TITO 3 - Biblia Ilagho Jiboie Kwa Wandu Wose

Tabia ya Mkristo

¹ Kuwikumbuse wandu wikusere kwa wabaa, na awo wibonyagha nguma; wikaie wesikira, na kukaia tayari kubonya kazi iyo yose iko ndicha.

² Wisakemghora mndungi kiwiwi, wisekaie werashana, wikaie wa mboa, na kuwonyera wucha ghose kwa wandu wose.

³ Angu na isi diweni aho imbiri derekoghe wakelu disesikiragha, dilaghashiro, na kubonywa wazumba ni maboilo na bea zima-zima, dikimeria matuku ghedu kwa wuwiwi na iriso; dikizamia wandu, na kuzamiana diweni na diweni.

⁴ Ela iji wucha na wughoma ghwa lukundo lwa Mlungu Mkiri odu ghorewonekieghe,

⁵ oredikirieghe; si kwa wundu ghwa mabonyo ghangi gha hachi dibonyere anduangi, ela ni kwa wundu ghwa wughoma ghwake moni kwa chia ya kuoghosha kwa kuvalwa wuwishi, na kubonywa wawishi ni Roho Mweli;

⁶ uo Mlungu oremdirieghe aighu kodu kwa wungi, kwa chia ya Jesu Kristo Mkiri odu;

⁷ eri dipate kutalwa kukaia na hachi kwa mvono ghwake, na kuwuya wandu wa ifwa wesuwiria irangi ja kala na kala.

⁸ Ilagho iji ni ja loli. Nakunde malagho agho kughighore kwa ndighi, eri awo wimerie kurumiria kwa Mlungu wikufunye kwa kubonya kazi ndicha; naro raboie na kukaia na fwaida kwa wandu.

⁹ Ela kuriinjikie na mbai nganyi ra wukelu, maandiko gha vichuku, kurashana, na kusimana kwa Sharia; iro nderine fwaida, ni maza ra duu.

¹⁰ Mundu ubonyagha sheshe, kukammbonyera indo ja imbiri na ja kawi, kumsighe noko;

¹¹ kukimanya angu mundu ufwane huwo walagharie, nao wabonyagha kaung'a; mundu ukutanyire moni putu.

Mafundisho gha kutua

¹² Iji namduma Artema angu Tukiko kwako, tima nandighi kuche kwapo aja Nikopoli; angu nawonie nikaie aho ngelo ya kwari.

¹³ Bonya seji kudimagha kumshashira uja wakili Zena na Apolo kwa charo chawo; manya angu wisesowe kindo chingi.

¹⁴ Na wandu wedu wikufundishe kukufunya kwa kubonya kazi ndicha, eri widime kutesia maza rakundika kwa shwa-shwa, wisekaie wisene mabonyo.

¹⁵ Wandu wose dikwanye, wakuroghua. Wiroghuo wakundwa wedu wiko andenyi ya ijo irumirio. Mvono ndeghukaie na inyo mmbose.