WAEBRANIA 10 - Biblia Ilagho Jiboie Kwa Wandu Wose

¹ Kwa kukaia iyo Sharia eeka na kirerendi cheni cha vilambo viboie vichagha, wulalo ghwa fwana ya loli ya ivo vilambo, na jingi ndeidimagha kuwikatisha awo wandu wisoghodagha kwa Mlungu, kwa kufunya vizongona vija veni tulituli mwaka hata mwaka.

² Ngera viadima-lee, kumangu sena ndevisighilo kufunywa? Kumangu waja watasi wereeleshwagha, ndewerewuyaasikira ngolo rawo rikiwitanya sena kwa wundu ghwa kaung'a.

³ Ela kwa vizongona ivo, wandu wadakumbuka kaung'a mwaka kwa mwaka.

⁴ Angu bagha ya njau na mburi, ndeidimagha kuinja kaung'a anduangi.

⁵ Kwa wundu ghwa agho, Kristo uendacha wurumwengunyi, oreghambieghe huwu, “Oho ndekorekoghe na haja ya vizongona na mafunyo ghangi, ela koreniboisireghe mumbi.

⁶ Ndekoreboiloghe ni vizongona vekora, hata vizongona kwa wundu ghwa kaung'a anduangi.

⁷ Niko ngaghamba, ‘Ola nameria kucha sa iji koni malagho ghapo ghiandikilo andenyi ya chuo; nipate kubonya lukundo lwako ee Mlungu.’”

⁸ Iji oreghoragha aho nalughu wei, “Oho ndekorekundeghe, hata kuboilwanya na vizongona na mafunyo, na vizongona vekora na mafunyo kwa wundu ghwa kaung'a,” (ivo vifunywagha kunughana na Sharia),

⁹ niko ukachuria, “Ola nameria kucha, nipate kubonya lukundo lwako,” huwo Mlungu wadajiinja ijo ja imbiri, upate kujimangisha ijo ja kawi,

¹⁰ na kwa ulo lukundo lwa Mlungu, damerie kueleshwa kwa chia ya kufunywa kwa mumbi ghwa Jesu Kristo ijo indo jimweri tua.

¹¹ Na kula mkohani wadabonya wudumiki ghwake ituku ituku kalazi koni, ukifunya vizongona vija veni, ivo jingi visedimagha kuinja kaung'a.

¹² Ela Kristo uendafunya kizongona chimweri cha ngelo rose kwa wundu ghwa kaung'a, oreserieghe kidombo chia ya mkonu ghwa kiwomi ghwa Mlungu.

¹³ Na aho wawesera hata wamaiza wake wibonyo kukaia kifumbi chewikiria maghu ghake.

¹⁴ Angu kwa uko kukufunya indo jimweri, wawikatisha kwa kala na kala awo wieleshwagha.

¹⁵ Na Roho Mweli wori wadishuhudia; angu nyuma ya kughora,

¹⁶ “Iji nijo ilaghano nichaajibonya nawo nyuma ya matuku ghaja waghamba Bwana; Nichariwika sharia rapo ngolonyi kwawo na kuriandika akilinyi kwawo.”

¹⁷ Niko wachuria huwu, “Sichaarikumbuka kaung'a rawo, hata mabonyo ghawo ghizamie sena anduangi.”

¹⁸ Andu kuko na kufuilwa wughoma kwa iro, ndekuwadie sena ifunyo jingi kwa wundu ghwa kaung'a anduangi.

Kumsoghodera Mlungu

¹⁹ Kwa huwu wanidu, deko na wuwana ghongia Andu kwa Wueli kwa bagha ya Jesu;

²⁰ uo oredirughueghe chia mbishi, iko moyo, kwa kuidia pazienyi; kutambua kwaro, kuidia mumbinyi kwake.

²¹ Na kwa kukaia deko na mkohani m'baa wa nyumba ya Mlungu,

²² ndedisoghode kaavui na Mlungu kwa ngolo ya loli, na irumirio jikate; dioghoshero ngolonyi disighe nia izamie na mimbi yedu ioghoshero kwa machi ghielie.

²³ Ndedimazire uko kurumiria kwa isuwirio jedu, disakenyavurika; angu uo ulaghirie ni mloli.

²⁴ Nesi ndeditalane na kushashiriana diweni na diweni, kwa lukundo, na kubonya kazi ndicha.

²⁵ Disakesigha kuja kukwana chia imweri, seji wamu wibonyagha; ela dikumbane ngolo diweni na diweni, na kuchumba nandighi mkiwona seji ijo Ituku ja Bwana jakaia kaavui.

²⁶ Angu dikabonya kaung'a kidali nyuma ya kuimanya ija loli, ndechiko kizongona chingi chisighwagha kwa wundu ghwa kaung'a;

²⁷ ela kuasighwa kulangaria kuja kutanywa koobosha, na kubia kwa modo, uko kuchaawilungura awo wamaiza.

²⁸ Mundu ukainona Sharia ya Musa, wadabwaghwa kuseko wughoma kwa wushuhuda ghwa wandu wawi angu wadadu.

²⁹ Mwamanya ni ikabo ibaa saki jichaamfwana mundu ummenyere Mwana wa Mlungu, ukaibonya bagha ya ilaghano kukaia kilambo cha kisha, iyo cheni oreelesheroghe nayo, sena wammenya Roho wa mvono?

³⁰ Angu damwichi uo oreghorieghe, “Ngenga ni yapo, ini nichalipa.” Na sena “Bwana uchawitanya wandu wake.”

³¹ Ni ilagho jeobosha kughwa mikonunyi kwa Mlungu uko moyo.

³² Ela kumbukenyi matuku gha kala; ngelo io, muendanekwa mwengere, morerumaghieghe kusimana kubaa kwa wasi mungi.

³³ Ngelo rimu mkisholelwa worinyi na kukorongwa, na ngelo rimu mkikaia ngara na awo werekoghe wikibonywa huwo.

³⁴ Angu morekoghe na wughoma na wafungwa, mkarumiria kusokwa mali renyu kwa kuboilwa; kwa kukaia inyo mmbeni moremanyireghe angu moko na mali riboie kuchumba, riduagha.

³⁵ Kwa huwo msakeghusigha ugho wuwana ghonyu, angu ghoko na mafungu mabaa.

³⁶ Angu yakundikie mrumaghie, eri mpate kulubonya lukundo lwa Mlungu, na kupata icho mlaghirilo.

³⁷ Angu yasighwa kapindi katini uo uchagha uchacha; hata ndechaamuka anduangi.

³⁸ Ela mhachi wapo, uchadua moyo kwa irumirio; nao ngera wawuya nyuma, ngolo yapo ndeichaaboilwanya nao anduangi.

³⁹ Ela isi ndediko wa awo wiwuyagha nyuma na kutota, ela deko wa awo wiko na irumirio jekira roho redu.