwa Sinai ghudimagha kuadadwa; andu modo ghoreakagha, kuko na kira, wuchilu, kiremba,

¹⁹ lwaka lwa tarumbeta, na lwaka lwa uo oreghorieghe malagho; agho gherewibonyereghe wandu werekoghe wikighisikiria kuvoya angu wisechurilo malagho ghangi sena anduangi.

²⁰ Kwa kukaia ndewererumaghieghe agho malaghiro werenekeloghe kukaia, “Uo ose uchaadada mghondi ugho hata ngera ni nyamandu, ichalaswa na magho.”

²¹ Na loli kuwoneka kwaro korekoghe koobosha na ndighi, hata Musa ukaghamba, “Naobua nandighi na kusughusika.”

²² Ela inyo mwaghuvikia Mghondi ghwa Sioni, na muzi ghwa Mlungu uko moyo, Jerusalemu ghwa mlungunyi, na weke malaika wisetalikagha wakwanyika kwa kuboilwa;

²³ na ikwanyiko ja wavalwa wa imbiri wa Mlungu, awo wiandikilo mlungunyi. Mwavika kwa Mlungu uo mtanyi wa wose, na kwa roho ra wandu wa hachi wikatishiro,

²⁴ na kwa Jesu mpatanishi wa ilaghano iwishi, na bagha imichiro ighoragha nicha kuchumba iyo ya Abeli.

²⁵ Manyenyi msemleghe uo ughoragha nenyo. Angu ikakaia wiserekirieghe awo weremleghieghe uo orewiwonyereghe ndoenyi, isi dichakia wada dikamlegha uo udiwonyeragha kufuma mlungunyi?

²⁶ Ngelo iyo, lwaka loresughusireghe ndoe; ela idana walaghira huwu, “Indo jimu sena nichasughusa si ndoe iekeri anduangi, ela na mlungunyi wori.”

²⁷ Malagho agha “Indo jimu sena,” ghiawonyera kuinjwa kwaro ivo visughuswagha sa vilambo viumbilo, eri ivo visedimikagha kusughuswa, vipate kusigharika.

²⁸ Kwa huwo ndedifunye chawucha na kuboilwa kwa kuwusa wuzuri ghusedimagha kusughuswa; nesi ndedimtase Mlungu kwa chia im'boiagha, kwa ishima, na kuobua;

²⁹ angu Mlungu odu, ni modo ghubirie, ghulunguragha.