WAEBRANIA 1 - Biblia Ilagho Jiboie Kwa Wandu Wose

Mlungu kughora kwa chia ya Mwana wake

¹ Kufuma kokala, Mlungu oreghorieghe mando malazi na weke aba wedu kwa chia zima-zima, ukitumia walodi.

² Ela agha matuku gha kutua, waghora nesi kwa chia ya Mwana wake; uo oremmbikieghe ukaie mundu wa ifwa ja vilambo vose, na kwa chia yake wori, oreghuumbieghe wurumwengu.

³ Uo Mwana, ni uko kung'ala-ng'ala kwa wubaa ghwa Mlungu, nao ni fwana tiki ya Mlungu moni; uvimaziriagha vilambo vose kwa ilagho jake jiwadie kudima. Nao umeria kubonya kuja kuelesha kaung'a, oreserieghe kidombo chia ya mkonu ghwa kiwomi ghwa Mlungu wa Wubaa uko aighu.

Wubaa ghwa Mwana wa Mlungu

⁴ Uo Mwana orewurieghe m'baa nandighi kuchumba weke malaika, sa iji koni ijo irina ujipatire kwa Mlungu jiko ibaa kuchumba ghawo.

⁵ Angu ni malaika uao jingi uzerelo ni Mlungu wei, “Oho ko Mwana wapo, nakuva idime.” Angu wei, “Nichakaia ndee, nao uchakaia Mwanwapo.”

⁶ Na sena iji wamreda wurumwengunyi uo mvalwa wa imbiri waghamba, “Malaika wose wa Mlungu ndewimtase.”

⁷ Na kwa weke malaika waghamba huwu, “Mlungu wawibonya weke malaika wake wiwue mbeo, na wadumiki wake wiwue chumu ra modo.”

⁸ Ela kwa Mwana waghamba huwu, “Kifumbi chako cha nguma ee Mlungu chadua kwa kala na kala, mzata ghwa nguma ghwa hachi, ni mzata ghwa nguma ghwa wuzuri ghwako.

⁹ Oho kwaikunda hachi, na kuzamilwa ni kiwiwi; Kwa huwo Mlungu, Mlungu wako wakushingie mavuda, na kukuneka kuboilwa kubaa kuchumba wambenyu.”

¹⁰ Na sena, “Oho Bwana, aho kuzoenyi, koreumbieghe ndoenyi na kwa mikonu yako kumoni, korebonyereghe mlungunyi.

¹¹ Iro richatota, ela oho kuchadua; iro richaghosia rose sa nguwo.

¹² Oho kucharikucha sa ikoti naro richaghaluswa sa nguwo. Ela oho kwadua wokoni; na miaka yako, ndeiwadie kutua kungi anduangi.”

¹³ Angu ni malaika uao jingi Mlungu umzerie, “Sea kidombo chia ya mkonu ghwapo ghwa kiwomi, hata niwibonye wamaiza wako wikaie kifumbi chewikiria maghu ghako?”

¹⁴ Welee, weke malaika wose si roho ridumikagha, ridumilo ripate kudumika kwa wundu ghwa awo wipatagha kukia anguwada?